痴線架,我明白好多人驚,但俾多少少理智,如果美國都會缺糧缺水的話,個世界都應該玩完。我呢度開水喉水都飲得,地震時廁所水箱水都可以飲,國安局指引一向都有,唔係因為今次疫情,有心搞事嘅傳媒誤導群眾,中文傳媒就好似唔識英文咁亂咁翻譯(我認為係有心),於是一傳十,十傳百,FB、Whatsapp、WeChat。。。全部瘋傳。
我星期日去幾間超市買嘢(包括Costco),小商店店主話星期六好似打到嚟咁,所有廁紙同樽裝水俾人掃晒,米、杯麵、雞蛋、罐頭甚至全架盡空。星期日Costco開門前已經好多人聚集等開門,我去果間係比平常星期日多人,但好彩秩序良好,冇人打尖,個個排隊入,但明顯我呢D華人面孔俾人眼超超。開門前職員宣佈因為星期六好多人買嘢,所以米同麵只剩番少量,但第二日就會有新貨到,叫在場人士唔好買太多,留番俾其他人。
我自己眼見,華人大部份都有買米,尤其是上咗年紀果班,其實50磅米有排食唔晒,見有買兩三包,除非屋企好多人,否則真係成年都唔駛買,驚出晒榖牛都未食得晒(可能未開袋已經唔食得)。廁紙同水就老外都買好多,有不少係六七八pack咁買,真係唔知用到幾時,問題係都要搵地方放。
有人問點解個個去Costco?我話貪佢可以退貨啩。其實咁樣搶買已經好肉酸,如果之後又大量退貨的話,華人唔俾人歧視都難,我已經見到好多不友善目光,雖則疫症不分種族,但自私行為真係非華人莫及。正常儲備為天災人禍做準備係正常,但過份囤積嘅行為不只係無知,更係自私。
花旗太太生活在花旗國,留意時差,你問我未必即時答到。