少年成長今日: 0|主題: 15859

收藏本版

回覆發帖

返回列表

跳至頁

查看: 48549 | 回覆: 4

朋友式相處 [複製鏈接]

csir3290

子爵府

積分: 10992

1^#

發表於 23-3-26 11:24 |只看該作者 |倒序瀏覽 |打印

好多時都會聽到家長講話而家要同細路仔相處應該要好似朋友咁樣。即係點樣先是算係好似同朋友咁相處呢？咁我諗番自己點同朋友相處，講真通常都只係講啲開心嘢，好間中先至都會講下心事，有陣時朋友問自己攞意見嘅時候，雖然都會盡能力畀意見，但係當然唔會要對方一定要跟自己嘅諗法。朋友之間相處當然舒服，因為如果唔舒服嘅話就唔會約出嚟見甚至乎唔來往。但係同仔女又可唔可以咁相處呢？坦白講朋友我唔需要教佢點做人，但係仔女就點樣都牽涉教價值觀同品德嘅問題，所以如果只係強調用朋友嘅方式去相處，其實到頭來可能忽略咗好多嘢，又或者甚至乎去到縱容嘅地步。所以我覺得要同細路仔可以好似朋友咁相處，其實係要講家長喺細路仔細個嘅時候係點樣教導自己嘅仔女。

我成日都講越細個嘅細路仔其實根本冇必要講太多道理，只需要同佢講應該做同唔應該做，因為有啲嘢細路仔亦都未必明白當中嘅道理，尤其係細個嘅細路仔，佢哋好多時都只係跟住心目中嘅喜好去做，根本就唔會理咁多所謂道理。如果大人仲係硬要同佢哋講道理嘅時候，其實效果只會適得其反。反而對啲細個嘅細路仔，只需要畀適當嘅指示乜嘢做得同唔做得就可以。慢慢佢哋就會形成生活習慣，知道邊啲嘢應該做邊啲嘢唔應該做，講真咁細個嘅細路仔就算聽完你講道理佢哋都未必係真正明白而唔去做。而且父母係應該有佢哋嘅權威，如果細個開始父母已經冇咗自己應有嘅權威，細路仔都唔會跟住父母嘅指示去做，到頭來只係俗語講畀個細路仔食住自己，其實外人睇呢啲只不過係縱容或者係父母唔想同仔女有啲咩衝突，甚或至乎唔想教而畀自己嘅藉口。

但係當小朋友越嚟越成長嘅時候，慢慢開始懂事，其實直接嘅指令可以減少，開始真係要同佢哋講吓道理。因為細路仔好多時都會問點解，但係好多時細個嘅細路仔佢哋問點解並唔係想真正懂得箇中嘅道理，而係唔想跟指示去做。所以越細個嘅細路仔其實只需要畀越簡單嘅指示就可以，當然我哋有時間嘅時候，可以慢慢同佢哋傾，慢慢同佢哋解釋啦！到佢哋慢慢長大懂事嘅時候，開始真係需要同佢哋講道理令佢哋由明白從而接受父母嘅指示。而家長亦都開始慢慢要接受仔女有自己嘅諗法，亦都開始慢慢由單向式嘅指示變成開始要接受仔女有自己嘅選擇，父母由指示變成提供意見。而且父母因為自細喺仔女心目中已經建立咗父母嘅權威，所以到去到一啲問題，如果父母係堅持嘅話，仔女亦都會明白父母堅持嘅一定係重要嘅事而學懂體諒同接受。

所以一句同仔女相處要好似朋友咁相處，講就好似好簡單，但係其實做起上嚟就要好睇父母喺自己仔女細個嘅時候點樣去教佢哋，同埋父母點樣去拿捏當中幾時應該好似朋友，幾時應該要用返父母嘅身份。如果一味只係強調要好似朋友咁相處，尤其是係同開始進入青春期嘅仔女相處，如果一味只係強調要好似朋友咁，其實只會變得片面。好似我同自己對仔女咁，大部分時間其實都真係好似朋友咁，乜嘢都傾乜嘢都講，又會一齊玩，去街嘅時候真係好似朋友咁。但係去到一啲重要事情上面，就要有返父母嘅身份同埋權威，當然更加重要嘅係要畀仔女知道條界線喺邊度，父母就係父母。不過我作為家長都應該要時刻反省自己嘅諗法同埋做法，亦都要慢慢開始放開自己接受自己嘅仔女已經開始長大，有佢哋自己嘅諗法，更加要懂得尊重仔女。所以唔好成日以為用一句好似朋友咁樣相處就好容易做到，其實當中係需要好多技巧同埋好睇家長喺仔女細個嘅時候對仔女嘅教導。當進入青春期嘅細路仔，父母想同佢哋好似朋友咁相處嘅時候，首先就要學懂尊重。同埋更加重要嘅係既然係想好似朋友咁相處，朋友就需要互相付出。所以唔好覺得點解自己想同仔女好似朋友咁相處時但係仔女都唔係好理自己，你試諗下你自己都唔搵朋友，你自己都唔同朋友傾偈，你自己都唔主動啲朋友又點會主動搵你呢？更加唔好以為乜嘢都放任，乜嘢都由得自己仔女決定，乜嘢都say yes，就係朋友嘅相處方式！

所以我其實覺得唔好成日以為用同朋友相處嘅方式就可以解決一切問題，因為個問題根本就唔係在於你用乜嘢方式同仔女相處，而係父母根本唔明唔明仔女嘅諗法，要好似朋友咁其實講就容易做起上嚟其實當中嘅拿捏同埋分寸根本一啲都唔容易。