做左咁多年野，前線，管理，老細都做過：做緊，比少少心得各打工人士∼
如你剛畢業：
1. 一定要揀大公司入
人工唔需要放太重，因為入到大公司，比到你既見識，制度，從中參考到既管理模式等等都係細公司比唔到你，仲有，大公司轉大公司，細公司都容易，但係入左細公司，之後想轉大公司就唔係咁易
2. 盡量揀前線工作，銷售去做
一間公司，sales 永遠都係最重要。每間公司幾乎所有部門都可以外包，如行政，IT，會計，法律，marketing等等，但係無一間公司會外包sales department。而經濟差，最先比人郁既往往係其他部門，sales係留到最遲先郁既，因為公司差更要sales幫手搵生意；而經濟好，sales亦往往比其他部門既人更快有reward。仲有，唔計專業人士，sales人工平均係比較高既一群。
3. 做sales，盡量做b2b，唔好做b2c
B2b即係你銷售既對象係公司，企業，政府等客戶，b2c即係你銷售對象係個人消費者。諗都諗到，同樣一單生意，b2b多數金額都會大過b2c，所以你既佣金收入都會高，而對公司客，你同客熟左係可以成為你長期value，對個人消費者除非係做有錢佬生意，呢d network先對你有用，否則其實轉工，你班客底係作用不大（保險除外）。
4. 如你無大學學位，請出來工作後點都讀返個，讀part time 學位你肯比錢同時間一定攞到。大學生而家通街都係，但係你無既，某類型工你呢世都做唔到，上管理層亦比其他人難。
5. 係行入面盡量做好自己，識多d人，建立自己既network
記住，香港好細既，行業內更細，係一行做得耐，你會發覺來來去去都係嗰班人。做好自己，你既名聲自自然然會係行內建立。而識多d人，唔好理佢高唔高級，因為係同一行做十年，你會發覺你身邊既人都開始係行內上位，如果廿年，佢地就係行內揸fit既人，所以由今日起就開始建立自己既人際網絡啦，總有一日會係唔同層面幫到你。
6. 做事唔好怕蝕底
今日你做多少少，做好少少，將呢種態度成為你既心態，將來你條路就會好行好多，不知不覺中亦會令好多人賞識你。
而做左幾年既你：
1. 可以既頭幾年工作生涯，隔兩年轉一次工啦
魚唔過塘唔肥，每次轉工你工資增長速度會比你一直留係同一間公司高，一間公司搶人既待遇係比老臣子高，呢個係行業普遍現象。而轉工亦可以令你學到更多野。
2. 搵間發展中既公司長做
轉過幾次工，人工去到咁上下，就要搵行內發展中，排名三，五，七名既公司做啦，因為係行業龍頭公司做，平均人工會低d，你晉升空間會少d，發揮機會會少d；相反一間冒起中既公司，你同公司一齊成長，得到既回報，攞到既經驗就會更多，但係一開始，一畢業，都係要揀間大公司做。
然後，然後你係行內浸得耐，有好既人際網絡，你就會見到好多生意機會，你就可以考慮繼續打工，定係自己開公司，然後，你條路就會比好多人行得舒服∼
大力理財篇 之 子女理財！
http://www.baby-kingdom.com/forum.php?mod=viewthread&tid=3868590&extra=page%3D1
買基金真係好傷
http://www.baby-kingdom.com/forum.php?mod=viewthread&tid=3294843&extra=page%3D1
發表於 
返回列表
