pinkdoll 發表於 16-3-6 21:59
在我眼中這對父母很勇敢 他們大可不外出吃飯 但他們肯嘗試 這是一個很大的挑戰 很值得欣賞 努力加油
縱使 ...
你小朋友幾大呀?我都係過來人,出街食飯係挑戰嚟,直至今日我仔就10歲啦都係,佢由坐唔定電兔咁周圍走,到今日都叫做可以坐喺度食完一餐飯,只係對於自己把聲冇控制力,成日好似開啦叭咁大聲講聲,講嘢又唔識避忌,有時令到我同老公好尷尬,由細細聲叫停佢到大聲喝都試過,今時今日叫做大部份時候合格,我地有將要求降低,以不同方式去鼓勵佢引導佢點樣為之好嘅行為(當然有鬧啦),俾人白眼過唔少次,又試過俾人鬧,都有好多鼓勵,好老實,我同老公係好硬淨嘅人,對於仔仔確診到而家已經有5年,我喊過嘅次數一隻手數得晒,因為我知道喊都冇用,但唔係代表我唔傷心,亦唔係另一個會員所講咁要保護自己所以控制情緒,只係我成日想喊完都係要面對,唔想嘥時間,我成日要同個仔鬥智,搵方法去教佢令佢明白同學習,我好彩,仔係邊緣自閉譜系,屬高功能果隻,問題係社交上,說話多但表達能力差,同同齡相處唔嚟,但老師個個都鍾意佢,輔導員錫到佢燶。。。
星期六同仔去食晚飯,因為餐廳老闆娘同我地好熟又好錫我仔,我仔成日行去樓面同佢傾計,由於當日有幾枱客人,有兩枱係老人家添,我仔走來走去,我好驚嘈到人撞到人,點知有一個老伯伯食完飯走果陣走嚟同我仔傾計,我老公同佢講唔好意思我地個仔太嘈,點知果個老伯伯好誠懇咁笑話 : "No,he is fine." 仲摸我仔個頭話 : "You are a good boy",果刻真係好開心。另一枱三個更大年紀嘅伯伯同婆婆一直望住我地個仔,冇笑又冇出聲,好驚我仔做成滋擾,點知佢地埋單後,走果陣行過我地張枱時望住我地笑,睇得出係開心果隻,唔係我地逼走佢地,有時真係外人唔出聲我地都好戰戰競競,出街可能對好多人都係普通過唔普通嘅事,對於我地嚟講,揀去邊間餐館已經係一件大事,但呢D社交場面係每個小朋友都必須要學習面對,自閉兒更加要早早學習,由去下食早餐開始到慢慢食午餐到食晚餐到去飲,我同老公都試過有一排好驚,有時避免出街,但個仔正正需要訓練同學習,於是慢慢由得佢適應,去到而家咁大,我仔依然有嘢要依賴我地,好似佢畏高怕搭lift,真係一段只有兩米唔到距離,佢都驚到成身震,又試過學校旅行佢唔敢入lift,同行義工家長又冇留意,我仔就一個人留低咗喺果度,到老師點名時發現唔見佢,行咗三四層樓續層去搵,最後喺頂樓搵到佢,見到有兩個老人家同佢講緊嘢,果兩個老人家知道佢走失咗,一直陪住佢等有人去搵番佢,果次嚇到老師死死下,以後除非我跟去,否則次次都係老師親自帶住我仔。
花旗太太生活在花旗國,留意時差,你問我未必即時答到。