少年成長今日: 0|主題: 15859

收藏本版

回覆發帖

返回列表

跳至頁

查看: 42066 | 回覆: 3

暑期活動的重要 [複製鏈接]

csir3290

子爵府

積分: 10992

1^#

發表於 23-6-11 12:14 |只看該作者 |倒序瀏覽 |打印

就嚟又到暑假，又係時候要幫對仔女諗下有冇啲乜嘢暑期活動可以安排畀佢哋！阿仔就容易啲安排，因為阿仔最鍾意畫畫，所以諗住畀佢報下啲油畫班。但係阿女就已經升中三，佢又冇乜嘢特別想喺暑假嘅時候去學，所以都係諗住搵啲資料畀佢睇，等佢自己揀下。如果佢冇乜嘢特別有興趣的話，最後可能都係畀佢休息下，多啲時間睇下書做下自己鍾意做嘅嘢！

喺我識嘅家長群之中，有好多都似好似我同老婆咁係雙職父母，所以一到啲仔女放假嘅時候，其實好多時父母都要返工，未必有時間可以陪到佢哋，尤其是暑假咁長，就算好似我同我老婆咁每年都會喺暑假嘅時候攞自己嘅大假陪下佢哋，但係都唔會攞到一個暑假咁長。但係偏偏暑假就係細路仔最容易出事嘅時間，因為好多父母都會覺得放假嘅時間就畀佢哋自己出去玩下，再加上自己返咗工根本就管唔到，好多時都聽人講細路仔只要捱過到小六升中一嘅暑假，中一升中二同埋中二升中三嘅暑假，好多嘢都會穩定落嚟！因為喺呢啲年紀嘅細路仔，話大唔大話細又唔細，但係如果成日留喺屋企又好似好悶，所以有陣時佢哋話想出街玩，家長就算唔係好願意有陣時都要無可奈何畀佢哋出下去，甚至乎其實有啲細路根本就唔會同家長講，有時就係家長就算要管亦都管唔到。好多時就係呢啲自己出咗街嘅時間識咗啲唔係咁好嘅朋友然之後出事。呢啲年紀嘅細路仔會向父母爭取自由，好多時父母以為佢哋已經夠大個咁所以都會畀呢啲自由佢哋，我唔係話唔應該畀自由啲細路仔，而係覺得應該逐步咁去比，亦都要觀察住啲細路仔多咗自由之後有冇交帶，其實就好似放紙鷂咁，要懂得扯住條線幾時放幾時收，如果細路仔係做得好嘅一路慢慢咁放畀佢哋。但好多時父母就係未必察覺到出現問題只係識放，但係都應該要收嘅時候又唔識收，又或者要收嘅時候一次過硬繃繃收曬就影響咗同仔女嘅關係。

我自己為咗處理對仔女放長假時候嘅活動，其實喺佢哋細個讀書開始就已經要幫佢哋建立一個生活習慣，就算阿仔阿女到而家，其實佢哋都已經習慣咗就算放長假都好，都係朝早起身就會做番學校啲練習跟住練琴同睇書，到晏晝食完飯然之後先至會係佢哋玩嘅時候，就算暑假其實都要佢哋每一日都要完成一定份量嘅練習。不過當然作為父母嘅我哋，夜晚返到屋企都要幫佢哋睇一睇，等佢哋知道唔係做完就算數或者根本就冇做我哋都唔知。如果自細佢哋嘅習慣都已經係咁，就算去到暑假佢哋都唔會覺得有問題。另外一樣就係要幫佢安排一啲合適嘅暑期活動，正如我之前都曾經講過我哋要幫啲細路仔喺合適嘅圈子入面識合適嘅朋友。不過呢啲暑期活動當然要係啲細路仔有興趣嘅嘢，呢啲就要好睇父母平時點樣觀察自己仔女嘅興趣係乜嘢！夾硬迫佢哋但佢哋冇興趣，效果只會適得其反。到仔女真係要同朋友出街嘅時候，父母就要觀察住究竟仔女同邊個去同埋佢哋出街嘅時候有冇交帶，有冇按時返屋企，更加要同佢哋傾下偈知道佢哋同朋友出街嘅時候會做啲乜嘢。如果真係好擔心細路仔生活唔夠自律或者擔心佢哋無所事事嘅時候，父母可能就真係要考慮下喺暑假期間都要畀啲細路仔去參加下啲課餘託管，即係起碼都有段時間有人睇下佢哋啲功課同埋活動。不過呢啲習慣都係越細個開始做越好！

總言而之暑假雖然係畀細路仔休息嘅時候，但係都應該幫細路仔自細訓練一套生活習慣，只要細路仔喺細個嘅時候開始有一套良好嘅生活習慣，其實要出事嘅機會就會大大減低，所以家長唔可以輕視放暑假對細路仔嘅影響，其實真係要諗下點樣幫細路仔安排暑假嘅生活。尤其是係雙職父母就更加要在意咁安排下小朋友喺暑假時候嘅生活習慣。過度嘅自由同無所事事係最容易令到細路仔出事嘅原因。