http://hk.apple.nextmedia.com/enews/realtime/20150722/54001501 | |||||||||||
現年41歲嘅黎瑞恩(小恩子)前年爆出老公曾智明有個內地密友，令小恩子帶埋仔女搬咗去九龍塘大宅兼搞離婚，失婚嘅小恩子日日爆喊，仲試過睇臨床心理醫生，好在得老死劉小慧點醒佢，後嚟仲同前夫和解，點知解開咗個心結，今日有周刊指，小恩子發現自己嘅胰臟生咗兩個腫瘤，唔可以割除，亦唔可以食藥，令小恩子更加睇得開啲!
據周刊報道指，小恩子發現前夫喺內地有女性密友後，即嬲爆帶埋仔女離開，當時確係覺得自己係「全宇宙最慘」，小恩子喺報道中表示：「當時成日問點解，我做錯咗啲咩？我有乜唔好？婚姻底線衝破咗當然唔可以再一齊，但十幾年感情唔明點解搞成咁。所以有時諗起會好嬲，但火起完又諗吓，佢（前夫）其實唔係咁差，思想好撕裂。」本來佢都以為離咗婚，自己就冇事，點知一到夜晚喺度喊，望住一對仔女，佢又會喊，最後決定去睇心理醫生，醫生稱小恩子有啲抑鬱，建議佢食藥，不過，小恩子就想靠自己調節，唔想依賴藥物。
周刊又指，小恩子諗通咗之後，今年5月做咗次身體檢查，因為有時周身骨痛，個心又好抽搐，食嘢佢都好似吞唔到咁，起初小恩子以前自己生瘜肉，原來胰臟生咗兩個良性嘅1.5cm腫瘤，不過，醫生表示：「好難搞，割又唔得，因為黐住晒好多嘢。」，黐住咗太多嘢，醫生叫佢要開心啲，目前每三個月就要去check下，小恩子知道生腫瘤後，佢反應出奇平靜，仲全程冇喊，小恩子覺得係個天叫佢要注意身體，認為「要死就死，驚乜嘢丫？注定咗就冇得講！」但係，小恩子就冇講畀佢啲小朋友聽，覺得係小毛病，或者過一排會冇咗。
小恩子認為，目前照顧自己情緒比控制病情更重要，所以小恩子一直堅持要開心，o依家睇嘢月睇得開咗，小恩子覺得：「每日都當係最後一日，咁就唔會有遺憾，會過得開開心心。」 
發表於 
祝大家身體健康
返回列表
