有朋友做開義工，一時探望長者，一時照顧小孩。。。。好多瓣數。
最近佢唔知喺邊度搜集到一大批毛冷，話係織畀社福機構，預埋我一份。。。。。幫手織。
好耐之前我曾經跟過一個扶貧團去內地，佢哋每次都會帶大量溫暖牌頸巾作為其中禮物。 嗰段時間，我自費買咗好多毛冷，跟住日織夜織，集齊一定數量，就會拎去畀佢哋帶去。
後來佢哋冇再搞扶貧團，我亦停咗織頸巾。
其實我都幾鍾意織嘢，可惜織嚟織去獨沽一味只得頸巾，其他織品完全零知識，雖然有心想學，但係無心裝載，亦無天份，所以未能練就一雙巧手。
今次再有機會投入織場，簡直勾起我一顆熾熱心，落足心機每日織呀織。 呢條呢款花式，嗰條另一款花式，務求每一條頸巾都係獨一無二。（哈，所謂唔同花款，來去只係喺高針低針變化，即係呢條係高高低低針，下條就低低高高針，再下條就高低高低針，再再下條就高高低高高低針，又或者一行高一行低，兩行高兩行低。。。。。如此類推，極度簡單，複雜花款，無能為力。）
由於每次織時，我都係一邊煲劇一邊織，而因為每次唔同花款，所以都幾傷腦筋，一開針之前就要諗定款，周不時要計住第幾針第幾行就要轉換高低針，間中又要回頭數之前是否有錯漏，以免影響整條頸巾花款。。。。。當發現錯時，就要拆晒錯嘅地方，重新再織過，根本煲唔到劇。
後來我索性統一，全部織低針，一來已經諗唔到花款，二來要計針數針好麻煩，三來一個方向織，完全唔需要睇，咁就可以一邊煲劇一邊織，只係間中數吓有冇唔覺意漏咗一針半針。 通常漏針機會好微，所以好快就完成一條。
不過，無論冷天或熱天，揸住毛冷感覺唔太好。 冷天凍，織時倍感吃力，因為手乾燥要用力握針。大熱天，毛冷焗，令雙手出汗，每織一針都會輟住輟住，唔容易推動，又驚手汗會弄污頸巾，所以要就住握針。
因為答應咗朋友，點都要完成任務，日後若然仲有呢啲機會，我唔會推辭，不過就唔敢再咁大口氣，豪言多啲嚟密啲手，無論有幾多都包在我身上。
小織怡情，多織攞命，要量力而為之。
春有百花秋有月, 夏有涼風冬有雪, 若無煩事掛心頭, 便是人間好時節.
發表於 
返回列表
