32歲，無事業無成就無錢無能力，仲要仔都生唔到小產埋，點解我會咁失敗？我真係唔知可以點做。。。
小學全級考第8, 但中學派位失敗，去到"次"一級既中學，以為自已會"好叻"，點知跟唔上傳統英文中學既課程，越讀越差；小學時年年校隊代表，田徑、羽毛球、合唱團、鋼琴比賽、音樂比賽、領袖生、品學兼優生、年年幾個優點；以為上到中學，點都有一樣可以"代表學校"，點知無一樣選中我；越黎越自卑，咩都唔想再參加，要做個"平凡學生"～
但個天連平凡人都唔俾我，同學無啦啦排斥我，話老師錫我多D，話唔明點解老師要俾我做”幹事”，話我無能力勝任，我當時14歲，唔識處理，只想有番班朋友，唯有自動"辭職"，咩都唔理唔做唔表現，終於可以做個"平凡人"。好唔開心咁捱到中五畢業，會考失敗，考試白癡既我，係考場完全一片空白，最後拎住9分，所謂既全科合格去讀幼兒教師培訓，係2千考生中被選中（只收200人），終於可以做到自已想做既野，由細到大既夢想都係做老師，好開心咁讀完書做左3年野，呢5年係我人生中最自豪最開心既5年！
我當年唔單止教幼稚園，仲一值自我增值，不停讀書，3年內再考到演奏級文憑、兩張特殊教育文憑、參加舞台劇演出、音樂比賽、平日放工仲會去教琴；我覺得生生非常充實，非常滿足！可惜，最後因為工傷唔可以再教，只好轉行全職教琴。但我都無放棄過，我當教琴係我既”將來”，我計劃要做一個”出名既鋼琴老師”！我每年幫學生攪音樂會，攪比賽，其他同年既
教琴朋友剛剛起步，我已經有廿幾三十個穩定既學生！我覺得我既將來一定會係好美好好成功！
當年17歲就開始教琴，人地只可以做快餐店搵20蚊一個鐘時，我已經搵緊百幾二百一個鐘，阿媽教落，錢要儲起，到必要時可以用，所以到我24歲，我儲到六十幾萬，終於可以完成一生中另一個夢想： 英國留學！我放棄曬我既學生！我既收入！我多年黎建立既家長學生社群！我洗左30萬係英國讀左一年BA加一年MA，26歲終於拎到個碩士學位！
只不過！我再彈唔番琴，因為碩士學位個考琴試出錯，雖然合格，但對我打擊超大！每次一彈琴就狂喊！（我彈唔到琴將近一年，先開始再彈番～）當時諗住就算教唔到琴，有個學位，番到香港都應該搵到份好工！雄心壯志番到香港，要好好發展一下事業，我好想向幼兒特殊教育（音樂治療）發展，我要做個女強人！我要搵好多錢！買到大屋俾我屋企人住！我要留名萬世！我要為呢個世界作出一點點貢獻！
點知，番到香港先發現自已”高不成低不就”，專業職位話我未夠料，普通職位話我太高資歷，搵左兩個月工，搵左個抑鬱症番黎！自殺死唔去，俾阿媽帶去睇醫生，即刻開鎮靜劑安眠藥，唔駛一個月即見精神科專科醫生（當時精神科普通新症要排一年），又係食藥，再見臨床心理、社工；每日隨左番阿媽度食飯，日日都係屋企張床，望住個𥦬好想跳落去，但又死無用！死都唔敢死！唔想阿爸阿媽白頭人送黑頭人，如果唔係因為佢地，我諗我已經唔係度好耐！
用左幾個月時間都係繼續一厥不振，個天都算好好！突然俾左個”老公”我，係英國讀書果時，識左個鬼佬拍拖，番香港之前分手，因為我覺得異地戀無好結果，但個鬼佬係我抑鬱果幾個月不斷上網陪我，我地無SKYPE過、無”講”過野，只係WHATSPP 靠MESSAGES，我俾佢感動左，又覺得自已係香港都一文不值，已經29歲，不如嫁左佢算！結果，我番左英國，嫁左俾佢！
身邊個個人都話我好！可以”嫁個外國人”！而且仲係博士！奶奶又係醫生！一定衣食無憂！但你地全錯！我個鬼佬係”讀緊”博士！我奶奶”曾經”係醫生！現已退休！兩位都係”無收入人仕”！所以真係無錢！有苦自已知！想搵份工做下幫補下！但係英國，想搵到份好工更難！以我既工作經驗，只可以從事教育工作（我有十年教育經驗，但從來無做過教育以外既工）；只可惜患上抑鬱之後，已經唔可以再教書，因為對自已好無信心！無論係教小朋友定教琴，我都教唔到！就算係有信心！我都要係英國重新再考過認可既教師證！我已經無心再讀書！我寧願去M記做！但！竟然M記都唔請！黎左英國定居將近2年，只係做過一份PART TIME（青少年影相活動），每次只係做3日，做左3次！最後最後，因為錢既問題，我都終於教番鋼琴！
6年後正式教番鋼琴，已經無左當年既”熱情”！我覺得自己好無用！攪左一大堆野，浪費左幾十萬，浪費左幾年時間，最後又係教番琴！但我同自已講：只係過渡期！我而家最重要既係”生仔”！我要有個”幸福既家庭”，呢個係我下半世既目標！已經30歲，要快D生！唔係生唔出！所以我一結婚，就已經去做檢查，我要確保無問題！但個天點會對我咁好？！一CHECK就發現子宮內膜異位要做手術！再CHECK我個鬼佬既精子，只有1% 形態正常！要生仔只有做人工！好！我都無問題！只要生到就得！但點解？俾左我又要收番？520呢一日，我知道有左！我覺得BB一定好愛我！所以係”520”呢一日俾我知道！但點解？未夠3個月，你就係714就離開左我？點解？
我真係覺得自已好失敗！點解企唔番起身？點解遇到困難只去抑鬱？點解我係咁無能力？身邊個個朋友親戚，一係有事業有錢有前途！唔係就有快樂既家庭！有兒有女！我呢？有咩？我咩都無！我奶奶話我有既能力係”令人開心”！但呢樣唔係我想要既野！我想要我既事業！我想搵好多錢！我想有家庭！我唔想好似而家咁！一事無成！見住其他人越黎越叻！點解自已係咁？我有諗過重新開始！但我可以點樣重新開始？無錢讀書！搵唔到工！
我老公同奶奶，我阿媽阿爸就成日話簡簡單單安安靜靜咁過生活咪幾好！但我唔想！呢種生活唔係我想要既生活！我想要有活力有目標有方向！我想我既人生充滿義意同色彩！我唔甘心！當年所有老師、經理、上司都話我係人材！我一定會成功！一定會有好好既事業！點解？今時今日！望住自已個樣，頹爆、小產後成面暗瘡、老左十年，望住自已張CV，由考完個碩士開始就咩都無！我到底可以點做？可以點做？我覺得自已真係好失敗！
有無人可以指點下我？話我知可以點做？我對人生好絕望！好想放棄！我好攰！我呢一生好失敗！我點解仲要捱得咁辛苦？
發表於 
返回列表
