今次係我第一次寫油雞(遊記!)….因為呢個trip係我第一次自編自導自演嘅,所以想留份比較詳細嘅record,加上之前係bk搵左好多料,依家叫做share返出黎比其他人參考!
不過好長篇!如果覺得冇用可以唔睇….(哈哈!)
首先比d大約資料大家先 :-
旅行日數 – 6日5夜 (5月出發)
航空公司 – 星航 (ONLINE訂機票)
人物 – 一家三口 (兩大一小/4歲)
酒店 –LeadgolandHotel (官網訂), HardRock Hotel, Carlton City Hotel (呢兩間經booking.com訂)唱錢 – 渣打 (換左9,000港紙左右)
WIFI蛋 – CRXXYEGG (唔好租呢間………! 係MK…..頭兩日都收得好差!)
行程 :-
第一日 – 香港à
新加坡à hard rock hotel à S.E.A
朝早9點機,大約1點左右到星加坡,我想講下星航真係幾好, D位都叫做闊,雖然我得5尺5,但坐某d airline都幾辛苦!但今次坐星航覺得幾好!又乾淨!最緊要份飛機餐,好熱! 買機票時已經劃埋位同訂左餐,上機後幾個空姐分別問左我地幾次係咪咩先生/小姐,係咪訂左咩餐…服務好好!
講返正題, 我地攞到行李就搭的士去HARD ROCK酒店,車程大約半個鐘左右,完全冇塞車!車費好似幾十蚊港紙…
到左酒店check in時話要3:30先有房,咁我地搞完手續keep左行李就去食lunch,第一餐去左uss隔壁嘅馬來西亞街食,食完就去攞房,hard rock嘅房都幾大,我book左一張大床3個一齊瞓,最後我老公瞓左子母床,佢話舒服d!
第一個景點就係S.E.A.,未去之前我都估唔洗預太多時間,一來亞仔興趣不大,二來,我估睇極都係果D嘢,所以……去到兜左陣,覺得自己冇估錯,其實預兩粒鐘左右都夠,我地又HEA又影相咁,應該用左唔夠三個鐘….離開水族館就去左附近食晚飯,去左間日本餐廳,都OK好食,價錢都唔算貴…
第二日 – USS
係酒店食麵包做早餐,因為打算去酒店個沙灘泳池度玩,所以唔敢食太多….我地好鐘意個泳池,有沙玩又係泳池!我仔超開心!我地著左泳衣笠件衫係外面,拖鞋咁就落去,去到入口有毛巾借,講房號就得,不過唔好帶太多嘢落去,因為未必有吉嘅沙灘椅….同埋記得帶外套,因為借毛巾果度D冷氣好勁!
玩左幾粒鐘就返房沖涼換衫,跟住出發去USS,呢日嘅LUNCH又係賭場附近食,今次食左上海嘢,味道都OK,不過都貴貴地,我地3人食左差唔多500蚊…..
我幾鐘意呢個USS,因為夠細! (哈哈!)唔會好似去美國果個咁行都行死人! 同埋唔多人!好多嘢都係等5-10分鐘左右…不過鐘意玩機動遊戲嘅就可能覺得冇隱….因為唔算好多嘢玩….
其實都預左USS唔啱我仔,所以我地只係陪佢玩左D低能嘢,留左三個鐘左右就閃,同埋我兩公婆已經黎過,所以唔玩都冇咩所謂…
本身預左坐單軌車去VICOCITY食晚餐,點知勁多人排隊,咁我地冇等到,所以,最後都係附近食!
第三日 – HardRock à Leadgoland hotel à Legoland water park
BOOK左JASON車,約左9:30所以,一早8點幾就落去USS附近食早餐,其實唔係好多餐廳開左,冇選擇之下食左Toast Box….我覺得太貴又唔係好好食,係一個好普通嘅火腿芝士三文治烘底+兩隻生蛋+一杯熱飲,盛惠港幣4X蚊……
食完早餐行返酒店未夠9:30,司機已經WS我話到左門口,我地一出門口就見到個後生仔等緊我地….架車好乾淨/新淨,冷氣夠,JASON開價新幣90蚊一程(來回180),我覺得值得,好過一家三口又拖喼又拖仔咁去轉車再轉車…..
到關口左右司機哥哥就叫我地攞定PASSPORT出黎,過關時係唔洗落車的,兩邊關口都唔洗,全程大約一個鐘就到,可能早完全冇塞車!
到左LEGOLAND酒店就去CHECK-IN同買飛,之前有JM話係可以用新幣,但我可以話你知佢話唔收新幣…..只收馬幣或信用卡,佢話除左精品店收新幣,其他都唔收….我唯有比卡,因為諗住只STAY一晚都唔洗特登唱馬幣…
搞好手續買左飛KEEP好行李就向water park出發!我最期待水上樂園!因為我覺得亞仔會好開心!!(哈哈!!事實佢都真係最開心果日!!)
好喇,去到第一件事就係租LOCKER,由於佢地再一次話唔收新幣,我唯有去精品店夾硬買D嘢唱錢黎租LOCKER,我地租左個大SIZE,要40蚊馬幣,同埋係冇得攞返錢嘅!不過要讚下佢個system,因為全電腦化,次次開LOCKER係用佢個SYSTEM,而唔係比條KEY你圈係手果種!(哈哈,我比較大鄉里,所以唔知呢樣係咪全世界所有泳池都用緊!)不過個LOCKER又係關上幾秒就會自動LOCK埋,所以開左記得搵嘢頂住,如果唔係就要行黎行去開LOCKER~!
好喇,搞好晒嘢就入去玩,我自己冇帶毛巾,因為諗住租,但當日好熱好曬,我諗玩完上水都唔會凍,所以最後冇租了…..
有D人應該會覺得呢個水上樂園太細,不過對我黎講已經好夠,因為我仔仲細,太激果D根本唔啱佢玩….
呀!提提大家,如果有DD餓就好去食嘢,因為馬拉人出名慢,我地當日用左一個鐘左右排隊買嘢食!講緊大約係1X人排隊咋……同埋都係用馬幣嘅,食咩呢?都係炸魚薯條漢堡包果D,呢個PARK有兩個餐廳,我建議去近入口果個,因為另一個細D同埋有嘢遮蓋嘅位冇出面果個餐廳咁多….我地玩到3點幾左右就走,求其抹下身笠返件衫就去攞房!
間房比我想像細,不過其實都好夠大!(哈哈!)亞仔同老公都好開心,話間房好靚同係咁影相!
果晚我地去左LEGOLAND對面嘅蚊型商場食,食左西餐,因為有D已經關門大吉,唔太多選擇,不過間西餐都好食喎!仲肯收新幣添~!
第四日 –LEGOLAND PARK à Carlton City Hotel
當日嘅早餐係酒店食,選擇都幾多,不過味道就普通……食完之後就去KEEP行李,因為CHECK-OUT時間係10點….
搞掂後就去LEGOLAND玩,本身預左半日,所以約左JASON 4點接我地出返星加坡,當日落大雨所以好多嘢都冇開! 但我地好開心,因為好似包左場咁,周圍都冇咩人! 其實呢個景點都冇咩好講,因為都係機動遊戲果D嘢…加上之前已經黎過,有好多嘢冇再去睇….
玩到3點左右就返去酒店,因為我仔比較鐘意係LOBBY玩LEGO多D!點知司機WS問可唔可以早少少走,我地真係求之不得! 用左唔洗一粒鐘就去到CARLTON CITY, 司機哥哥仲沿途同我地傾計又介紹下酒店附近有咩好食…
到左酒店,間酒店睇落好新淨D人都幾nice, check-in都好快唔洗點等….上到去發現走廊比較窄,不過對我冇影響(哈哈) 入到房感覺好好,因為好新淨,張床都OK大,夠晒一家三口瞓….
當晚我地去JUMBO食晚飯,幾個月前ONLINE BOOK左,由酒店搭的士去,好似又係幾十蚊港紙,實際幾多唔記得! 我地去Riverside Point果間,本身要求坐入面,不過做唔到唯有坐出面,不過都可以接受,唔算好熱…..
食物都OK但比較重味,小朋友可能覺得咸左D….食完又係搭的士返酒店,之後去左酒店對面間超市行下買嘢食,間超市都算大,生果都幾多種類! 我地買左少少嘢做手信,因為前幾日都冇買過嘢…..
第五日 – 動物園à IMM OUTLET
果朝去左對面街嘅熟食中心食早餐,不過有部份都未開門,當時大約9點左右…..之後就搭的士去動物園! 呢度我要提一提,我之前有上網CHECK過所有地方點對點大約幾錢,我記得係CARLTON CITY搭去動物園係十五蚊左右,點知個標跳到十幾蚊果時見到附近完全唔似動物園,咁我覺得奇怪!又再CHECK下….
原來,我係熟食中心門口上車(即酒店對面街)真係貴多十蚊……………………………………最後要25蚊左右!
其實去得動物園就預左又熱又曬,不過曬起上黎真係想死!!所以我地只係留左兩三個鐘左右就閃….果日嘅午餐係動物園門口嘅KFC!點解食呢間?!因為只有呢度有冷氣…..其實餐廳”睇落”係全開放嘅…..
食完嘢我地又搭的士去IMMOUTLET,其實點解去呢,因為只係當一個”景點”咁去望下,當然果度都幾細,同埋冇咩好買,如果當佢係一個普通商場咁就冇咩所謂…跟住又係搭的士返酒店…..
休息左幾個鐘,我地搭MRT去左Raffles City食晚飯,由Carlton City搭MRT只係兩個站,而MRT就係酒店背面,即係酒店上落的士果個門口行落一條街就係……
當晚食左西餐,都幾好味又唔算貴,最緊要係唔洗等位同唔會趕你走,任你慢慢坐! 食完大約9點幾,商場好多鋪都關門大吉,所以都係搭MRT返酒店…..
第六日 – 牛車水à
香港
因為搭3點機,所以預左12點左右就去機場,咁我地一早8點幾就出發,搭MRT去牛車水(兩個站)食早餐同買手信….點知,出到去好多嘢都未開門!最後就上左熟食中心食嘢….好彩食完落黎,有好多都開門了….我地買左林志源,馮滿記,同D小食,肉骨茶湯料就走,因為果日好熱….但其實走果時都11點幾了….返到酒店執好嘢差唔多12點就落去check out,跟住就搭的士去機場,酒店搭去大約半個鐘左右,又係幾十蚊港紙左右! 去到機場第一件事係寄行李,因為要去買班蘭蛋糕~~當然係買好出名嘅BengawanSolo啦….今次除左蛋糕我仲買左曲奇做手信…..
好喇,全個旅程都記錄晒,希望有D資料會啱你地啦~!
發表於 
返回列表
