我就係呢個馬x瑩所講嘅「租霸」。
有朋友見到呢個貼，話我知我哋畀人屈、因為我平時冇上開forum，搞到要特登去開個新acct上唻睇下佢點屈我哋。
睇完真係好震驚，有人可以咁歪理。我哋從來冇遇過咁衰咁不負責任嘅業主，佢所講嘅嘢好多大話、隱瞞，冇講佢哋自己點衰。
前文：
我哋對上一間屋，租咗5年，同業主關係好好，因為佢個仔結婚，所以先要番間屋。因為業主想趁市好盡快賣，有個好價，所以我哋就快快搵地方。而且見佢哋係自住，有個小朋友，個女嘅仲啱啱大肚，所以就以為個單位唔會有大問題。就係咁，就算睇樓嗰時已經覺得佢個單位好殘舊，而且用啲奇怪牌子電器（kelvinator,恕我見識少，真係未聽過冇見過），都照租咗。
惡夢開始：
一搬入去，已經發現好多問題。
廚房洗手盤漏水、洗衣機生鏽兼漏水、各房嘅門鎖kick住kick住、鐵閘鎖嘅時候又kick住、煮食爐個火燒燒下自動熄滅，等等...多問題到我都唔記得咁多。
洗衣機：
因為太多問題，我哋都唔好意思一次過反映咁多，就講最嚴重嗰樣，洗衣機，希望佢可以換。
當初見到生鏽，但冇諗過會漏水，所以就冇理到照租照用，但原來係漏水嘅。初初以為係我哋唔識用，想清洗部機先搞到漏水。同佢講話我哋自己買過一部，佢又問係咪搬走時留低部新機，真係唔知點覆佢。點知之後正常咁洗衫，係會每次都成地水！
再同佢反映，佢話生鏽係因為拖地啲水掂到，漏水佢否認。（後尾換鎖事件嗌大交，講番呢件事，佢否認咁講過點解生鏽，又話自己用開冇漏水，又話生鏽唔一定關漏水事）我哋唔想再煩，唯有照用。但漏水問題真係好嚴重，期間有搵經紀周旋，但佢老公話經紀後期先通知，之前以為搞掂，唔知仲有問題喎。咁最後佢終於肯換機。但真係非常唔好彩，就係因為拖咗成個月，有一次，漏咗勁大灘水，我半隻腳入廚房已經跣低咗，扭親，膝頭瘀晒。好彩嘅係，當時我唔係抱住bb。
但洗衣機事件仲未完。
部新洗衣機送唻，個師傅話冇畀安裝費要自己裝。我當時真係呆晒，咁都慳。我哋就同番佢老公講，佢老公就話你哋自己自己裝，好易咋喎。其實都唔係易唔易嘅問題啦？！況且佢都識講啦，我哋帶住個小朋友架，仲要幫佢搞部嘢？又係糾纏一大輪，因為真係佢哋嘅責任，佢推無可推，最後佢老公唻裝。而因為送貨日子混亂問題，新機到而舊機未約到人回收。所以，要自己搬走！佢一個人搬唔郁部舊機，叫我老公幫佢一齊搬，我老公都有幫佢，咁其實係邊個好心冇好報？部機搬到出𨋢口，啲水漏晒出唻，佢自己都勁尷尬，之後仲要搵嘢同佢抹番驚跣親人呀。
仲未完，話說漏水嗰部仲有另一個問題，就係用嗰陣唔知點解會勁大聲「呯呯嘭嘭」超嘈，真係拆樓咁嘈。我哋以為舊得濟啦，點知新嗰部又係咁。所以我哋打去惠而浦問，原來係因為冇畀錢安裝，所以冇拆背板，用機就一定嘈到不堪，其實唔可以咁用嘅。而因為佢响啲細舖買機，所以惠而浦就不能上唻幫我哋拆板。惠而浦話一係自己試下拆，但就難啲，一係就試下問番嗰間舖。我哋試過，真係拆唔到，而又已經知佢哋係咁樣嘅人，唔太想搵佢，所以成年忍受住洗衫勁轟轟隆隆，好驚嚇親bb嘅日子。
廚房鋅盤：
入去住先知原來又係漏水嘅，仲好嚴重。開親水喉，左面就滲到一大灘水。所以，我哋就响鋅盤左面用膠紙黐咗塊錫紙。佢指控嘅漬同發黃，其實係啲膠紙唻架。同埋有冇可能有蟲呢？好黐線！仲有，個水龍頭又係漏水架，閂完水喉係漏多一陣先停架。
呢樣嘢有約略同佢提及過，但佢都係一貫嘅不負責任態度，我哋唔想煩，唔想同佢糾纏，所以只係提過，冇要求佢整。因此先會用咁原始嘅方法，黐塊錫紙防漏水（其實都防唔到幾多，日日抺水抹到暈）
廁所門鎖：
本身佢隻隻門鎖都怪怪地，但用到就冇理。但有一日，個廁所門反鎖咗開唔返。咁我哋就即刻約人整，然後聯絡佢老公話佢知啦。點知佢唔想整，又話自己用咗6年都冇事，又話我哋住咗咁耐先壞云云，最後嗌大交，問佢係咪唔肯換，佢先話冇話唔肯換。（其實硬件係業主要包，唔知佢拗乜）（拗到冇嘢拗，佢歸咎於態度。真係得啖笑，同佢講個鎖壞咗要換，可以點態度？佢淨係識話自己用開冇事，咁呢啲係咩態度呢？）
開鎖師傅話個鎖好舊，而且係最平嗰啲鎖，最多五年真係要換。事後佢老公話：個師傅話係就係呀，搵公證行囉。（真實對白！）
兒童漆：
係我哋要求用嘅，但講清楚一樣嘢先，係因為佢哋全屋都勁多層板，睇樓時佢哋自己話唔要可拆可補番啲窿。咁我哋就問可唔可以用兒童漆。
煮食爐：
好恐怖地會自動熄火，漏住煤氣咁。我哋call煤氣師傅唻睇，佢話個爐架唔係原裝，而業主換咗個不知名嘅，唔啱位，所以啲火唔穩定，就會自動熄滅。呢啲人，自住都可以咁危險。
以上種種問題，要求佢哋搞嘅只有洗衣機同門鎖，佢話我哋不斷投訴？其餘嘅嘢我哋自己啃晒架！當初唔明有小朋友，自己又大肚，點解仲可以住。而家明點解佢哋要搬。咁都租畀人，扮唔知啲嘢有問題，有冇道德？
仲有：
1.個經紀係associate，並唔係佢口中所講嘅新手。佢都公開咗，經紀係馬鞍山利嘉閣分行，唔爭在講埋，姓彭，男人，歡迎查證佢係新人定老手。
2.洗衣機漏水一事，因為佢唔肯換，我哋有搵過經紀出面講。事後佢老公話個經紀之後唔知幾號先搵佢，咁我唔知佢哋扯貓尾定點喇。
3.冇經紀上過門追租，經紀只send過whatsapp話唔可以咁樣代尾兩個月租金。
4.佢話我哋粗口回覆佢，其實係佢唔忿氣我哋唔理佢，佢粗口鬧我哋，我哋就粗口回覆佢。
佢話我老公用假卡片，又係反眼。佢哋都打過去間公司問，人哋係話已經冇做，即係唔係假啦。真心問，轉工原來要通知業主？同間公司啲人熟，人哋見有個白撞嘅打唻問左問右，古古怪怪，同佢講冇做好耐又講轉咗行，都好明顯係敷衍佢啦。
牆身有黑漬，係因為我哋放咗部空氣清新機嗰呢個位，部嘢係環保設計，唔同dyson咁要用濾紙，而原理係用離子吸啲塵、懸浮粒子去部機芯，污糟咗就用洗（
瑞典牌子：light air， town gas、豐澤有得賣，歡迎查閱）。因此，牆身嗰啲係塵灰漬，並唔係煙薰，冇咁癲。
補充：佢自己本身間屋已經有漬有黑色「哄」。（有相）
佢哋衰到咁，我真心覺得冇必要搬完仲同佢哋全屋清潔。呢點你哋覺得我衰都係咁話。
我哋知佢哋咁衰，自己用到啲嘢殘又爛但唔肯認，臨尾一定煩。所以以訂金代替尾兩個月，就係唔想畀佢哋屈同埋唔想再同呢啲咁衰嘅人再有交集。
我哋之前咁多個月都準時交租，真係租霸會點呀？唔交租，臨走整爛佢間屋，整塞佢廁所，唔畀番鎖匙佢。
真心勸大家，唔好同第一次租樓畀人嘅業主仔租樓，成日覺得乜都唔駛自己要負又唔熟租約，又計較又孤寒，同佢講又乜都推說話之前冇事，真係慘。
對於呢個女人咁無恥，完全唔提及上述問題，仲公開我個人資料，真係令人震驚。
歡迎大家自行判斷佢哋係咪好業主，係嘅話，可自己或介紹朋友租佢哋呢個單位：新港城2期D座290x室。321呎，租金$14000。（經紀話已加租）
發表於 
返回列表
