flowerlala 發表於 19-6-3 19:55
多謝詳細回覆
1)獎勵係佢好恨,而且佢自己提出嘅,佢日講夜講想要,所以我唔明
自閉兒有個特質,就係固執,佢慣咗嘅要好多功夫至可以改變到,好似行開一條路,要佢變係可以,但當中佢會有不安,會有唔習慣,會有反問點解唔可以行以前條路,會反抗會俾好多理由話唔行、行唔通等,你同佢鬥要佢跟你好有機會事倍功半。
其實你係唔係一定要佢跟你咁做?點解一定要跟?唔跟又差幾多?好似你話佢已經成日有90至95分,100分又係唔係咁重要呢?自閉兒已經係比其他人冇信心,如果你不停要佢跟你做,做唔到你表現得失望的話,只會更打擊佢自信心,會覺得自己唔夠好。
我仔最大問題係三四五年級呢幾年,由幼稚園開始,最驚見到學校打嚟嘅電話,後來我同老公已經變成將要求降到好低,仔唔係蠢,讀書係好OK,但社交真係好有問題,我唔需要佢讀書叻,只要佢開心,交到朋友已足夠。
升中學後佢話想做straight A學生,六科包括PE,第一年真係可以,今年第二年唔得啦,因為佢PE真係差過人好多,我對佢嘅功課放手,只係偶然查下,提下佢要留意有冇交漏功課之類,反而我仔好緊張,佢會自己要求老師俾佢再交多次功課,想攞好D分數,亦有唔明功課,佢email俾老師,問可唔可以上堂前或小息去搵老師請教。。。其實呢,俾少少信心小朋友,亦唔好太過要求高,你嘅要求會變成壓力。我今年放手俾個仔,反而成績唔錯,當然再上高中又係另一回事,但所有老師都話佢態度良好,又唔會惹事,個個都鍾意佢。
花旗太太生活在花旗國,留意時差,你問我未必即時答到。