客廳風扇壞咗。。。。。
最初只係慢咗起步，當熱身後就會回復正常。 但係前兩日起步後，以為又冇事啦，點知轉幾轉就停咗唔郁，而且發出燒焦味。
有見及此，原本諗住拆出嚟睇吓有冇得修理嘅當家，連拆都費事拆，正式判定風扇已死，返魂乏術。
唉，成日都係咁，每到天熱就壞風扇，每到天冷就壞暖爐，硬係唔會喺天冷壞風扇，天熱壞暖爐，搞到要當季買當時嘅用品，價錢寧舍貴。（大姐呀，咁係天熱至開風扇，天冷至會開暖爐㗎嘛，一季唔開，就算壞咗都唔知啦。何況自己以為換季會大平賣甚至賤賣，以免成為倉底貨，但其實商家可能寧願留喺下季賣亦未必會減價。）
當家四出格價，點知想買嗰個牌子周圍都冇貨。（嗱嗱嗱，如果冬天應該就唔會冇貨，實係一轉季即賣斷市。）我問一定要嗰個牌子咩，佢話用開有信心。（事實上壞咗嗰部已經用咗幾個夏季，品質算係咁。）
佢提議不如買手動款，買返嚟放喺睡房，再將原本睡房嗰部換喺廳。（佢認為房唔係用得多，就算冇搖控都冇所謂。）
我問有冇時間掣，佢話梗係冇啦，甚麼時間掣自然風遙控統統欠奉，只得兩條繩手動，一條用嚟控制開關，另一條用嚟控制風速。
吓！？咁唔得㗎喎，每逢夏天勁熱晚上，唔想長開風扇至天亮，總會調校時間掣，半個鐘或一個鐘。因為瞓着咗之後就唔覺熱，可以直睡到天光。 若然再熱醒咗，就再調校，全程遙控操作，好快又瞓着，咁就唔駛全晚開唔停。
但係如果手動，即係一係唔開一係長開，否則就要起身拉繩關上。起得身郁得嚟又會覺得熱而瞓唔到，於是呢頭關嗰頭又要開，咁搞法咪成晚都好忙兼冇得瞓？
本來呢，全晚長開都唔係問題，但有時天氣情況，半夜三更會轉涼。 假如瞓得太入眠，一時冇意識起身關風扇，咁就好容易着涼，第二朝起身就鼻水長流噴嚏打不停。
所以，就算最終買咗手動，都只能放廳，唔可能放喺睡房。
春有百花秋有月, 夏有涼風冬有雪, 若無煩事掛心頭, 便是人間好時節.
發表於 
返回列表
