回覆 katelyn2047 的帖子
平時係香港, 好多時同佢一齊出黎食飯飲荼high tea, 大家都係AA制, 好正常啦, 無問題, 點知今次旅行又比我睇到d 野.......
到步第一日佢就提議不如每人拎住一千蚊出黎, 當係一個pool,反正大家呢幾日都係一齊食飯搭車, 呢D洗費就係呢個pool 到攞, 唔洗次次夾番錢或drop低數再對分, 咁我都覺得呢個主意幾好無問題, 照做啦....
有次一齊行街行到好熱我想買野飲,我最鍾意係飲汽水架啦, 咁當然係買汽水飲啦, 但我朋友平時係唔飲凍野及甜野既, 因佢有糖尿病, 最多都係飲清水, 當時我見佢已隨手拎左支水, 點知又見佢眼望望, 望下價錢佢知道汽水貴過水之後, 佢突然改變主意拎左支凍果汁飲 (價錢和汽水一樣)...其實當時未買之前我都諗住係我自己比錢唔用pool 既錢, 因為我知佢係會飲清水既, 但現在既然價錢一樣, 咁我咪用pool 既錢囉. (之前係佢話由我負責keep Pool 的錢).
當地有一間好出名既芒果甜品店, 是我們行程中已計劃一定會去的. 我去到當然會叫人氣no. 1 的甜品啦,一個full set 內有雪糕, cream, 和新鮮芒果, 椰汁糯米飯, 點知我朋友見我點呢個餐, 佢又死無蝕底又跟我叫呢個, 我就好盡情咁食晒成個餐, 一D都唔晒, 點知我望下我朋友個碟, 見到D雪糕溶晒無食, cream 又無食! (其實都唔出奇, 之前都講左佢少食凍野, 而且都知佢有糖尿病, 好多甜野唔食得) 但咁樣好浪費啫, 佢自己唔食都唔會問下我食唔食, 我唔係貪食佢果份, 而係從呢點我覺得佢好自私. 一係最多咪唔好叫呢款餐囉, 何必要咁晒錢呢, 叫左只食左一半. 後來我終於忍唔住同佢講: 你食唔晒, 你可以揀另一款, 唔洗一定要叫和我同一款的, 自己唔鍾意食既, 叫左唔食又浪費, 其實呢餐可以唔用個pool 的錢, 自己AA架嘛. (其實當時我心諗, 就算大家叫兩份唔同價錢既餐, 用pool 的錢, 你或我蝕得幾多呀? 做朋友係咪咁計較呀? 一分一毫算得咁盡? 自己都唔開心啦.
有一晚食完晚飯行街,我們經過街邊有檔賣粟米杯, 我都費事問佢食唔食, 咁我自己叫左一杯, 當然都諗住用自己錢,唔用pool 錢架啦, 點知佢小人之心(以為我用公數食), 佢又話要食, 又叫一杯, 咁好啦, 既然兩人都食咪用公數囉, 好平啫, 一邊行一邊食, 點知食食下我見佢把自己果杯粟米掉左去垃圾桶, 我問: 唔好食咩? 點解扔左佢既?, 佢話: 唔係呀, 我好飽食唔落啦. 我聽之後真係好嬲, 覺得佢好無依食, 好折墮! 我同佢講: 既然你飽就唔好買啦, 我一個人食一定唔會用公數, 我會自己比錢架. 好過浪費食物啦.
以上"死無蝕底"情況, 三天旅程經常發生, 話左佢都係咁, 一次又一次, 但佢又要跟住我行, 因為佢嚴重公主病, 一個人唔可以周圍走, 怕迷路,佢連 google map 都唔識用, 我做埋佢既搜尋器, 手機 sim card 都唔識換, 又係我幫佢換!
其實我明白同朋友去旅行一定要互相照顧, 包容和體諒. 3日旅程, 照顧佢各方面我都已好盡心盡力, 但佢仲要比面色我睇, 講野仲句句有骨, 人品上都有問題, 自私自利, 樣樣都斤斤計較既朋友, 仲值唔值得繼續交往, 已心裡有數!
如有留言,請主動直接PM我, 唔好叫我先PM你. 你PM我, 我多數會覆, 但就好少主動發PM比人