超級特務 發表於 16-2-19 05:19
三毛我都有睇,唔多。
我愛睇香港作家鍾曉陽,李碧華。呢排睇大陸作家章怡和,楊絳,錢鍾書。
鍾曉陽,李碧華:我多年最愛,尤其係李碧華,佢嘅散文、長篇、短篇、鬼怪。。。我都睇得八八九九,唯一長篇冇睇過係《煙花三月》,報告文學講慰安婦回鄉尋親故事,可能係太沉重,冇動力開嚟睇。鍾曉陽嘅《停車暫借問》、《愛妻》、《春在綠蕪中》好睇,可惜之後佢寫得好少又好耐都唔寫一本,書展都冇見到有佢嘅書。
你有冇睇過近代中國女作家戴厚英嘅書?佢本《人啊!人》我係睇完話劇去搵小說睇,好精彩,寫法又好獨特,之後嘅秦淮系列《空中的足音》、《往事難忘》我睇到好感動,可惜96年俾人殺死咗,真係可惜。
我反而係去到大學至睇金庸,以前一直都冇睇過武俠小說,反而係我細佬睇,佢買晒成套,我就攞嚟睇,最愛都係射鵰同神鵰,金庸真係利害,咁多本書人物都各有性格特色,大俠都分好多種,每個主角都有個人色彩,反而我最唔鍾意鹿鼎記,碧血劍我覺得好悶,睇唔完。
花旗太太生活在花旗國,留意時差,你問我未必即時答到。