本帖最後由 小草 於 18-1-17 10:49 編輯
【終於成事?】編審羅佩清透露續集已構思 劇名叫《降魔的之十字路口》
如果要數2017年最受觀眾歡迎劇集嘅話,一定非《降魔的》莫屬。雖然劇集係低成本製作、卡士同CG都一般,但劇集勝在題材吸引、演員用心演出,成功帶動觀眾情緒。好似的士司機小馬(馬國明飾)發現熟客力哥(金剛飾)同力嫂原來唔係人係鬼,因為心事未了而唔肯離開人世。後來小馬諗住幫佢哋搵返個仔,點知自己就係佢哋嘅親生仔。期間小馬見到當年麵鋪火災情況,仲要不停親眼睇住佢哋被燒死。同埋��貓(何遠東飾)意外被壓車內死亡,小馬就幫龍貓報夢俾老婆交代身後事等等。唔少觀眾都被劇集所感動,而睇到眼濕濕。
雖然劇集收視麻麻,但唔少演員嘅演技被網民激讚而成功彈出,贏盡口碑。大結局留下唔少伏線,搞到一班網民即刻柯南上身,紛紛話無綫會拍續集。早前更指《降魔的》總共有三部曲。之前監製方駿釗曾經講過開唔開續集,就要睇觀眾反應而定。
喺噚晚編審羅佩清喺Facebook po 千字文多謝觀眾喺民間電視大獎投《降魔的》,令劇集獲得多個獎項。除此之外,佢更講《降魔的》對佢嚟講係有特別意義,因為除咗係佢第一套編審嘅作品,劇集亦係寄託咗佢對父母嘅思念,仲話如果可以劇集可以覆蓋到靈界嘅話,好希望父母都可以睇到。
文中更提及到唔少人問佢關於續集嘅問題,佢就話其實喺構思嘅時候,已經計劃係一個可持續發展嘅系列。第二部曲已經有初步構思,喺第一部曲隱藏嘅角色同疑團都會喺續集解開兼會進一步開展靈異世界。至於劇名方面,佢哋亦已經諗好叫《降魔的之十字路口》。
羅佩清話目前未正式落實,仲有不明朗因素,所以希望觀眾可以為《降魔的》喺《萬千星輝頒獎典禮》加油,藉住呢個機會爭取多啲民意,令TVB對續集有信心。最後佢仲話無論有冇獎同有冇續集,佢哋都會好感激觀眾對劇集嘅支持,所以準備咗啲小驚喜俾大家,叫大家記得密切留意。