少年成長今日: 3|主題: 15861

收藏本版

回覆發帖

返回列表

跳至頁

查看: 34824 | 回覆: 3

家長「趣」事 [複製鏈接]

csir3290

子爵府

積分: 11009

1^#

發表於 23-12-24 12:12 |只看該作者 |倒序瀏覽 |打印

近排遇到幾件同做家長有關嘅事都想講下。首先早幾日得閒同老婆拍拖就去咗西九故宮博物館度睇展覽，嗰日雖然唔係假期但係都算人多，入到去自自然然想專心睇下展覽。忽然人群中有一個阿媽係咁叫側邊嘅人借借，然之後就係咁推自己嘅一對仔女去到個展覽品前面，嗰個家長仲叫對仔女要留心睇展覽品嘅資料，而且要岳高頭望個展品，咁我以為個阿媽咁有心教對仔女睇展覽啦！原來推咗對仔女上前之後，佢自己就褪後原來就係要影一張相，影到好似自己對仔女好專心咁睇緊展覽。但係最慘佢對仔女根本就冇留心，個阿媽仲要大大聲係咁叫對仔女企好企定。咁我都明嚟到博物館就梗係想影相打卡，呢個阿媽好明顯就係想將呢張相放上網表示自己嘅仔女好用心咁睇個展覽啦。但係都唔使為咗影張打卡相就要側邊嘅所有人讓曬佢啦。一影完張相就行開根本就冇睇過任何嘅資料，原來你博物館就只係為咗打卡，向人炫耀自己嘅仔女幾有修養。
博物館入面仲遇到幾個家長，又係帶住啲小朋友但係啲小朋友就喺個博物館入面走嚟走去，好似玩捉咁，根本就唔係嚟睇展覽，最慘就係啲阿媽就顧住自己傾計，就由得啲細路喺度跑嚟跑去，最後連博物館的職員都要出聲提醒佢哋。幸好呢班家長都冇駁嘴，但係就只係好敷衍咁叫自己嘅細路唔好再喺度跑。真係唔明其實入嚟博物館嘅目的為乜呢！帶細路仔入博物館嘅目的無非都係想增進細路仔嘅知識，擴闊下佢哋嘅眼界亦都培養下細路仔嘅修養，但係嗰日遇到嘅呢啲家長究竟又為咗啲乜嘢原因帶細路仔去博物館呢！

另外一單就喺我做籃球教練嘅朋友口中聽返嚟，佢話佢好慘，有一日去一間學校教波，點知忽然間個老師就叫咗我呢個教練朋友去家教會度開會，我個朋友好奇怪啦！嚟教波點解家教會開會關佢事呢？原來係因為家教會入面其中一個家長委員投訴，話佢個仔跟咗籃球隊成年點解都冇機會落場，又話我朋友點解喺練習嘅時候會嚴厲話呢個家教會委員個仔，話我朋友冇禮貌。終於我呢個朋友就畀人叫咗上去家教會度解釋，點知我呢個朋友就真係夠膽，上到去對住班家長同嗰個細路仔，跟住就畀咗個籃球嗰個細路仔叫佢拍波同運球，個細路當然做得唔係咁好，完咗之後就同班家長講，你覺得係乜嘢原因佢冇得落場比賽呢？跟住佢就喺班家長面前問返個細路點解嗰次會話佢，個細路自己好細聲咁講就，話因為嗰次喺個球場度跑嚟跑去唔守規矩，教練已經警告咗佢幾次最後先至話佢。聽埋個細路仔講之後班家長就冇嘢好再講，但係竟然連道歉都唔同教練講聲就叫返教練落去教波就可以，呢啲究竟係乜嘢家長呢？乜原來喺球場上面話事嘅唔係教練原來係家長咩！唔怪得知今時今日做家長咁辛苦啦，連教練嘅工作都要管埋。

自己都係家長但係都冇辦法理解上面嗰班家長嘅諗法。