唔係好多人將自己小產嘅經歷詳細咁講出黎。
始終唔係開心嘅事，要回顧亦都係痛徹心痱，的確好難講落去。
但係相信每個孕婦同丈夫得知自己要迎接小朋友，都唔會去自動去接觸/google流產、小產，大吉利是咩….
所以當知道BB要離開，到引產，其實可能只得1-3日去準備 (甚至無時間、睇緊急嘅程度)。
我自己呢次經歷完，好想分享比同路人，或者而家可能正面對腹中BB離開的夫婦。
我在23週經歷流產，係孕中期流產，係我的第一胎。
因為我屬於高齡產婦，公立醫院安排我在20週照結構，幫我照的醫生發現小朋友的肚圍、手腳長都低於週數3~4週，於是再約顧問醫生在第二日再照多次。
我當時仲天真地諗，同老公講，BB所有器官都齊全，無事嘅，小朋友生長有快有慢者。之前一直在私家醫院每個月照超聲波，個醫生又無講有問題喎，對上一次就10日前先照完。
好快到左第二日，顧問醫生再照結果亦一樣，然後醫生好凝重咁講咗一句「我地坐低傾傾先」，就覺心知不妙…..
原來BB生長遲緩，重量、肚圍、手腳長都遠低於平均生長線，3%係最低標準，但佢連3%都掂唔到。根據BB的生長線，個BB大得好慢，甚至愈黎愈慢，有可能捱唔到落去……
喺呢一刻，我的眼淚已經默默地流出黎，問醫生係唔係我的問題呢?因為我的媽媽有糖尿病、而我自己出世時亦係一個巨嬰，所以我都刻意唔比自己食太盡，但餐餐都有食飽，亦有日日食supplement……
醫生話呢個唔係媽媽吃多少的問題，係胎盤的問題，BB同胎盤一齊形成，但胎盤吸收唔到營養，所以佢生得慢；而當BB愈大，需要愈多營養，胎盤能力唔夠，就好危險，所以要好密切監察BB的情況。有可能胎死腹中、有可能在24/28週時BB達可出生的最低重量就要出世、有可能出左世都會捱唔住……
而醫生講對照返之前出面照超聲波的數據，雖然之前都係偏細，但仍在標準內。而對上一次超聲波醫生應該已經會發現到有呢個問題……
於是我要抽羊水，兩夫婦亦要抽血，再做詳細的DNA檢查，睇下係染色體、或是胎盤問題。(我亦提供左之前做T21的報告比醫生做紀錄)
我同先生都好傷心好傷心……真係無諗到會係咁嚴重。
等待報告的兩個星期好漫長，但我同先生爆喊咗兩日後，選擇更加要吃好睡好，向好處想，咁先可以令BB繼續健康。
BB可能都有感應，我開始感受到胎動，愈來愈多。我同先生會每晚都把握時間同佢傾偈，佢都好似識聽咁會有反應
（不過爸爸一擺隻手上黎就靜左，蝦爸爸）好彩爸爸有幾次都捕捉到。
每次感受到胎動都令我覺得好有希望，BB可能捱得住！
終於到左等報告嗰日，醫生照超聲波，照左幾下，就話我地知BB已經無左心跳。
其實我都估到，因為就喺睇報告嘅前兩日，BB叫極都無乜胎動，所以醫生講嘅時候，我默默地流住眼淚同醫生講「我都估到有呢個可能」，跟著就同醫生姑娘傾後續嘅安排。
或者係因為有兩個星期比我地心理上緩衝，我地傾嘅時候都算係好平靜。
不過一離開左診症室，得返我同先生嘅時候，就開始爆喊了。
姑娘好窩心咁提醒我地，我地要好好趁BB仲喺我個肚裡面，同佢做佢喜歡嘅事，或者食餐美滿嘅飯，影多啲相，製造美好的回憶
呢個提示絕對係令我叮一聲～!係喎！我地更加要好好珍惜相處嘅時光！
於是之後一日，引產前嘅一日，亦即係BB在我肚子內嘅最後一日。
我同先生著得靚靚咁做遊客，一家三口去打卡影相，去機鋪賽車，去食爸爸媽媽好鍾意嘅雞煲邊爐，呢一日好開心。我相信BB都感受到。
成日有個問題問「如果你人生得返最後一日會點過?」
係BB令我知道，同愛嘅人去做喜歡、開心嘅事，一齊共度時光，即使係最後一日，都係美滿無憾嘅一天。
終於到咗入院日
我一早就入院，因為要每三小時塞藥引產，一共五次為一個cycle，醫生護士講過，有啲孕婦4劑藥就排出，有啲成日都唔得，要隔日再試。我就同BB講「你喺媽咪個肚仔入面又熱又悶，快D出黎就可以上天堂同其他天使BB玩喇」。
藥效係疊加嘅，所以效果隨時間愈來愈明顯。到傍晚又發燒又發冷，又係咁痾sss，又宮縮，都幾「喱hea」，好彩先生一直陪住我。
期間不斷有護士來關切同監測情況，仲會黎傾吓偈做輔導。佢地安排我自己一間房，因為佢哋知道我地會有情緒（其實我覺得我係咁痾sss都係一個原因）
塞到第5劑藥，到晚上11-12點，宮縮愈黎愈嚴重，亦感受到個子宮愈黎愈緊，我繼續同BB講「BB乖豬，媽媽好辛苦呀，你快D出黎啦，媽媽唔想隔日又再試多劑……」
好彩BB都算聽話，2個零鐘後終於出黎，始終個胎都係細，幾秒鐘就出晒黎。之後姑娘仲同我講，BB真係好叻，個胎盤好完整咁出晒黎
(我唔使去吸宮)。
當我以為我好開心終於送走佢嘅時候，原來之後慢慢長夜先至係最痛苦嘅時間。
當我意識到佢唔再喺我身體時，我已經好掛住佢，我為此半夜飲泣到停唔到
回想宮縮生產嘅痛苦，我又突然好掛住我自己的媽媽，我媽媽竟然可以順產生我呢個巨嬰出黎，於是又爆喊……
喊下停下到五點幾，好不容易先瞓著左。
一天光，護士又黎check血壓同體溫，個人醒左，見到個天空，好掛住BB，又喊……
嗰種痛哭真係好矛盾，明明自己好慶幸BB終於順利出黎到天國無痛苦咁做天使，但又好掛住好掛住好掛住佢……
直到老公醒左同我傾偈
(佢全日都照顧我走黎走去都好攰，見到BB順利出黎就放下心頭大石瞓左)我先至停到
食完早餐，就又有第二個姑娘黎輔導我地，之後亦安排我地睇BB。
我仲以為自己見到BB會好激動，但原來見到BB都會好平靜好開心，會爭取時間同佢傾偈、抱佢、唱兒歌、同佢講爸爸媽媽好愛佢，永遠永遠都好愛佢。幾個姑娘仲好好咁幫我地影相留念。
有位輔導姑娘仲放左個天使掛飾喺BB附近，會喺病房一路陪住佢。到我地出院時就可以拎走個天使掛飾。
有小小重點想同同路人、或者即將面對流產的夫婦分享:
6. 失胎真係好痛好痛，身心都痛，我照鏡見到自己喊到對眼又腫又黑，面都黃埋。但我個人比較喜歡stay positive， 我會睇返呢件事帶比我乜嘢好處，有乜野值得感恩 (我無宗教的)。
- 我好慶幸我先生好愛我好鍚我。當初係我唔想要小朋友，因為覺得在香港養育小孩好大負擔同壓力，我先生亦明白我感受，從來唔迫我。但我之後諗清楚，我唔應該抹殺我先生做爸爸的機會，所以不妨一試，天下間有好多人想求子都無辦法。點知呢個機會好快就到。直到而家，我知佢個心都好痛，不過佢好擔心我，好照顧我，好感恩我有個好體貼同愛我的老公。連醫院D姑娘都大讚我老公，佢地話每次入黎睇我地都感受到好多心心
- 係BB令我知道，原來我係ready做媽媽架。雖然一開始知道時好不安，但之後佢在我肚子內，我一直都覺得好喜悅，好幸福，始終呢個係天賜嘅禮物。我地好好彩有呢個緣份，即使緣份比較短，但我一直都會係BB的媽媽。BB多謝你
- 我屋企人好錫我，佢地當初一聽到我有左，已經幻想將來要點同BB玩。我怕佢地傷心，係入院前一日先通知佢地，佢地無怪我，仲好擔心我地，問點解唔早D話佢地知，唔使得兩個人自己痛苦。
- 我同事好support我，因為工作關係，我要同佢地講我嘅情況，等佢地可以get prepared，佢地知道消息之後，同我一齊喊。到之後真係小產，二話不說，叫我停工休息，休息幾耐都得，佢地會頂住，最緊要係我身心健康。
- 醫院姑娘真係好好，如果你話D醫生係目無表情，咁D姑娘真係做左緩衝，我諗佢地應該係有專門團隊照顧流產病人，佢地好貼心，令成件事心理上無咁痛苦，而且一call真係百應 (以為我生得)，搞到我有時小事 (e.g.問拎野) 唔敢按病人鐘。
- YWCA社工好好，講真，有幾多人會去做流產失胎research，大吉利是咩。愈早得到支援、愈早知道自己要點做，尤其是安置不足月流產嬰，我連坐小月都唔知道呀……係社工(同醫院姑娘)同我講先知，社工仲message我為我祈禱。
我而家坐小月就慢慢養好身子先，同先生處理好BB後事。希望之後可以share我地安葬不足月流產胎嘅經驗比有需要的人。
我唔知我幾時先會釋懷，我只知道我會一直好掛住我嘅BB。我將姑娘送的天使掛飾掛左喺窗框，每次見到佢就好似見到BB喺天空好開心玩緊。
希望BB你一直都可以喺天堂無憂無慮咁同其他天使BB玩啦。
祝福各位失胎的同路人盡早釋懷，身體健康先可以做世界冠軍，繼續過幸福美滿的生活。
以上只係我的個人經驗分享，歡迎更多過來人分享，始終失胎流產資訊都比較匱乏。
ycwinnie 發表於 23-6-29 15:55
唔係好多人將自己小產嘅經歷詳細咁講出黎。始終唔係開心嘅事，要回顧亦都係痛徹心痱，的確好難講落去。但係 ...
發表於 
返回列表
