我因為覺得生活出D左問題,於是去左睇心理輔導,都睇左大半年,主要原因覺得自己好多責任係身。首先係搵錢,因為老公自己開公司,一開始收入唔會太穩定,所以我唔可以唔做野 or 做part time。跟住,所有小朋友既學習、功課、帶興趣班都係我跟,有時我星期六日要返工,老公都唔會主動幫手,我通常都要搵奶奶頂我個角色。屋企所有裝修、維修都係我負責,因為佢長期唔係屋企。大家夜晚係分開食,因為我永遠唔知佢幾點返黎,小朋友又因為食得早,所以我地成家人係有時一晚分3個時間食,永遠冇同枱時間。去到後期,佢話佢工作忙碌,訓既時間都冇,連屋企都唔返,一個星期可能返黎一日,其餘時間多數都係得我同小朋友,佢亦唔會通知我返唔返屋企,我地平時只係靠whatsapp傾家事。我就開始覺得其實同一個人生活冇咩分別,我亦開始覺得自己控制唔到情緒,會大聲鬧小朋友,於是決定去睇心理輔導。老公知道後,都冇特別反應。