首先唔好再講呢個係病,病係可以醫,但自閉又好亞氏又好,
係與生俱來特質,就好似有人有先天近視要戴眼鏡,作為父母冇得揀,
生咗個小朋友出嚟佢同常人不同,父母都會無私愛佢,
有時真係澈氣,人地小朋友講兩次就記得,呢類小朋友講十次都唔記得,
因為佢地有一套模式去學嘢理解嘢,你要佢學校其他人嘅方式,
佢係要努力改自己果套,對住一D咁偏執嘅小朋友,要用多幾倍心機,
嘗試喺當事人角度睇,點解要我改去就其他人?佢都好辛苦,
父母努力之餘,我地都要欣賞小朋友嘅努力,大家咁至可以雙贏。
special needs kid條路一定唔易行,父母要承受嘅壓力好大,
樓主係媽媽,好多時首當其衝真係無計。我都聽過自閉係由父系遺傳,
所以仔女有,爸爸都係嘅機會好大。已經係成年人,又過咗咁多年,
好多嘢都習慣晒,根深蒂固好難改,我好明白係因為小朋友已經難湊,
如果爸爸幫唔手就更加辛苦。樓主住外國,我住美國,事實上已比香港好,
起碼有法律保障唔可以歧視(其實有時太過保護special needs添),
只要肯做評估又確診,通知學校的話係會有專科老師跟進幫手,
有晒plan去幫助小朋友學習。只不過,有不少例子係爸爸唔肯承認小朋友有需要,
唔簽紙做唔到評估,就算做咗又確診,父母唔去搵訓練亦冇人可以逼佢地,
我見到千奇百怪例子,其中因為爸爸而令仔女延誤訓練,
未能及早提供訓練大有人在,見過17歲依然唔識講嘢唔識照顧自己。
但如果爸爸都係有同樣special needs,你又唔怪得佢固執喎,
呢個係呢類人嘅特質嚟。樓主學教個女同時,試用同樣心態去對個老公,
可能咁會可以容易D接受,再去搵個適合方法同老公相處啦。
要面對兩個special needs的確係辛苦,但they are who they are,
你只能接受,改變自己去搵個自己覺得舒服D嘅方式去同老公相處,
未來仲有咁多日子你要照顧個女,你總想多個戰友嘛,
點都要搵方法同老公溝通,吓吓自己激氣都於是無補。
花旗太太生活在花旗國,留意時差,你問我未必即時答到。