夫婦情感 今日: 1|主題: 42461

唔好意思，未結婚唔知有冇開錯版，但想睇下各位有咩睇法，感謝大家。

（呢段關係入面，唔存在第三者）我地今年25歲，由大學Year 1開始一齊到依家，啱啱好七年。出咗嚟做嘢兩年幾，本身一齊住喺我父母屋企，打算儲多兩年錢搬出去住。

我哋因為一啲事鬧交，佢搬咗返自己屋企住。之後發現原來問題係佢覺得我俾唔到安全感佢，想像唔到將來嘅畫面。咁呢個星期我一路都反思自己，的確我為我哋嘅未來真係無付出過啲咩。唯一有做就係今年的起心肝儲錢，但我連儲嘅錢要點用都同佢講話你幫我安排啦。生活就返工放工打機，佢講嘅嘢我成日唔放係心上面。於是我開始寫低自己對未來有咩目標啦，開始一步一步咁去做好自己先。

最後依家係分開住，不過佢set左個半年期限俾大家。呢段時間入面會想做自己想做嘅嘢，唔以伴侶做軸心，佢都希望我可以進步。大家都可以照一齊拍拖，只係佢希望唔好擺咁多時間係對方身上，可能一個月出2-3次街。期限到嘅時候如果大家都冇識到另一個更合適嘅人，而大家都覺得對方合適就結婚。

我知道佢真係愛我，真係覺得呢一刻我俾唔到未來嘅安全感佢，同埋佢有想有d空間俾自己想做嘅嘢，試下一啲之前可能顧慮我而冇去做嘅嘢 eg. 一個人去旅行。暫時佢WhatsApp都好冷淡，但見面時又好似以前咁唔會好冷淡。我知自己要努力進步，上進，有目標咁生活，做個負責任嘅人。只係有時都會好掛住佢，不過唔可以好似以前一樣成日見。

呢件事上，我知好多人會覺得佢係唔係一個特登搵機會去睇下有冇其他好男仔。我嘅感覺佢唔係想咁樣做，只係真係想explore自己，同埋睇下我能唔能夠成為一個可以俾佢依靠嘅人。

最後就係想問下大家有冇試過因為未來嘅問題而有類似經歷？

亦都歡迎同感謝大家可以俾d意見我，一個男仔要點樣進步，成為一個有擔當嘅男人。

多謝睇到呢到嘅你。