以下只係關於個別幾個瑪嘉烈醫護人員...唔代表全部員工！純粹自己個人感受！
我下腹痛同發燒，睇私家，佢叫我去瑪嘉烈睇急症。男朋友陪我上病房，護士長叫我換病人衫，男友就坐係我張病床等我。我換完衫出黎，男友話佢要即刻走，因為頭先護士長黑面問佢做咩係女病人房。男友解釋等我換衫，護士長都係黑面咁話過咗探病時間，叫男友即刻走。男友就一肚氣咁走啦，其實佢坐咗2分鐘都無。
主診女醫生叫我除褲檢查，佢求其咁拉簾遮一遮，但仲有半個人身位係無遮到。正當我無着褲時，有個男醫生帶住幾個實習醫生巡房，我就好緊張咁問女醫生可唔可以拉曬兩張簾。佢有啲唔耐煩咁拉簾。佢伸咗唔知2隻定3隻手指入我下面，我覺得好痛，但唔敢出聲。醫生問我有幾個性伴侶，我話1個。佢語氣唔係中立咁問，而係好似覺得我有好多個性伴侶咁。呢種態度令我唔係好舒服。做完檢查，我去廁所。一除褲，見到有粒棉花跌咗落黎，我嚇死！再望一望，粒棉花有血既！我更加驚！諗返頭先，我估係醫生檢查完見我流血，就用棉花幫我止血，但佢一句都無同我講過！等我嚇餐飽！
因為我發燒，要吊鹽水，唔可以食野。夜晚有個病人係咁嘈，我根本瞓唔到。終於好夜先瞓着。我每幾個鐘要量一次體溫。瞓到半夜，俾個啊姐大力拍醒，佢一句野都無講，黑住面，而且好粗魯咁幫我量體溫同血壓。我見佢走咗，我細細聲同隔離床個病人呻：「其實我地病咗先入院姐，有病都已經好辛苦啦……咁無愛心就唔好做醫護啦……」點知俾個啊姐返轉頭拎野時聽到。跟住第二次佢就溫柔咗，會講明幫我量體溫同血壓。呢個啊姐工作態度有改善！抵讚！
第二日我終於退燒，我問護士：我可唔可以食返野。佢話要醫生決定。我就由朝早等到凌晨，等醫生黎，我驚我去廁所時醫生黎，所以我問咗4,5次護士，醫生有無黎。跟住我聽到護士細細聲同另一個護士講我，聽唔清楚實際內容，但見佢地既表情似係講我壞話。我望一望佢地，佢地就行遠啲繼續講。我見咁夜醫生都未黎，我就瞓覺。好彩個病人無嘈，我瞓着咗。一瞓着，個護士就過黎大大力拍醒我，話我聽日可以食野。佢個樣好得戚，令我覺得佢係特登見我瞓着就黎嘈醒我。其實依家咁夜，加上我瞓着咗，都唔會食野嫁啦，點都係最快聽日先食，點解唔可以聽朝先講呢？
我知道做醫護人員係辛苦，我亦好多謝佢地既照顧！你地有無試過係瑪嘉烈留院？有無相似既經歷？可唔可以同我分享吓？
發表於 
返回列表
