吹水玩樂

時事理財

由家出發

媽媽天地

育兒教養

情報分享

意見反饋

聯絡管理員

我的中心

Baby Kingdom - 親子王國香港討論區 › 首頁 › 親子旅遊› 峇里旅遊資訊分享

親子旅遊今日: 3|主題: 160890

收藏本版

發帖

返回列表

跳至頁

查看: 16593 | 回覆: 95

12 3 4 5

積分: 1007

1^#

發表於 15-9-7 16:13 |只看該作者 |倒序瀏覽 |打印

我最近開始寫緊一個有關峇里0既travel blog,
見呢度成日有姊妹問有關峇里0既資料
決定轉貼過黎同大家分享0下 :)

萬丈高樓平地起 - 我與峇里島的緣
係blogspot 開咗個blog 好耐, 但係一直都的唔起心肝開始寫
個心入面其實每日都有大堆有關峇里的人同事想分享
你可能會想問, 點解我會想開一個咁既blog / facebook page?

我係一個旅行怪, 從來去邊度都唔跟旅行團
我覺得無論去邊都好, 有時間就上網搵資料, 無時間就去Circle K買本閃令令旅遊書
你唔知足十成都起碼清楚七成知道自己去到果度大約可以點
但係峇里呢個地方, 我接觸後先發現市面上其實係無咩真係好好用既資料
大部份既旅遊書, 我懷疑寫果個都未去過
網上搵到既亦只係得台灣forum 又或者係用英文睇tripadvisor
要搵同聲同氣既好難

第一次去峇里, 我係抱住戰戰兢兢既心態去0既
事實上我未去之前, 我唔知道佢同泰國到底有咩分別 (除0左機票貴d , 搭耐d飛機同埋無泰國菜食之外...)
我亦記得我好大口氣地曾經同朋友講話「唓!!印尼有咩好去, 咪又係陽光與海灘! 你慌個太陽唔同樣咩.....」

結果去完之後, 我完全對呢個地方改觀
峇里無錯係有陽光與海灘
但係仲有更多比陽光與海灘吸引我既地方
就算佢既陽光與海灘, 係質感上亦令我未能忘懷

*脷伸 : 我***並唔係***陽光與海灘bikini 型

峇里令人唔'旅遊friendly'既地方, 在於公共交通工具未配合得好好
而逢星期二果d機票大特賣又好少有佢份
但係另一方面, 就係由於呢個原因
峇里仲有好多地方未被過份"污染"
講白dd, 即係你只要懂得選擇, 你仍然可以全程聽唔到廣東話, 又或者係"大媽less" 0既

旅行嘅嘢你懂的.....唔係歧視, 只係如果你係好想聽廣東話, 你就一早跟咗康泰, 唔係上網周圍搵資料啦...right?

係呢度, 我會分享我的遊記, 亦會分享一d我覺得好食好買好去既地方。老老實實, 大部份都唔係好typical 既地方, 而係我覺得好適合我口味要求嘅地方

好, 就趁今日係適逄印尼獨立日大喜, 就寫落第一篇, 希望我可以慢慢寫, 密密寫, 令呢度成為最齊全又最適合香港人既峇里Travel Blog :)

如需轉載請列明出處 - fb: withlovebali

0 0 0

私人傳訊

donki

大宅

積分: 1007

2^#

發表於 15-9-7 16:16 |只看該作者

本帖最後由 donki 於 15-9-7 16:17 編輯

去旅行前做好準備 - 基本資料篇

當你精神上已經放緊假, 但係肉體仲係公司嘅時候,先幻想吓自己攤咗係上面個bean bag啜緊椰青或啤啤ing

身為一個非常personal嘅旅遊資訊, 我決定由基本資料開始講起。之後再同大家慢慢由你想放一個點樣類型嘅假期, 而去慢慢研究。

同學們, 就當你對峇里完全無認識開始

老土dd, 先黎個fact sheet

機場

峇里個機場Code 係DPS, 正式個中文叫伍拉·賴國際機場, 英文係Ngurah Rai International airport. 不過老老實實, 我個腦容量有限, 唔係有google我都唔會記得佢全名, 大部份正常人類都暱稱佢為峇里機場又或者係Denpasar International Airport.

(冷知識衝動: 當你人在峇里, Denpasar呢個地方將會經常係你字典度出現。Denpasar中文係登巴薩, 發音類似「釘趴沙」, 源自荷蘭文, 即係市場咁解。屬於島上嘅舊區, 但係又相當熱鬧同埋相當local, 有少少深水埗crossover廟街之感。佢係峇里最大一個市, 舊名可能大家都聽過, 就係叫---巴東)

點去呢?

睇你咩筆直, 平有平去貴有貴去
你當然可以搭直航, 香港暫時有直航嘅有國泰(CX), 香港航空 (HK Airline唔係HK Express)同埋印尼加魯達航空(Garuda Airline)

時間上同埋舒適度上, 根據個人經驗, 國泰暫時係最好, 只係亦係最貴

轉折dd可以去新加玻 / 耶加達, 然後大把budget airline駁去峇里, 包括Jetstar或者係Airasia等等等.....

遲d再寫個詳細少少嘅機票攻略
天氣

相當怡人。

呵呵, 認真講, ok
峇里係赤道熱帶氣候, 簡單d黎講一年365日都係夏天, 分別只係熱d同埋無咁熱。
由於峇里其實同澳洲相當之接近, 所以會受澳洲大陸冷氣團影響, 係七月至九月氣溫更為怡人。

簡單d黎講, 當你係香港覺得好熱嘅時候, 峇里就係最涼爽之時,
日頭當然係好舒服, 夜晚可能要加件薄外套
如果大家係想潛水的話, 呢段時間可能有d凍添
相反黎講，當我地係香港過緊聖誕或者係新年，峇里就熱到熱力節拍wooboomba

之不過

峇里係有分濕季同乾季的
四月 ~ 十月係乾季
十一月 ~ 三月係濕季

所以如果係想去結婚 / 影pre-wedding / ~~你都係同我一樣係港女唔鐘意出汗的話~~, 六月 ~ 十月係最舒服 / 乾爽嘅
當然, 其餘日子亦唔太差

語言

印尼話 / 峇里話 --- 不過佢識我我唔識佢
由於峇里係一個相當極之受澳洲遊客嘅熱門旅遊地點, 所以英文係完全地通用嘅。
唔駛怕自己英文唔好, 大家唔係去靈格風做interview
基本上溝通係唔駛要擔心

如果你真係好想聽中文, 有部份地方係專門接待台灣 / 中國旅客嘅
入面會有中文menu / 識講中文嘅服務人員 / 大媽
但係老老實實, 我基本上係會有意識及無意識地避免去果d地方
唔係崇洋, 只係我想我嘅旅遊經驗*盡量*道地
同埋我發現自己放緊假時，忍耐力係比平日低
如果我聽到有熟悉嘅語言係我耳邊大叫，我係的確會嬲嘅
重申多次，絕對係個人口味
正如我識好多人去歐洲淨係食中菜, 有d人會幾唔慣都會盡量試吓當地食物
最緊要自己高興

宗教

印尼係回教國家, 但係峇里出奇地有極多印度教徒
所以.......峇里係有豬肉食嘅!!!!!! (例如係最出名嘅峇里烤豬Babi Guling)

你會見到好多印度教嘅寺廟, 入去之前係門口要借佢條公用沙龍布(Sarong)包住下半身以示尊重
男同女都唔例外

亦由於果D公用沙龍布都頗recycle吓，
如果各位女性有舖購物癮，去到海島國家就好想好tropical地買條沙龍布嘅朋友
係買就去寺廟參觀前買
咁就唔駛同他人共用針筒沙龍

你會係街見到好多咁嘅花籃仔係地下

唔好踏落去 / 貪得意拎黎玩, 呢個係佢地用黎供神用嘅供品
Nothing scary, 只係專重別人宗教而已。

By the way, 賣仔莫摸頭....唔係，係當地文化你摸人個頭係唔禮貌架 (雖然我唔知到底咩人會去旅行時得閒無事就摸人個頭.....)
貨幣

印尼盾, 又名Rupiah / Rp./ 盧比 / 盧布
最近匯率好浮動, 答你唔到咩先叫好價, 淨係知道最近好好價, 因為亞洲貨幣特別係盾跌得好勁

好想知道的話可以去yahoo度查吓
[url=https://hk.finance.yahoo.com/currencies/converter/#from=HKD;to=IDR;amt=1https://hk.finance.yahoo.com/currencies/converter/#from=HKD;to=IDR;amt=1]Yahoo 貨幣轉換器[/url]

印尼盾個面額好大, 食餐飯都閒閒地一百幾十萬
對於數學奇差嘅人例如我, 請自行係手機下載匯率計算機再行出發
Apps Store大把選擇, 仲要係免費app
否則你日日都覺得自己似玩緊大富翁

之前好多係峇里嘅旅遊服務另如係local tour / SPA / 酒店都會用美金報價比你
但係上個月開始印尼實行新措施，要所有報價都以Rp. 黎做報價
因為印尼政府希望本土貨幣唔好再比美金影響

講就咁講，好多地方仍然用緊美金報價

至於邊度唱錢，其實成街都係找換店
得閒再講邊間好dd
總之機場唱錢一定個rate係最差

機場有ATM, 而街上亦開始越黎越多銀聯ATM
其實用銀聯個Rate都唔錯, 手續費亦唔貴

簽證

如果你特區護照持有人，恭喜你，你係免簽證嘅。
落機後你會見到海關counter中間仲有個counter, 有兩條長長嘅人龍，寫住"Visa on Arrival"
請你盡快跑過呢條人龍，直接行去海關度排隊
~~如果你係BNO持有人，請預備USD$35, 係Visa on Arrival條隊慢慢等比錢~~
比完錢，先可以排海關隊
Updates: 2015年6月12日開始, 英國護照都有30日免簽證

過關時間極度視乎個人運氣
由於峇里最大嘅遊客來源袋鼠國係需要比錢做visa on arrival 嘅
同堆佢地航線往來峇里極多
遇著幾班機同時間到，我試過排咗個半鐘都未到我 (當然包括我第一次去傻更更唔知道特區護照唔駛排visa on arrival)
但係亦試過好好彩，落機衝去海關拎行李過X-Ray去埋廁所都唔駛20分鐘

題外話: 以前離開峇里前，人地會叫你預留Rp.20,000交離境稅，不過自2015年頭開始，航空公司已經將離境稅放入機票價錢入面，以後就可以煩少一樣。

電壓

同香港一樣220V, 唔駛怕唔同電壓燒風筒
不過插頭係歐式兩腳圓頭

即係咁樣, 明白啦?

治安

我個人認為治安其實相當良好
不過你去任何地方都一樣, 夜晚盡量唔好自己一個太黑太靜嘅地方, 去到酒吧唔好亂飲陌生人嘅飲品, 財不可露眼....等等等等

起碼我去深圳 / 歐洲驚比人老笠嘅恐懼大過峇里好多

世界咁大, 度度都有壞人有好人
事事小心就咩事都無

不過無論點都好，出門旅行記得買旅遊保險。特別係最近發生過好幾次因為印尼火山爆發而導致峇里機場關閉，你有買旅遊保險的話就算有delay都無咁嬲嬲豬

好, 就寫到呢度先!!! :D

如需轉載請列明出處 - fb with love, Bali

私人傳訊

donki

大宅

積分: 1007

3^#

發表於 15-9-7 16:20 |只看該作者

去旅行前做好準備 - 超詳盡機票入手攻略

出門旅遊，唔係話要一蚊一毫都計住晒，
只係如果自己「被水魚」，駛貴咗條氣就唔係好順。
去得峇里，通常筆直都預得高少少，但係都希望自己係響市場價之內

買機票去峇里，絕對係成個過程最天人交戰嘅思想過程之一
(當然如果你係駛黎駛去都係面頭果浸，平時去邊都係坐business class, fanfare / 廉航對你黎講係一個好陌生嘅concept, 請自動跳過呢篇)

點解天人交戰呢? 最主要原因係機－票－貴－!!

機票貴呢個問題係相對嘅

本身以性價比嘅角度出發，峇里係要坐成五個鐘飛機，搭多幾個字飛機就可以去到澳洲咁滯 (我知係誇張d, 但係Darwin得喇啩?)
對於未深入認識峇里嘅同學，會認為峇里同布吉 / 芭提亞等等係差唔多嘅地方

當泰國 / 台灣 / 日本機票長期做緊一千幾百蚊來回連稅之時
你同我講去峇里基本價要四千幾蚊!?

無錯，直航去峇里嘅「膽價」的確係四千幾，旺季更貴 (最近CX唔知痴咗邊條線，搵親要上到五千添)

所以，我第一個結論係: 直航如果你見到低過四千蚊，時間又就到你，唔好諗喇，買啦。

香港去峇里直航，暫時只有國泰，香港航空(唔係HK Express)同埋印尼~~加魯蛋~~加魯達航空

以價錢去做比較, CX > HK Airline > Garuda

舒適度黎講，坐得Y Class就預得都唔太舒適, 只係我經常覺得Hong Kong Airline張櫈同我背
脊個八字唔係太夾, CX就有感情dd
Garuda我未坐過，黎緊九月底會試，但係聽聞唔太差嘅
部份Garuda航班係同Hong Kong Airline聯營，所以有時book Garuda都只會坐番HK Airline

另外CX飛峇里係舊款機，商務位並唔係瞓底魚骨果隻，係似舒服少少嘅豪華大巴

由於小寶寶要成日去峇里扮牛郎織女 (詳情請見萬丈高樓平地起 - 我與峇里島的緣)
加上工作關係需要飛，所以好好彩儲落少少Asia Miles
再一次用性價比嘅角度，如果你有足夠飛行里數，用里數換峇里機票係好抵嘅

試舉例:
香港 - 台北 Round Trip = 15,000 points (飛行時間1hr 31 min)
香港 - 曼谷 Round Trip = 20,000 points (飛行時間2hr 38 min)
香港 - 峇里 Round Trip = 30,000 points(飛行時間4hr 43 min)
香港 - 新加坡 Round Trip = 30,000 points (飛行時間3hr 42 min)

當你無論去台北曼谷新加坡都好輕易搵到好多airline offer緊千幾蚊來回價嘅時候，你係咪覺得駛呢三萬分去峇里好抵呢? 仲要搭最長時間喎!

我都知用里數換機票又係一場同自己運氣對賭嘅行為，所以如果大家里數鬆動的話，建議大家試換Business class
暫時里數係50,000分，唔算太誇張之餘，得到waiting list 嘅機會大好多，而且自己又舒服d (特別係打算去結婚 / 影pre wedding嘅幸福人)

至於Garuda, 係正常情況下直航來回大概係三千到尾
我試過時運高之際見到連稅二千到尾，不過你時運需要頗高，~~同埋唔好同我爭~~

至於時間上黎講，CX 嘅時間最好
去程係朝早十點幾，去到峇里放低行李食晚飯道啱啱好
又未至於你要太早去機場

回程就一係下午四點幾，一係就港龍下午六點幾
食完lunch慢慢去機場，番到香港 / 屋企時間亦唔太夜，第二日仍然可以正常番工

Hong Kong Airline 就去程中午或夜晚六點，去到峇里的話係夜晚七點或凌晨
夜晚七點到得機場，你到酒店最快都九點，仲要睇你住邊
之後再食飯對於我黎講太夜喇
至於凌晨先到果班機 - well...唔係我杯茶，小寶寶習慣早睡早起 xDDDDDD

回程一係中午一點一係下午六點
中午一點即係食完早餐就要去機場
下午六點果班時間ok

不過香港航空delay 嘅機會亦頗高，所以最好再預多少少時間buffer

Garuda Airline 去程下午三點幾，去到差唔多九點，時間又係差
回程係朝早九點九，即係未天光就要去機場
時間實在差得緊要
如果唔係因為我窮機票價錢具競爭力，我唔會搭佢

如果想終極窮遊買峇里機票有無辦法？係有嘅
你可以買一張fanfare類平到喊機票去新加坡 / 馬來西亞 / 耶加達 / 甚至台北
你就可以從Tiger Airline / Scoot / AirAsia / 一眾由耶加達飛嘅而個名對我黎講又好陌生嘅domestic airline飛去峇里
不過當然你要夾個transit time夾得好好
因為你一來唔想transit time太耐，但係又要預防delay你會唔夠時間，再加上要夾一個最平嘅價錢
呢種咁具藝術性嘅精算Matrix, 我~~番工一得閒就會~~成日不斷地運算
最抵嘅combination暫時係新加坡+Airasia
如果大家搵到更好嘅combination, 記得要開心些牙!

好，機票攪掂，NEXT!!!!

如需轉載請列明出處 - fb: With Love, Bali

私人傳訊

donki

大宅

積分: 1007

4^#

發表於 15-9-7 16:24 |只看該作者

去旅行前做好準備 - 女性專用To Pack List
係咪已經有一種如箭在弦，不得不發嘅感覺呢?
大家係未出發之前，不如先研究一下去峇里玩到底要pack咩啦!

我呢篇並唔係上網copy 嘅"What to pack for holiday" 罐頭文章，所以要pack咩係完全根據我個人經驗與日常生活習慣，可能適合你，亦可能唔適合你；請大家根據個人口味再作加減。

基本事項

護照
機票 / 電子機票
酒店資料 (含酒店電話及地址)
機場Pick Up 聯絡人資料 (or 你可能自行決定搭的士)
Support到你當地上網 / 聯絡嘅方法 (可以係你用香港roaming / 係香港買定東南亞上網卡 / wifi蛋 / 買定當地電話上網卡 - 廣告時段, 遲吓我有得賣)
國際車牌 - 峇里租車 / 綿羊仔好common, 如果有呢個打算，就算係租綿羊仔都必須要帶國際牌! 唔係怕佢唔租比你，只係怕你比交警截到罰錢罰死你 - 同埋touchwood 有咩事，無國際牌保險唔會賠
旅遊保險
錢 - 可以係香港唱定美金, 如果唔係特區護照，記得唱定35蚊美金做落地簽證

行李硬件

有密碼鎖嘅行李篋
(題外話: 我去大部份國家特別係東南亞地區，我多數都會用無細袋係出面嘅硬篋；原因係以前有聽講過有人被不法份子嫁禍, 係你唔留意時'sip' d 嘢係你行李嘅無上鎖位置。唔係話峇里治安唔好，只係呢種事仍然有可能發生。為保安全，請盡量保持行李跟身或用硬篋，如果有無法上鎖嘅細袋，係行李帶拎完行李後，請慣性拉開d細袋檢查一下)
你出街會拎嘅手袋 - 建議千祈唔好拎皮袋，越輕便越好。唔係驚乜，只係你如果拎個名牌靚手袋去，其實同峇里個feel 格格不入；同埋你個人好熱又出汗時，你係唔會想掂到皮袋der~
再細少少嘅袋，in case你去游水 / 沙灘 / 落車參觀一陣, 夠放你必須要跟身嘅就夠
除非你心目中有target特別要買某樣嘢，又或許你對峇里木雕 / 傢俱擺設好有興趣，否則唔駛番太多位放戰利品

衣著

輕便為主，海島國家你懂的 (即係你成日係H&M見到果d飄飄吓你覺得好靚但係又唔知係香港可以著去邊果d)
大部份係街上嘅女性都係入面bikini外面就套件鬆鬆嘅沙灘裝 (並唔係只係出現係沙灘) (見下圖)
有時你會係街上見到不少外藉女性相當豪放，淨係著住bikini周街走 --- 你可能都好想解放一下，不過請留意，峇里其實係一個印度教 / 回教地方，著得太暴露其實唔太尊重
拖鞋 / 涼鞋 - 當地人甚至連波鞋都好少著，你好少見到有人著密頭鞋
你可以係一對人字拖+一對靚少少嘅涼鞋 / 平底鞋作為基礎
長袖淺色鬆身裇衫 - 有時太陽真係太曬時要黎擋一擋，特別係去參觀景點時，否則再多防曬都好易燒焦
太陽帽
太陽眼鏡
泳衣 / 泳鏡 (就算你唔打算 / 唔識游水都建議你帶泳衣, 因為你去到酒店泳池，就算你唔識游水，你會好難抗拒自己唔落去浸吓, 同埋唔駛擔心身材唔好，果度你會發現大量體積比你大1.5倍嘅外藉遊客都好開心地bikini周圍走，比d信心自己, who cares?)
短褲係主流，但由於峇里都好多非常之高級而價錢CP值高嘅餐廳，如果你有打算去試，可以pack一兩條靚少少嘅裙；right dress for the right occasion

打扮

長頭髮嘅你記得帶橡筋扎頭髮
峇里係並唔適合化濃妝嘅地方，自然清淡就very good, 千祈唔好太厚粉
如果你本身係走珠光寶氣路線，盡量將身上嘅非洲之星留係香港，番黎先戴啦。再一次唔係治安問題，只係一黎同個海島feel唔夾，二黎你可能會去做Spa / 游水之類，穿穿戴戴會好易唔見

為了靚靚

牙膏牙刷洗面沖涼果d基本嘢你識架喇，按個人需要同埋你住嘅酒店有無供應
HOWEVER, 我強烈建議長頭髮嘅女同學帶一小支用開又夠潤嘅護髮素。首先如果你會係沙灘游水，海水嘅鹽份會令你頭髮好乾；再來係印尼水質偏硬，你洗頭時會發現比較鞋起泡，同埋酒店大部份嘅護髮素都唔會夠潤!!! (當然你唔想帶的話，你可以去salon做當地好popular嘅cream bath, 做完頭髮馬上還回靚靚)
防曬 - 如果唔記得帶唔係唔可以買，只係峇里買防曬都頗貴，同埋你無用開未必習慣
蘆薈gel - 唔小心曬親可以即晚急救，我上次係沙灘玩水防曬擦得唔even, 最後夜晚發現身上部份位置曬傷咗。即晚厚敷Natural Republic 蘆薈gel，幾日後無事!

女仔嘢

媽媽巾 / 綿條 (如果打算落水) - 記得出發前check清楚生理期
多帶幾套內衣褲替換
由於你嘅衣著會比較鬆，帶d bra帶露出都好好睇嘅bra

其他

蚊怕水!!!!!!!!!!!!!!!!!!
電話charge線 - 峇里唔興iphone , 佢地興用blackberry, 所以如果你唔記得帶電線之類會煩d。唔會買唔到，只係好煩，同埋酒店唔一定有得借
插頭轉插 (兩頭圓歐式)
平安藥, 特別係頭痛藥 - 我當地朋友話連佢地都覺得當地嘅必理痛無咁止痛
濕紙巾
吉膠袋放污糟衫 / 去沙灘游水後放濕咗嘅泳衣 (當地買嘢嘅膠袋quality好差，又或者係我過份粗暴)

暫時就係諗到咁多

如需轉載請列明出處- FB: With Love, Bali

私人傳訊

donki

大宅

積分: 1007

5^#

發表於 15-9-7 16:26 |只看該作者

本帖最後由 donki 於 15-9-7 16:27 編輯

去旅行前做好準備 - 峇里機場 / 交通消息

歡迎各位同學抵達峇里國際機場

係之前嘅基本資料篇入面有講過關於入境等等好基本嘅資料 (原文連結: 去旅行前做好準備 - 基本資料篇)

當你到達機場，又過埋海關後，點算呢?

好，我相信你暫時只會擔心幾樣嘢，首先嘅係

有乜嘢會令你心花怒放？

錢！

係你過完海關，望住行李輸送帶嘅右手邊，你將會發現ATM機乙個。當然係機場入面仲有有幾間找換店，不過to be honest果幾間你唔好預佢個rate會好。

打卡呃Like

你可能已經開咗roaming / 係香港買咗電訊商嘅東南亞data Sim / 係香港租咗wifi 蛋 / 幫襯末來的我買咗當地電話上網卡 (無錯，我在此承認我的確打算係將來順便做埋呢類型小買賣！我係賣廣告呀~呵呵)

假設以前任何一項都無你份，而你打算唔駛上網 / 淨係番酒店先用wifi / 遲吓自己係街度自己買sim card等等等等....唔緊要，因為峇里機場係有免費wifi嘅，仲要基本上一落機已經connect到，訊號仲要相當之唔差添！

老老實實，我一直都對機場wifi有偏見，甚至發現越發達嘅地方，機場wifi就越差添！峇里機場入而嘅wifi訊號實在係令人喜出望外。

係排海關嘅同時，就可以補番之前成五個鐘無得上網嘅痛苦。

熱情嘅陌生人

拎完行李後，你仲要排隊過X-Ray，基本上都無乜特別事會發生。但係你可能由拎到行李到你成功上你選擇嘅交通工具前，有人會好似好熱情地幫你拎行李。

各位同學，將心比己，你都唔會為興趣係機場不斷幫人拎行李嘅。所以你只要禮貌地拒絕就得架喇，佢地亦會知難而退。

記住，人地都係搵兩餐，微笑話唔駛就得，唔需要惡，一黎無咁嘅必要，二黎你亦唔會想用惡黎開始呢個咁relax嘅旅程

車車車車車

你由峇里去酒店有以下幾種方法

1. 你有朋友黎接你, well, fine

2. 酒店派車黎接你 - 好多酒店都會提供呢個服務，其實我幾建議你咁做，特別如果你抵達時間比較夜的話

3. 你book 咗車黎接你 - 理念上同Point 1係相同嘅，我係未來嘅日子亦有考慮過可能會提供咁服務 / 幫你搵司機，不過當然你亦可以自行搵司機黎接你。

4. 的士

機場外面有的士Counter, 可以幫你正式地叫到的士。佢有列明價錢去邊度大約幾多錢，但係要留意佢夜晚係會close 嘅，所以如果凌晨先到，都係book定車黎接你好

機場的士收費表如下：

而係正常無塞車嘅情況下 (例如係你時運奇高嘅情況下), 一般黎講你去以下地方係需要以下時間

Tuban: 10 分鐘
Kuta: 10 – 15 分鐘
Legian: 20 – 30 分鐘
Seminyak: 20 – 40 分鐘
Canggu: 35 – 50 分鐘
Sanur: 30 分鐘
Jimbaran: 15 – 30 分鐘
Uluwatu: 30 – 45 分鐘
Candidasa: 1.5 – 2.5小時
Denpasar: 35 – 40 分鐘
Nusa Dua: 20 – 30 分鐘
Tanjung Benoa: 30 – 40 分鐘
Ubud: 1.5 – 2小時
Padang Bai: 1.5小時

你亦可以選擇行出機場，自行截街上嘅的士 (不過你一定係好熟峇里，亦無可能仲睇緊我呢個blog)

記住，峇里的士要搭Blue Bird! 車身好易認，藍色有隻雀咁，佢地係大公司經營，會跟meter收費

你係拎完行李一出機場，你會發現你會被大量熱情的陌生人包圍。佢地全部都係司機，如果你未諗到接送，佢地會主動offer接送你到酒店，甚至你全個旅程嘅接送；如果你話你等緊人黎接，佢亦會好熱情地同你講，如果你朋友臨時同你反目而放你飛機 (我真係試過個司機咁同我講)，你可以選擇吓佢。

峇里的確係一個非常熱情同埋友善嘅地方，不過機場果班司機叔叔嘅熱情係更之為甚，熱情到你幾乎懷疑佢打算請你番佢屋企食飯，同埋馬上契個仔比你咁滯...........不過人地都係搵兩餐啫

佢地的確係正常嘅司機，只係價錢會比出面貴少少；如果你有牙力又有興趣，可以試吓同佢地講價；事實上價錢亦唔係貴到一個太過離譜嘅情況。

如需轉載請列明出處 - FB: With Love, Bali

私人傳訊

donki

大宅

積分: 1007

6^#

發表於 15-9-7 16:31 |只看該作者

本帖最後由 donki 於 15-9-7 16:32 編輯

去峇里+++不該+++做的事 - 逆向思考式旅遊小建議

如果要講「去峇里應該做的事」，上網大把類似文章，
同埋峇里可以做嘅事實在太多太多，完全取決個人style

HOWEVER

各位同學，我地今日不如一齊黎玩一個逆向思考嘅小遊戲
分享一下純粹以本人角度出發，我認為去峇里+++不該+++又或者係應該避免做嘅事

講價

去東南亞國家嘅街邊檔，買嘢講價是常識吧？

無錯，你啱

之但係只係適合遊客區小攤販，大部份開得「事事正正」舖頭都無呢支歌仔唱
峇里亦有d 小攤販 / 賣手信點係公價購物嘅，果啲地方亦無需要講價
（呢個topic遲下得閒再另文開心些牙)

但係需要避免嘅係，有種人以講價為樂，純粹測試個人議價能力。如果你唔係有幫襯，唔好同人講價講成半個鐘；一黎浪費你青春，二黎亦幾無禮貌。

低頭族

我知道無得上網係好辛苦，我都係其中之一。但係你飛咗５個鐘，黎到呢個水清沙幼嘅眾神之國；一望無際嘅印度洋；加上廣闊青翠嘅稻田，感受吓陣陣涼風同埋青草嘅香味...........................................你唔係仲玩緊whatsapp同facebook呀!?

香港人，我地好難係香港感受到呢種清新，趁機會好好盡情享受
我明白上網係好重要，可能我地係潛意識亦怕咗呢種優質慢生活添

不過我係呢度由衷地建議您
停一停，深呼吸，好好享受吓呢種奢侈嘅平淡
同你同行嘅同伴好好享受呢種Quality Time

施主，放下手機啦

抬頭族

峇里嘅建築物唔高，但係好有特色
我聽當地朋友話佢地建築物嘅例係唔可以高過當地嘅椰子樹，唔知係真唔係
你好入神地周圍望，見到好多吊到好高嘅嘢唔知係乜黎呢?
嘩!!!! 你睇吓果邊仲有風箏添!!!!!

小心!!

享受峇里風光嘅同時，亦請小心行路
唔知點解峇里路上經常出現神秘嘅窿 / 空隙 / 高低不平~~其實行人路都頗溶溶爛爛~~
一下唔小心扭親就咩mood都無
到時就真係不該

急急如律令

我成日覺得香港地鐵係好代表香港精神，咩都好急好快
我估係我地先咁鐘意參加果d歐洲7日十國團
呢個亦係我地香港人嘅優勢，所以效率至咁高

但係come on baby, 你宜家係放假
因為你平日嘅工作已經急到你就黎要食降血壓藥
你黎峇里，唔係為challenge佢地嘅生活節奏到底慢你幾多而黎
而係想抖吓，relax 吓，比條生路自己行吓

峇里實在係一個慢生活嘅地方
佢地好友善，好開心，好take it easy慢慢黎

你可能會係服務上遇到比較慢嘅反應，可能你會好炆憎
唔明點解你唔係一坐低兩秒內已經有餐牌，幫你斟好水問你 'Would you like something to drink?"
Take it easy, 唔好咁緊張
慢慢來，坐低抖一抖，望吓身邊嘅人，享受一下身邊嘅環境
呢個係你黎峇里嘅主要目的
亦係令人覺得呢個地方值得你黎嘅主要原因

淨係留係Kuta

如果你對峇里有少少認識，你應該會知道Kuta (庫塔)呢個地方
又或者係你睇過少少資料，你一定會見到呢個名

呢個係峇里南部最熱鬧嘅地方，有酒店有resort有商場有小販有沙灘有酒吧
咩都有

好多人酒店都會住Kuta，因為峉里嘅交通唔算方便，如果打算全部用腳黎行走，Kuta係一個相當方便嘅地方

Kuta係某程度上，就好似旺角一樣

如果你全程都只係留係Kuta，我估你對峇里嘅印象會係麻麻地，甚至你未必會好知道到底峉里同布吉有咩分別，因為你只會見到好多好多嘅人，同埋好多好多嘅人

其實峇里係一個好多嘅地方，就算係近南部，你只要去Seminyak果邊行一行，感覺都唔同晒，沙灘仲要少人d

又或者係Ubud (烏布), 又係同Kuta另一種完全不一樣嘅體驗

我愛Indomie

去旅行，緊係食local food啦
人一世物一世，點都要試足旅遊書上面寫嘅一切!

無錯,去旅行食當地食物的確好重要
但係唔一定要跟足旅遊書上面咁食
好多時果d所謂嘅 ’熱門食店’其實都.......幾難食

你旅遊嘅目的唔係跟住本旅遊書玩check point
其實行到邊食到邊，見到當地多人幫襯嘅又可以入去試吓
當地有好多小餐廳(佢地叫warungs)，你話唔定會得到更多不一樣嘅體驗

其實我唔覺得太多香港人鐘意食印尼餐
純粹我個人口味，其實同我口味唔多夾
食黎為體驗係ok 嘅，但係你問我係咪好想日日食，其實又未必係

係峇里由於太多澳洲遊客
其實佢地有大量優質西餐廳 / 意大利餐
性價比超級高
我絕對推薦大家去嘆吓
正式係蔗渣價錢，燒鵝味道

香港咁嘅價錢想要咁嘅質素，你諗都唔駛諗

如需轉載請列明出處: withlovebali.blogspot.hk

私人傳訊

donki

大宅

積分: 1007

7^#

發表於 15-9-7 16:33 |只看該作者

萬惡的金錢 - 簡易印尼盾辨認大法 ++數學白痴專用編++
出門在外，錢係一件相當緊要的事。

印尼盾身為世上幣值最細，而面額最大嘅貨幣之一；食餐飯一百幾十萬上落絕對係等閒事。
我相信不少數口精嘅同學們，幾多印尼盾對幾多港幣，絕對可以馬上就如神探加利略般計到「哦~~~~呢餐飯300幾萬咪即係港紙千八蚊度~~」

但係好不幸地，上天亦係同時間製造咗一批，當數學神童係度計緊兌換率時，眼神完全渙散嘅一群天真無邪的小朋友

我就係其中一個

所以各位數學白痴嘅同學們，我地又黎上另外一課，就係如何在峇里使用現金溝通與消費。

前言

去峇里 / 印尼 / 呢類郁啲就一百幾十萬嘅地方，我絕對建議大家盡量用credit card - 一黎個rate其實唔太差，二黎你起碼唔駛袋咁多錢係身。基本上只係需要用現金搭吓的士、係小店買少少嘢，又或者係local shop食餐便飯時用

如果你飛得多，申請d 海外簽脹換多d里數嘅credit card亦好抵

同時亦建議大家係手機先行下載貨幣轉換計數機，呢個先係最可能比到個實數你

我以下嘅教學，只可以比你係短時間又唔需要用計數機嘅情況下，大概知道幾多錢
並不適用於要求「哦~ 根據我係xxx用最好rate加免手續換嘅Rp., 呢餐飯一共係$381.2」嘅精算類同學

Come on babe，我地開始入正題啦

我事實上只係得兩招，第一招係大家先黎一齊認識吓印尼盾係咩樣

明喇吓?

個 - 十 - 百 - 千 - 萬 - 十萬：無錯，張張都4-5個零

最大面額嘅紙幣係十萬蚊，但係其實都係講緊大約50幾60蚊港紙
所以如果你今晚打算食餐好少少嘅飯又打算比現金
你會覺得自己一黎覺得自己似賭聖 / 玩緊大富翁，二黎個銀包就黎撐到爛
何苦呢？

通常我現金都係留番黎比小費用

第二招

通常係我聽到價錢後，我有需要大概知道到底佢地係講緊幾錢

純粹同大家分享一下我個思考邏輯，特別係你聽到英文價錢，大家往往好難係個腦馬上convert得到

基本上，我個邏輯係「減三個零再除2再添少少」就係港幣價錢

因為其實你無論做咩，都起碼過萬蚊印尼盾起跳

所以，如果有人話你知例如係"32 Thousand" (即係3萬2)，第一時間我就會減三個零，即係唔駛理"Thousand"呢個字，淨係當佢係"32"；之後再除二再添少少 (即係大約60%左右)，即係16-19蚊港紙左右。
圖解: 30,000 = 30,~~000~~ = 30 x 60% = 18

驗證：

根據我個人認為嘅滙率常數係 Rp. 1650 = HK$ 1, 咁即係HKD$19.39
根據2015年8月25日呢幾日亞洲全線幣值下跌嘅滙率，Rp. 1817 = HK $1，即係HKD17.6

爭唔遠丫

如果個價錢係'3 Million', 咁個計法都一樣
先減三個零，3 Million馬上即係變成3 Thousand
再用除二添少少(60%)嘅原則，即係3000蚊嘅60%, 即係1600 - 1800蚊左右
圖解: 3,000,000 = 3,000,~~000~~ = 3,000 x 60% = 1800

At the end of the day, 請各位同學仍然都係拎出你嘅滙率換轉Apps, 計算一下最終最準確嘅數字

嘩吓，寫完呢篇之後，我自己都好surprise身為絕對數學白痴嘅我竟然有朝一日會教人點計數............

如需轉載請列明出處

私人傳訊

donki

大宅

積分: 1007

8^#

發表於 15-9-7 16:34 |只看該作者

去旅行前做好準備 - Uber Bali

相信交通會係各位同學去峇里遇上最大嘅問題
係上幾篇嘅交通消息入面，有簡單提及係機場同埋平時搭的士時應注意事項去旅行前做好準備 - 峇里機場 / 交通消息

好多朋友都會選擇係峇里包車，特別係如果當日打算去Ubud一日遊之類
之但係如果你純粹只係想係市區 (例如係Kuta好，Seminyak又好) 搭的士
除咗要金睛火眼地搵街上嘅藍雀仔的士 (Blue Bird )，又或者係扎行晒馬準備同的其他士司機講價之外，仲有無其他文明少少嘅方法呢？

有，就係全能的Uber

如果有曱甴嘅地方就有黑旋風
有相對比較多害群之馬的士司機嘅地方就有Uber (我唔想用無良，始終我仍然遇上不少善良又守規舉又對我好好嘅的士司機)

前陣子佢曾經係峇里機場出過一則廣告，不過可能因為「壞人衣食」嘅關係，好快就消失咗

廣告入面列出優惠如下

- 峇里機場到Kuta Rp. 19,000
- 峇里機場到Ubud Rp. 103,000
- Kuta 嘅 Beachwalk shopping Center去Canggu Echo Beach 就係Rp. 45,000

用Promo code NGURAHRAI 可以得到Rp. 100,000嘅迎新優惠

唔知道仲係咪Valid 吓，如果係的話，抵到震

截至2015年8月底, Uber上客地方包括

Canggu
Kerobokan
Seminyak
Legian
Kuta
Tuban
Sanur
Denpasar
Nusa Dua
Jimbaran

各位同學請留意，Ubud係暫時無包括在內嘅

至於收費方面，根據Uber網站顯示，基本起標係Rp. 7,000, 加每分鐘Rp. 400 又或早係每公里Rp. 2,200
最底消費係Rp. 7,000
取消係Rp. 10,000

換轉港紙比個概念大家
如果根據今日 (31 / 8 / 2015) 嘅匯率
起標收費係$3.86 (4蚊唔到) + 每公里 HKD$1,21 / 每分鐘 HKD$0.22

非 - 常 - 抵!!!!!

不過，我平時係可以選擇嘅情況下，我仍然樂意用番當地司機包車
由於係大家搵食其實真係唔容易
大部份司機咁aggressive, 都係因為黃口無飽兒，屋企有一家大細等佢養
如果你認識到個司機係好嘅，令佢有錢賺得黎又唔駛比呢d大企業抽乾佢地
都係功德一件

暫時未知道Uber係當地會唔會受到如同香港一般嘅對待
不過永遠多個選擇都係好事來的

Uber網址: https://www.uber.com/zh-TW/cities/bali

如需轉載請列明出處 - With Love, Bali

私人傳訊

donki

大宅

積分: 1007

9^#

發表於 15-9-7 16:37 |只看該作者

呼....post 住咁多先, 如果sis有興趣我先再post過黎 :D

私人傳訊

bylobb

象牙宮

積分: 220253

hashtag影視迷勳章畀面勳章環保接龍勳章大廚勳章 BK猜猜猜慶中秋 BK Milk勳章 15週年勳章親子王國15週年勳章

10^#

發表於 15-9-7 16:56 |只看該作者

有幸幾年前買到平機票去過1次, 真係一個好正好舒服嘅地方

私人傳訊

donki

大宅

積分: 1007

11^#

發表於 15-9-7 16:57 |只看該作者

無錯, 機票貴有貴好, 好在唔會撞口撞面都係香港人

(唔係話香港人唔好, 只係去旅行時總係希望感受0下不一樣的...)

私人傳訊

Rubik

珍珠宮

積分: 32301

12^#

發表於 15-9-7 17:20 |只看該作者

回覆：峇里旅遊資訊分享

我好想去，但都係怕交通唔放便唔敢去

私人傳訊

donki

大宅

積分: 1007

13^#

發表於 15-9-7 17:29 |只看該作者

回覆 Rubik 的帖子

哈, 我好明白, 所以我決定整個香港人0既峇里page, 幫大家搵0下資料:)

私人傳訊

HelloKitty

男爵府

積分: 6073

14^#

發表於 15-9-7 21:08 |只看該作者

回覆：峇里旅遊資訊分享

好正，已收藏，辛苦晒

私人傳訊

donki

大宅

積分: 1007

15^#

發表於 15-9-8 11:46 |只看該作者

最近Hong Kong Airline做緊平機票, 連稅都唔駛HKD$2,000!!!

私人傳訊

tst1800

禁止訪問

積分: 10968

16^#

發表於 15-9-8 12:34 |只看該作者

提示: 作者被禁止或刪除內容自動屏蔽

私人傳訊

donki

大宅

積分: 1007

17^#

發表於 15-9-8 12:38 |只看該作者

回覆 tst1800 的帖子

哈, 咁平機票個condition通常都係辣d
唔介意轉機又唔驚0既話, 我最近先book完馬航, 係KL轉機, transit time只係兩個幾鐘
連稅0岩0岩好三千蚊
年尾Christmas到year end

私人傳訊

donki

大宅

積分: 1007

18^#

發表於 15-9-8 14:34 |只看該作者

冷知識衝動 - 峇里島之你估佢唔到

well, 個標題自己寫完都有少少汗顏，
實在有點兒似舊時無線眾多遊戲節目入面其中一個單元，仲要係安德尊主持果隻....

好，既然個頭已經開得咁老土，唔爭在套用埋最最最老土嘅一句

「好，我地去片！」

1. 峇里一年只係得210日

各位渡日如年嘅朋友你無睇錯，峇里一年只係得210日......唔好咁快執定行李移民住，我講緊係佢地嘅傳統曆法計算。由於峇里島上居民大部份信奉印度教，所以佢地係跟隨一個叫 "

awukon Calendar" 嘅日曆去作計算，一年有十個星期，但係果十星期入面就有一至十日不等

絕對係我等數字白痴嘅惡夢

有興趣知多喲可以wiki一下

Pawukon Calendar - Wikipedia

2. Kopi Luwak - 貓屎咖啡

你可能有聽過呢種咖啡，
如果未聽過，我話你知，佢絕對就係「貓屎咖啡」呢四個字咁解
並唔係好似中菜入面常用嘅「概念菜名」...(即係你食果d翡翠玉環瑤柱圃，你唔會expect真係會有翡翠同玉環架, right? )
但係貓屎咖啡，的確係由害羞嘅麝香貓食完咖啡豆後唔太消化痾番出黎嘅產物 ~~(即係我食完火龍果咁....)~~

世上最貴嘅咖啡，~~可能因為貴在夠攪屎棍~~
並非峇里獨有，但係峇里係可以得到真正嘅貓屎咖啡嘅唯一幾個地方之一

絕對係送比上司最佳禮物之一
夠晒體面之餘亦可暗藏「食屎啦你」嘅陳述

3. 創意命名法

如果你同當地人傾計，你會發現佢地好多人個名都係一樣
唔係叫Wayan / Made (讀罵that, 唔係瞇) / Nyoman / Ketut
原因係佢地個名係跟輩分排嘅

第一胎: Wayan, Putu 或Gede
第二胎: Made 或Kadek
第三胎: Nyoman / Komang
第四胎: Ketut

第五胎呢? Sorry，無預到你咁好生養，如果係第五胎就由第一胎個名開始loop

都好丫，一雞兩味，知人地叫咩名之餘仲可以順便窺探別人家庭狀況
其實幾方便

4. Nyepi

係你安排你任何峇里假期之前，記住呢一個字，亦盡量盡量避免呢日時間去峇里(除非你好想體驗下)
Nyepi係印度教入面嘅Day of Silence, 即係安寧日
過咗呢日之後就係新一年

係果一日，大家都會唔出聲，唔出街，無任何娛樂，唔可以生火煮食，唔可以食，連燈都唔比開
淨係留係屋企反省

你咪以為遊客可以唔駛理，錯晒

雖然峇里八成收入完全來自旅遊業，但係佢地並無因為呢班衣食父母而有所妥協 (反而我幾欣賞)

當日遊客只可以留係酒店入面，電視或音樂都唔可以開得大聲，甚至酒店門窗都要用布封起，唔可以比外面見到你入面有開燈

無得偷雞，因為街上面會不斷有人檢查，以確保無人犯規

過咗一整日嘅反省，第二日大家就會周圍搵親友道歉，再次笑聲笑聲滿載溫馨

2016年嘅安寧日將會係3月9號
2017年就係3月28號

請各位同學留意

其實仲有好多，不過實在唔太有趣........留番得閒先講:)

如需轉載請列明出處: https://www.facebook.com/withlovebali

私人傳訊