沙律做左媽咪啦!
27 April 晏晝一點左右沙律生左第一隻鼠 b ,我地真係唔知沙律有左,只係隔星期磅重覺得佢重左,估唔到係就快做媽媽。
點樣發現?就係阿囡抱沙律出黎時發現沙律下身有血,屋仔入面多左舊肉色識郁既野,阿囡抱住沙律黎同我講,我嚇到即刻去睇先知道咁大件事。
沙律由點幾至四點生左九隻鼠 b,每生一隻都好攰,我同阿囡就陪住佢生,我亦都摸住沙律等佢無咁驚。
生完第七隻後,第八同九鼠 b 係同時間出世,應該係生到慣左一下就生左兩隻出黎。
因為我有野做出左去,第十隻鼠 b 我陪唔到沙律生。
成個生產過程都叫睇晒,由鼠 b 出左離後咬臍帶,跟住到胎盤,臍帶同胎盤沙律自己食返晒黎補充營養。
沙律生頭兩隻時好驚,唔識得理鼠 b,過多一陣開始推鼠 b 埋身餵奶。
我係沙律生完第二隻時開始執籠,用匙羹將舊紙砂畢走,放新紙砂時用膠袋套住隻手先放,免得有我陣味會嚇親沙律搞到佢食鼠 b,就算鼠 b 爬左出黎我都無用手執,用返同一隻匙羹畢返鼠 b 入屋,以防鼠 b 個身多左我陣味,沙律以為有危險將我摸過既鼠 b 食左。
由今日開始我有排忙,日日睇住沙律同十鼠 b 真係好開心架!
題外話,朋友幫我搵動物傳心師問邊隻衰仔係搞大沙律個肚既真兇,原來唔係細囝,係成日扮晒懵既死肥懵呀!
傳心師同細囝傾時細囝發脾氣話 “做乜不停叫我做爸爸,咩係爸爸,做乜係度話我呀!”
同肥懵傾時死肥懵直認係佢經手…………
沙律就話生頭兩隻時好驚好驚,唔知發生咩事,無咁驚後知道要照顧鼠 b,所以開始餵奶。
傳心師話沙律有母性會照顧鼠 b,叫我唔使擔心,不過傳心師話佢以前養既鼠女生左 bb 後完全唔理,同鼠女傾時鼠女話 “係丫,我唔會理架,個刻開心左就得啦!”
到底經手鼠係邊個,真係要等出左毛先知!
任何人士未經本人同意不得轉載本人所發表之文章到任何媒體 (包括報章、雜誌及網站)
各位~~~我唔會介紹補習社或興趣班, 唔使 PM 問我呀, 我係唔會覆架~~~