少年成長今日: 0|主題: 15868

收藏本版

回覆發帖

返回列表

跳至頁

查看: 39013 | 回覆: 11

真係「型」？ [複製鏈接]

csir3290

子爵府

積分: 11043

1^#

發表於 23-5-14 11:17 |只看該作者 |倒序瀏覽 |打印

早兩日同老婆行商場，突然間有個大約三四歲嘅小朋友喺我哋面前經過，本來都冇乜留心，但係望一望個小朋友個髮型即刻吸引咗我嘅目光，因為佢家長真係幫佢個頭髮剪得好「型」。成個頭髮嘅一半係剷曬另外一半就有頭髮，我真係唔識形容嗰種「型」。有陣時喺街上面都見到啲家長幫啲好細個嘅小朋友剪啲好型嘅髮型，例如最常見嘅就剷條界或者喺個頭髮上面剷一啲花紋啦，又或者係喺個髮尾上面留一條好長嘅辮等。我相信都係父母覺得咁樣剪髮好「型」所以先幫個細路仔咁剪。

我叫我老婆睇，我老婆一睇就即刻講如果我係學校嘅老師，佢一定唔會收呢一啲嘅細路仔。佢話細路仔嘅形象其實都反映家長心入面嘅一啲諗法同埋理念，如果有條件選擇學生嘅學校，一定會諗佢希望教嘅細路仔都係容易教同埋父母合作嘅。但係呢啲咁「型」嘅小朋友，其實反映咗父母心入面嘅一啲諗法，咁如果我係一間可以揀細路仔嘅學校自自然然就未必會揀呢一啲嘅細路仔。記得好耐以前同啲教書嘅朋友傾開，佢哋都不約而同咁講話其實睇個細路仔就好容易估到個父母平時係點樣管教，根本就唔需要見到個父母，細個嘅細路仔嘅形象完全係嚟自父母，細路仔根本唔知乜嘢叫做「型」，其實完全係反映父母嘅諗法，咁好自然老師都會諗細路仔呢個形象就表示父母都係同樣咁嘅形象，形象亦都有可能反映咗父母嘅價值觀同埋教導方法。當然唔一定係啱，但係當學校只係用幾分鐘或者十幾分鐘去面試見一個細路仔嘅時候，畀我係老師我都會諗如果有得揀嘅時候，梗係穩穩陣陣唔好搏喇。唔只係收生，我啲教書嘅朋友講喺學校入面基本上個細路仔係完全反映家長嘅家教同埋在家嘅照顧。「虎父無犬子」大部分時間都係啱嘅，但係相反嘅情況就更常出現。好似我啲朋友講，見到啲學生套校服成日都皺掹掹或者係平時嘅言行舉止粗粗魯魯又冇乜禮貌咁，你就會知道呢個細路仔屋企嘅管教係點，咁諗深一層呢個其實都係常理，正如我上次講細路仔根本就係白紙一張，佢入學之前大部分嘅習慣同埋態度就係嚟自父母對佢嘅管教。所以父母千萬唔可以輕視細路仔嘅形象，因為正如我上面講呢一個形象其實就係代表父母嘅形象！尤其是啲好年青嘅父母，有陣時以為幫個細路仔打扮到好型，但係其實呢啲個「型」可能只係佢自己嘅父母識得欣賞，再者我啲朋友成日都講，香港呢個社會表面好似係好開放，但係其實內裏根本好多嘢都仲係好保守，你淨係睇下學校仲係管緊學生嘅形象就已經知道。可能係一啲父母心目中覺得咁樣打扮嘅細路仔叫做型，但係喺學界或者普通日常生活中，好多人都會覺得咁樣就係叫做「標奇立異」。呢啲形象除咗佢自己父母欣賞之外，最嚴重可能仲會影響咗細路仔升學嘅前途，可能得不償失。