babyhoi 發表於 14-1-14 13:20
背景﹕大嫂--B6,做律師,有教養,非一般貪小便宜B6女人
大伯--大公司顧問,搵到錢
6299--已退休,樓供完,我老公同大伯比既家用不少,但慳錢慳到你驚
我兩公婆、大伯、6299住同一區,行路可到
話說大嫂12月尾喺香港生左BB,
我介紹左陪月比佢,
早兩日去探佢,
聽佢呻有關6299呻到到一地落葉~
1. 6299從不打電話通知,隨時用鎖匙自己開門入大嫂屋企!
大嫂媽落左黎陪個女,有次大嫂喺廳餵緊人奶,62自己開門,
大嫂媽即衝去禁住度門叫62等陣,
62照推入黎,話點解唔比佢入黎!
2. 6299不滿大伯花錢請陪月比大嫂,
99之前已經話過等佢幫大嫂坐月但被婉拒,
因為我地個個都知99唔識煮飯兼難食,
6299懷恨在心覺得陪月太貴,
每次上大嫂屋企都黑口黑面對住人,
覺得佢收咁多錢做咁少野好著數!
其實大伯大嫂今次生仔、請陪月、買BB野,
所有錢都係自己比,
但6299就好似比人切左忽肉咁,
成日覺得駛左好多錢
3. 大嫂同陪月相處得好好,
陪月成日免費OT陪佢因為大伯有時好夜返,
大嫂話完約會打賞佢多謝佢,
但99講明話叫佢唔好比打賞,
因為覺得陪月打斧頭!
話人買舊豬腳$30邊洗咁貴,
佢買$15就有!
但大嫂話嗰舊豬腳好大舊的,
$15一定唔得,
係99搵野黎嘈!
4. 6299每日去「目及」住陪月煮咩,
開頭大嫂要谷奶所以有時會煲兩款湯,
6299知道後就話你駛唔駛咁補!
一個人邊洗食咁多野!
仲有咁多渣,好浪費!!
所以每日佢地都會去撈走大嫂啲湯渣,
返屋企就番煲或食湯渣做餸....
佢地慳我地冇辦法,
你可以話佢地節儉,
但屋企仲有個太99(快90歲),
工人話太99有時食唔飽,
99唔比佢夜晚再煮野食,
只比佢食半條蕉.....
5. 陪月整煲仔飯大嫂食,
大嫂食剩啲飯焦,
比62鬧佢暴殄天物!
唔食飯焦做咩整煲仔飯!
6. 陪月有次煲湯用左兩隻烏雞,
99又話大嫂駛唔駛咁補,
大嫂覺得好委屈,
係咪佢既身體咁唔值得自己比錢去補,
因為大嫂媽當年窮冇得補而家身體唔多好,
所以而家好捨得比錢個囡補身,
但99就話自己當年生完第三日就返工啦,
邊駛補呀!
7. 6299上到大嫂屋企借幫手打掃為名,
周圍檢視為實,
掃個雪櫃底搵到一粒肉粒,
就鬧爆個陪月話佢污糟!
仲有為方便佢地自己,
將幾卷廁紙放喺洗手盤旁,
大伯夜晚返黎見到覺得好阻就放返上櫃,
第二日99黎到就話大嫂點解郁佢擺好既野!
覺得自己喺間屋有權話事啲野點擺!
8. 星期日陪月唔黎,
有次99自動請纓話煮飯比大嫂食問佢想食咩,
大嫂話蝦仁炒蛋,
但99話得佢一個人食煮蝦仁太奢侈,
最後只肯整蕃茄炒蛋.....
9. 大嫂想meet橙食,
見到有個橙有一邊發左毛,
正想掉之際比99見到,
99唔比佢掉,
切左發毛嗰啲要大嫂食埋剩下嗰半.....
10. 6299抱BB抱得唔好唔舒服,
BB次次都喊,
佢地只會對住BB講「唔準嘈! 唔準嘈!」
大嫂看在眼內覺得BB好慘.....
11. 大嫂生之前冇耐佢媽落到黎香港,
6299話請佢地飲茶,
大嫂滿心歡喜覺得6299好照顧親家,
點知去到茶樓,
6299自己點菜,
一碗特價瘦肉粥比大嫂,
而6299同大嫂媽就一人一碗$1.8既限時特惠飯!
一小碗飯上有幾粒肉!
4碗野連茶錢,
4人埋單$30 !!
佢唔講我都唔知今時今日香港地仲可以4個人飲茶$30埋單!!
大嫂話之前6299返親大陸玩,
佢父母都招待佢地食當地最好既飯店,
又買好多土產送比佢地,
而家掉返轉6299咁樣對自己呀媽,
早知話佢比錢請飲茶等自己呀媽食好啲,
唔好對6299有期望!
聽完都覺得大嫂好慘,
乜都比6299挑剔!
佢同佢媽都好忍得,
從來冇反駁,
但6299擺明蝦佢兩母女係大陸人,
喺香港無親無故,
喺度擺款,
因為3年前我生大囡時佢地聲都唔敢聲,
而家有人比佢地蝦就踩到人盡!
但我既位置當然唔會講啲乜啦,
只係可以聽大嫂呻下
兩個星期後到我生小B了,
如果6299咁樣對我,
我同我媽都會同佢地死過!