經過左個多月,我的心肝寶貝小天使終於入土為安了。
(關於我的流產經歷…. https://www.baby-kingdom.com/forum.php?mod=viewthread&tid=23680716)
件事睇落好似告一段落,但其實我落筆的這一刻都係忍唔住鼻酸了一下,因為佢喺我心目中係永遠都有一個位置。
我希望無人用得著呢D資訊,只係諗如果有人都面對同樣如此傷痛的問題,但又好少人主動分享,我希望我的經驗可以比到少少指引。
送走小天使最主要三方面:1. 決定埋置的地點/方法;2. 尋找殯葬服務;3. 父母如何好好送走小天使
**我的小天使係不足24週的流產胎**
一. 決定安葬的地點/方法
當得知要進行流產時,醫院姑娘都會簡介現有比不足月BB的安葬的地方。以前不足24週的流產胎,只能視作醫療廢物,不過經過好多前人的爭取,而家都多左好多比不足月的流產胎的安葬地點同方法。
我地選擇左食環署的哥連臣角永愛園埋置,最主要的考慮因素是地點。只需帶所需文件*親身*去食環署指定的辦事處辦理,5個工作天就會回覆。(記得係親身去,即使填左網上個電子表格,佢都係要你親身再交文件 -.- )
上網睇左永愛園個環境,有花園做埋置,又有碑位比小天使。當日我地去到的時候,雖然好熱好熱,但見到個環境好安寧,我相信成班小天使喺嗰度應該好開心。記得當日我仲見到一位媽媽,烈日當空下一個人拎住紮花去探小天使,成個畫面好溫馨,佢一定都好掛住心中的小天使。我之後都會帶D玩具上去,放喺個花園度。
二. 尋找殯葬服務
因為永愛園會提供碑位比小天使,於是我地就詢問一些殯葬服務公司整石碑,YWCA小足福社工好好人提供左好幾個殯葬服務公司比我地參考,等我地唔使盲中中咁搵。
本來諗住好簡單咁整個石碑就算,但最終我地都搵左有埋遺體處理的服務。雖然比預期中貴左少少,但小天使即使只係短暫的一生,我都想好好送走佢,唔爭在呢少少錢。
亦慶幸我選擇左幫小天使進行遺體處理。因為領取小天使遺體當日就需要直接進行埋置,小天使始終不足月,而且喺雪櫃瞓左一段時間,殮房職員都同我講要有心理準備小天使身體會腐爛得比較嚴重。如果唔係有專業的遺體整理師,我真係唔知我自己點樣放佢入盒仔,再帶走做埋置......遺體整理師好專業咁幫小天使清潔好,著好衫仔,執到個盒仔靚一靚。見到小天使好安詳咁瞓覺,我個人都即刻舒服返,可以同佢好好道別。
跟住殯葬服務公司的職員就同我地一齊上永愛園,石廠師傅當場裝好石碑,我地正式同小天使道別。
另外,作為參考,其他殯葬服務公司雖然唔一定有遺體整理,但提供整石碑服務之餘,都會派人陪同一齊去領遺體,同去安葬地點。最緊要都係睇budget,同自己做到幾多。
三. 父母如何好好送走小天使
坐小月最慘的是,我無得湊BB,但只能坐月休息,內心就更容易亂諗嘢,好易有情緒,所以我喺坐月期間學摺紙,摺左好多紙心心、仲有小花貓、小老鼠、車車,仲有得閒寫信比小天使。
另外,當我知道要進行流產的當日,我已經即時聯絡左 YWCA 小足福的社工。社工好好人,夜媽媽星期五十點都打比我安援我地。坐左幾星期小月後,身體比較好D嗰時,我同先生去左 YWCA 嗰度整左個 (我覺得) 好靚好靚的房間 (小盒子) 比我地的小天使。我地足足整左七小時,由床仔、被仔、枕頭,到整個小房間的外觀佈置,我相信小天使會感受到我地對佢的愛。
所以到埋置的當日,殯葬公司嘅職員好好咁整理完遺體,再將所有陪葬品放喺小天使身邊,雖然要送走佢,但係我感受到愛,我地兩公婆好努力地希望將可以比小天使的世界,都放喺小盒子裡面,希望佢喺天堂繼續感受我地比佢的愛。
我想講的是,我地做父母的,帶唔到佢黎呢個世界上,只能盡自己的能力,不留遺憾地比小天使最多最好的東西。不論形式,最緊要無遺憾。
最後最後,給即將/正在面對失胎父母的小寄語
記得尋找幫助!小產真係好慘,好痛,身心都痛,有唔開心一定要同伴侶傾訴、搵朋友傾訴,或者聯絡輔導機構、社福機構。而家社會上比以前多左好多失胎支援,除左YWCA,仲有明愛都提供小足福服務。如果唔係小天使知道爸爸媽媽唔開心,佢都會玩得唔開心,記得唔好太壓抑自己!如果金錢上做唔多太多,有D殯葬服務公司都會有提供折扣。
呢個幾月以黎,我喊左唔知幾多包紙巾,喊到出左兩次眼挑針,頭兩星期成個人真係面又黃、眼又腫又細,但當我心中有D方向去送別小天使,我個人都開始開朗返。到而家我每日都會同佢講早晨晚安,見到天空就會同佢講下野,我相信佢而家喺天上玩得好開心。
希望呢篇文章幫到有需要的人,如果有同路人都有自己經歷,不妨一同分享。共勉之!