夫婦情感 今日: 3|主題: 42446

是咁的。話說我同C識左一年左右，on/off都有吹下水，而個一年來佢有約過我，但次次都無成功出來。上年終於約左出來，然後第一日見就一齊左，到而家差唔多4個月。

一直以來都相安無事，本身係有個兩個月一直都係觀望態度，亦都唔係見得太密。結果第三個月開始到而家，適逢我放假而又有時候WFH，慢慢就開始成日見。唔係佢係我度住，就係我係佢度住，推進到自己沉左船。

因為我過往感情經歷既關係，我一直都好無安全感亦好怕受傷，曾經因為感情事跌落黑洞抑鬱好耐先好返，所以點解最開始係一直打算觀望。C亦都知道我既過往，所以佢成日都話想保護我、比安全感我，而兩個都係適婚年齡，所以係佢同我開始無幾耐就有講過想同我結婚有自己屋企，亦都有講過大概既timeline，我地都見過對方屋企人。

近期佢告知左我佢電話pw，我疑心驅使下去睇佢電話，睇完真心跌左落谷底，同佢對質完更加覺得好徬徨，唔知點算。

1）同我一齊呢段時間，佢有同其他女仔flirt，而條女係佢以前既sp，人地主動搵佢，講埋d帶色話題，佢會照回應。例如人地問佢今日係咪射波，佢會話射落你個波度；又例如人地問佢檢測，佢會答深喉；個d女仔會偶爾send短裙相之類，佢會答好方便。同時，我發現佢係同我大概兩個月個陣，都仲有同d女仔出街。我亦都記得其中一個女仔係某次我同佢出街既時候出現過話想約佢食飯。

佢既回應 >> 佢話有d人係鍾意9up佢咪會9up應機。佢覺得自己又無出軌，只係傾下計，而且出街個次佢聲稱咩都無發生，齋睇戲，同埋係個女仔主動搵佢，唔係佢搵個女仔，佢唔覺得自己有問題。

2）原來我同佢一齊個陣，佢未正式同佢女朋友分手。我曾經問過佢係咪單身，對上一次係幾時分手，佢呢次答覆都話已分，但時間次次都唔同，所以我疑心先係度。跟住就唸翻起，原來係我同佢一齊開頭個兩個月，佢每次話同frd出去，約frd食飯，約舊同事食飯，其實都係佢個ex。直到我話去佢屋企之前個個禮拜，佢先清走曬ex係佢屋企既嘢，正式分手。

佢既回應 >> 佢覺得係ex既事情上佢覺得咁樣present（話同我一齊前已經分左手）係好過直接話比我聽，而且佢聲稱已經鋪排分手左一陣，但始終同個ex都唔短時間，好難直接一cut就cut，所以拖左兩個月先分手。

3）關於睇電話：其實我知道自己check電話係非常唔啱，亦都係唔應該係任何情況下侵入人地私隱。但其實係呢件事發生之前我疑心已經係度，因為佢曾經比一個女仔撩而又無同人講自己有女朋友（佢自己走去cap圖比我睇對話我先知，雖然我唔明點解佢會cap比我睇），而另一次就係出街個陣我係佢隔離睇到個個「女性朋友」搵佢，而個女仔名備註係xxx CMB（我當時直接知道係代表dating app識翻來），所以我真係好無安全感，而佢講密碼比我知我就走去睇。

佢既回應 >> 佢其實好L嬲我睇佢電話，第一次我睇完confront佢關於「女性朋友」件事後，佢話自己專登唔改密碼睇我係咪會睇多次，結果我真係有睇第二次，然後佢真心嬲，因為佢覺得就算咩關係都好，都唔需要將所有嘢透明化，而且會覺得每樣嘢比我監控。佢覺得自己做既嘢無問題，而且d野唔suppose比我知。佢話正常既佢咁L嬲應該會直接收人皮，但係佢因為好愛我所以會自己冷靜完，先處理我情緒再表達佢自己既不滿，想冷靜咁傾。

我本身好想執野走，離開佢屋企同離開佢，但當佢留我，我又心軟。我地傾左陣，傾既時候佢話覺得我地因爲呢件事分開好on9同好唔值得，因為本身呢件事係觀點與角度問題，佢覺得自己做既嘢無越軌，同埋d嘢根本唔重要，佢覺得最重要係佢點對我，而佢覺得自己真係有努力花時間陪我，知道我無安全感所以做好多嘢去話我知佢好緊我。結論係，佢話佢真係好愛我，唔想我走，想繼續行落去。

事實上我都好愛佢，自問除左睇電話呢件事我唔啱之外，我盡曬一個女朋友本分，係佢屋企住既時候幫佢打理曬屋企家務，洗衫拖地食飯都幫佢做曬，而當佢係我度既時候，佢掛住打機我都主動落去買外賣比佢食。

其實我到而家依然1516，唔知應唔應該放生佢。一來自己好愛佢，亦明白所有關係都係會遇到困難，要維繫一段關係係需要兩個人一起努力去面對。但係我安全感又依然好低，會唸起佢講大話撩女仔，覺得佢咁樣對ex同樣可以咁樣對我。

到底我應該放生呢個人嗎？