梁健平主演短片
多倫多國際電影節得獎
綠葉王梁健平再唔係綠葉王，佢之前衝出香港，獲邀請參與韓劇《命中注定我愛你》演出，雖然係客串演出，但呢場戲係佢同韓星張赫嘅對手戲，到唔少網民都大讚。
最近，梁健平進軍電影圈，兼且做埋主角添！佢接拍一部英國導演執導，喺澳門取景嘅短篇電影《三輪車伕》(預告片： http://bit.ly/1r8pVFX )。喺戲中，梁健平飾演三輪車伕，意外地喺黑幫手中得到一個手提袋，佢原本以為係錢，但點知竟然係影響佢一生嘅嘢。
呢部《三》片榮獲2014多倫多國際電影節最佳短篇電影，梁健平今日喺電話中表示：「今朝知道呢個消息好開心，拍呢部電影對我嚟講好有得著，喺拍攝過程中，感受到外國團隊嘅認真，雖然呢部戲只係短短15分鐘，但我經常要香港澳門兩邊走，目的只係為排戲，導演要求我用唔同演繹方法去入戲，係我從影以來未試過，以前喺電視台拍嘢，一係叫你排兩次，一係埋位就拍；加上今次只有我係正職演員，其他都係業餘演員。」據知《三》片更將會參加康城影展。
Source: http://hk.apple.nextmedia.com/enews/realtime/20140813/52790959
發表於 
返回列表
