第一日:我們坐8點幾機到台灣,大約10點幾到達台灣。去到台灣,我們就唱錢,果日的匯率係4.09,匯完錢就去出電話卡,7日台幣$500元!
之後,我們約咗包車張先生車我們去台北市,哩個包車我上一年都係用佢,雖然佢唔係咩集團式經營,但勝在司機好好人,上一年去完台灣後都介紹左好多JM用佢,好多JM用完都COMMENT好好!
去到就去酒店附近食下野,之後去左酒店CHECK IN同放低行李。我們今次都係住澄舍,貪佢平、靚、正!
放好行李之後,我們就坐捷運去「大樹先生的家」,我們一早在FB度BOOK咗下午茶!
去到果度有個好靚既波波池,又有沙又有水玩,仲有煮飯仔,小朋友玩得勁開心!
去完大樹先生的家後,我們就去左行夜市,跟住就返酒店!
第二日:今日我們包車到宜蘭,由台北市包車到宜蘭為台幣$4000。去宜蘭既早上天氣陰陰,但到了宜蘭天氣還好,只是偶然上車時下雨!真幸運!
今天行程都是安排給小朋友,我們先到蔥仔寮體驗整蔥油餅,每人有一份的麵粉整餅的,之前會有工作人員教授如何整餅,整完後仲會有專人替你整熟,完成後可以自行食返!味道都幾好味!
之後去了宜農牧場好近咁接觸雞、羊、鴨、豬等,仲可以餵佢地食野,價錢比香港平!
跟住去了蠟藝彩繪館整蠟筆,哩度好好玩,大細都啱玩,我們都逗留左差不多兩個多小時!
之後,天開始黑,我們亦開始累,司機車我們去左幾米廣場影下相,又帶我們去玩溫泉魚泡腳!都幾有趣!
最後包車返台北夜市買野食返酒店食!
第三日:今日全日去左台灣既Babyboss,哩度係給予小朋友機會工作體驗,我們由上午10點玩到晚上8點(足足10個小時,工時仲長過我地平時返工)!
小朋友玩得好開心,玩左11個職業,有警察、消防員、歌手,玩完真係攰到嘔,因為要幫佢做跑腿去排隊、去計時間!雖然好攰,但見到小朋友玩得開心咩都抵番曬!
第四日:因為前一天的行程太累,我們成家瞓到11點,跟住去左食下午飯,之後坐公車到兒童新樂園!
兒童新樂園的大人入場費只係台幣$30蚊,即港幣$8蚊左右,小朋友6歲以下唔洗錢!抵到爛!
場內既機動遊戲都是按人頭收費,每個機動遊戲大約$20-$30台幣,即港幣$4-$5左右!
我的小朋友因為高度關係只可以玩7種機動遊戲!入場時落好大雨,所有室外機動遊戲都關閉,幸好樂園裡面有室內遊戲室,裡面好似冒險樂園,都係按每個遊戲收費,但平好多!仲有個免費波波池玩!
我們玩完室內遊樂場後出返室外雨就開始停,最後7個機動遊戲玩左6個!玩完都已經6點,坐公車買野食返酒店食!
沿路返酒店時在地下街見到有盲人按摩就試下玩,港幣$50可以按20分鐘!抵過香港好多好多!
第五日:今日天氣唔穩定,所以取消左去六福村既行程,改左去睇小丸子展覽!
一早又係去酒店對面既小店開餐,跟住就行去展覽館!小朋友好鐘意小丸子卡通,所以去到果度好開心!推介大家都去睇下,因為都幾靚!
去完小丸子後,因為落好大雨,跟住我們去左行地下街,先生仲在地下街剪頭髮,台灣剪頭髮只係港幣$25蚊,超抵!
跟住我們去食饗食天堂自助餐,一家三口只係食左港幣$466!超級抵!跟住又行地下街睇下書,跟住就返酒店!
第六日:今日我們包車出發去六福村,六福村果度可以坐格巴士近距離睇動物,六福村有好多機動遊戲啱小朋友玩,而且都不用排隊!我覺得好玩過迪士尼!
逗留到大約3點,打比包車司機,佢帶我們去參觀台灣好出名既蛋糕公司,之後仲帶我們去機場附近的港口食海鮮,果度既海鮮好新鮮!推薦各位可以臨上機場前可以試下,因為果度距離機場車程只係20分鐘左右!
如果明亮的光線使你雙眼再也看不見
我的愛能把你帶回家