少年成長今日: 0|主題: 15864

收藏本版

回覆發帖

返回列表

跳至頁

查看: 28402 | 回覆: 2

問功課 [複製鏈接]

csir3290

子爵府

積分: 11022

1^#

發表於 23-10-15 11:05 |只看該作者 |倒序瀏覽 |打印

自從對仔女升咗中學之後，因為已經養成曬佢哋嘅溫習同埋做功課習慣，所以我同老婆都開始已經放手畀佢哋自己搞掂自己啲功課，亦都唔需要我哋幫手去溫習默書測驗，因為就算我哋想跟，但中學啲嘢深咗我哋都未必可以跟得到。但係間唔中佢兩姊弟如果遇到啲唔識嘅嘢都仲會嘗試問下我識唔識幫佢，但係講真家姐已經中三，好多我以前讀過嘅嘢我都唔記得咗，而且佢啲嘢亦都越嚟越深所以好多時其實都幫唔到佢。

我經常提醒自己雖然幫唔到，但係千祁唔好一句唔識就算啦，我自己都有個習慣，雖然唔識但係都會同佢一齊搵資料嘗試一齊做，睇下可唔可以解決到個問題。好似早兩日家姐如常喺度溫緊書，咁我行過就問佢溫緊乜嘢，原來佢話第二日化學科有個小測，佢正在喺度背緊「元素週期表」，佢問我知唔知係乜嘢，我就講返畀佢聽我以前讀中學嘅時候點樣背呢個元素週期表，講番我以前嘅經驗，因為佢老師叫佢嘅背法同我以前讀書時嘅背法都有啲唔同，佢仲問咗好多關於元素週期表嘅嘢，例如點解要咁擺位或者有咩意思咁，有啲我真係唔識同埋唔記得咗，所以我就上網搵返啲資料然之後同佢一齊講。又好似之後佢問我嗰啲關於地理嘅問題，最終我又係同佢一齊上網搵咗相關嘅資料解答咗佢嘅問題。雖然唔係次次都可以搵到答案，好似早前佢問咗我啲關於物理嘅問題，我真係已經唔記得曬，阿女自己亦都上網搵過資料都搵唔到，最終都係唯有請佢返去問老師，點知第二日返嚟佢同我講話原來問咗老師之後，發覺其實原來好簡單只要代返入公式就得。

我想講嘅係做家長當然唔係乜嘢都識，我哋唔係要能夠幫助到仔女解決所有嘅問題，但係其實我哋可以培養仔女自學嘅方法。有陣時我哋可能會遇到仔女問我哋問題，我哋真係唔識，呢個時候可能一句叫佢自己搵下資料或者番學校問老師就算數。其實仔女問得我哋，正正就係佢想求助嘅時候，如果只係一句唔識或者叫佢哋自己解決，到頭來佢解決唔到可能就會好似我哋咁放棄就算數，所以我成日都會記住提自己唔好一句唔識就算，其實係可以同佢一齊嘗試去解決或者搵方法，慢慢習以為常，仔女見到爸爸媽媽遇到問題嘅時候都唔會放棄而係搵方法去處理，佢哋自己都會學習到咁樣去做。另外，我覺得做家長都仲要保持住一個學習嘅心或者對事物好奇嘅心，好似有陣時我哋遇到有啲咩嘢唔明嘅嘢，或者唔識嘅嘢，都要喺仔女面前做畀佢哋睇點樣搵返個答案或者搵資料佢令自己了解多啲，當仔女見到父母都會咁樣去解決問題，咁當佢哋喺學習上面遇到唔識嘅地方，佢哋都會嘗試去解決。所以做家長真係唔需要乜嘢都識亦都唔好期望自己要懂得所有仔女問嘅嘢，反而係要保持住一個對事物好奇或者學習嘅心，咁樣仲可以潛移默化令到仔女都可以懂得點樣去搵答案，對仔女嘅影響可能仲大個父母樣樣都識，乜嘢都幫佢哋解決曬。所以我自己成日都提住自己唔可以一句唔識或者叫佢哋自己解決或者自己諗下就駛開佢哋，冇錯如果咁樣做可能會令父母慳返好多時間，亦都唔需要面對一啲自己冇興趣嘅嘢，但係咁樣做對仔女長遠產生嘅壞影響就可能比想像中嚴重好多。