其實內地同香港已經係好近,起碼冇時差,呢個年代要見都可以時常facetime或Skype,我十幾年前同老公Long D係差14個鐘時差,佢又早瞓早起身,我就好夜至放工,每日係靠通果幾個email同一兩個星期一兩次嘅長途電話,當時係每日回味電話中嘅說話,見面時種種點滴,可能我比較獨立慣,所以老公/當時男友唔喺身邊我又冇咩問題,主要係我生活圈子好規律,定時去上堂去打波,得閒同朋友睇戲行街,我地都試過一次出問題,源於誤會,越描越黑,越搞越大鑊,直情去到講分手,最後係我讓一步先,反正當時我都要移民過去,之後就好快結婚生仔,已經係就第13年。
我同老公嘅價值觀人生觀係好一致,興趣反而唔係好同,佢粗枝大葉鍾意運動,我係鍾意好細緻嘅藝術嘢,但大家一齊有說不完嘅話題,主要係大家有種好想了解對方,好想知道佢嘅歷史,好想參與佢嘅現在同未來,佢有冇屋有冇車搵幾多錢有冇積蓄全部次要,反而我老公好積極同我傾結婚生仔嘅嘢,佢話好想娶我返去日日對住我,我又成日想有咩老公鍾意食嘅煮俾佢食。。。。個個人所感所求都唔同,但你同男友有類似感覺嗎?
婚後生活可以話平淡,又可以話不平淡,睇你地兩個人架咋,我覺得兩個人最緊要坦白,你有咁嘅感覺,有冇同男友講?大家坐低傾吓,或者只係誤會,如果帶住心結就算結咗婚,始終都係有一條刺,不拔不快。
花旗太太生活在花旗國,留意時差,你問我未必即時答到。