衝擊成功後, 我同老公係屋企將事情既始末高呼一次, 歸納出論點 , 度定見到醫生時點質佢好, 多個人多個腦記住嘛!
今次個女醫生又係未見過既 (真係好很煩, 又要由頭講過), 我簡單講左出院後係私家照到有個瘤, 於是醫生話幫我照左先啦! 檢查後, 醫生話照到左邊卵巢有個瘤, 以佢判斷應該係畸胎瘤, 而瘤既size亦同我私家照既吻合.
一坐低, 我老公開佢波先…(由於對話太長, 以下為大部份截錄)
老公: 醫生, 我想問初期宮外孕你咪藥物可以治療? (因為有個澳門朋友試過, 當地醫院用藥物治療, 無需開刀可搞掂. 我都係事後先知) 點解你地講都無講過就要我老婆開刀?
醫生: 無錯, 初期宮外孕係可以藥物治療. 但根據排板顯示, 當日醫生有同你太太講過, 但你太太選舉腹腔鏡手術並簽紙同意.
我: 醫生, 唔好玩啦! 當日根本無人同我講過宮外孕可以藥物治療, 只係講腹腔鏡手術分2種, 一種係保留輸卵管, 另一種係全條切除. 我諗比著任何人,如果有得選擇食藥, 我諗無人會揀做手術囉, 用下腦都知啦! 我覺得你地咁樣係剝削左我既知情權!
醫生無答d咩 (或者係唔敢亂答), 支吾以對, 一味排板話排板話… (x你個肺吖! 排板你寫咩地話既啫, 有無寫都無人知啦, 又一個口同鼻拗)
我: 開頭又話宮外孕, 開完個肚又話唔係,我都已經算啦, 你地竟然話個水囊係女性周期性會出現既黃體囊腫,會人體自然吸收. 咁依家係咪個個大肚婆下體有出血情況入威院, 你地都話佢地宮外孕啊! 你呢個解釋, 我接受唔到囉. 我人都已經係醫院, 當時又無內出血 (中午入院, 凌晨做檢查, 第2朝就做手術), 如果當日你地肯花多d時間觀察, 同埋幫我做檢查, 我認為我可以避免呢次不必要既手術.
醫生又睇排板…(我都知唔關你事, 但安排左我見你, 我無辦法唔爆你)…佢都係講返因為超聲波可以睇到既影像好有限, 根據我當時情況, 醫生判斷我好大機會宮外孕果d廢話…
我: 醫生, 你地既然開得我個肚, 唔係真係淨係睇我一條輸卵管啊, 我相信你地係有責任check晒我成副生殖器官, 點解你地咁都睇唔到? 如果你地做手術時有發現, 幫我割埋, 我就唔需要再承受多一次手術.
醫生: (又睇排板) 根據資料, 當日醫生進行手術時並無發現任何瘤.
我追問: 醫生, 咁以你既專業, 我呢個size既畸胎瘤, 有無可能由8月X日我出院至到今日10月1X日 (約2個月)內形成?
醫生: 無可能
我: 咁即係代表我進行手術時個畸胎瘤已經係度啦
醫生都好似唔係咁答到我….開始耍官腔講廢話, 最多就認佢地內部既溝通, 有進步空間囉!
我: 我覺得之前最後幫我覆診既醫生有失職之嫌, 因為佢幫我check過晒無問題我先close file, 但依家好明顯出錯啦, 我對於以上既事情, 會保留追究既權利!
醫生: 當然啦…你絕對有追究任何事情既權利. 咁關於個畸胎瘤, 你會唔會考慮係度做?我地可以幫你排期 (佢可能想割到我滿意為止呱)
我: 你地咁做野, 我仲邊有信心再係度做…你地如果排期, 要幾耐吖?
醫生: 一般黎講, 一年至xxxx
我: 成年幾先有得做!!! 我都係想生BB啫, 等呢段期間又唔陀得, 做完又要抖, 搞搞下我變高齡都未生得啦
醫生: 咁或者配合你既生育計劃, 我地可以幫你排快d既, 都要幾個月至半年 (我估佢想俾d甜頭我)
我: 老老實實, 我對你地醫院真係無信心,我唔排除會搵私家做, 但如果我遲下割左, 會唔會死無對証先? 我真係保留追究權利架!
醫生: 唔會唔會, 我地有record架嘛, 你今日黎睇, 我地有晒超波片證明你今日黎時係有呢個瘤, 不如咁啦, 我知你要時間考慮, 或者我寫覆診期後少少, 10月尾好唔好? 到時睇你決定成點
其實呢個醫生態度唔差既, 佢唔敢亂答我, 我都明…次次唔同醫生真係好煩, 唔知頭唔知路既人我鬧又唔係, 唔鬧又唔係…我只會對態度差既人先小得盡慶…
(待續) 手術篇