啱啱去完羅湖工商銀行開戶口,分享一下。羅湖商業城一入去就係,下面會有相片指示銀行位置。
約9點半到,我準備以下文件:
身份證
回鄉咭
實名大陸電話號碼
香港三個月住址証明(我用銀行月結單)
稅單帶定(冇用到)
護照帶定(冇用到)
入去會有好多好熟手嘅職員一路指導,冇乜大問題,係機器開戶要輸入簡體字比較麻煩,例如自己個名,地址,機器設定輸入法係手寫,我唔識寫地址嘅簡體字就叫員工寫喺紙上面畀我睇,再自己輸入。
大約40分鐘開好戶口。我同時申請埋信用卡,三星期後批核(以短訊通知)。
開戶口頭三個月最低存款要¥1000, 之後¥300。
我忘記問信用卡要唔要碌幾多次,等我去拎咭時再update大家。
開好戶口就有職員幫你安裝app, 綁定支付寶同微信。微信比較煩,要輸入我中文名(必須係簡體),我又搞唔到手機點入簡體,個職員用佢手機打我個中文名再sms我,copy and paste.
綁定又用咗20分鐘左右,前後一個鐘,我10點半完成,後來已經嚟咗好多人,可能時間要預多啲。