少年成長今日: 0|主題: 15859

收藏本版

回覆發帖

返回列表

跳至頁

查看: 27653 | 回覆: 2

眼不見為乾淨 [複製鏈接]

csir3290

子爵府

積分: 10992

1^#

發表於 23-8-27 10:39 |只看該作者 |倒序瀏覽 |打印

經過幾個禮拜嘅裝修，佢兩姊弟間房都終於搞掂，各自可以有自己嘅睡房，跟住又要面對一個問題就係點樣將過往咁多嘅雜物放番入去佢哋間房入面。番到屋企第一件事就係將所有擺滿喺個廳嘅嘢各自放返入佢哋間房，雖然佢哋兩個間房都做咗好多地台，但係要放咁多嘢入去其實都係一個好大嘅工程。最重要係放嘢同執嘢都係一樣，最容易傷感情最容易發生爭拗。但係有上次執嘢嘅經驗，其實都信任對仔女可以自己搞掂，所以都係放手畀佢哋自己執，只係提醒佢哋要善用啲空間同埋要執得整齊，然之後就由佢哋自由發揮，只係話畀佢哋聽要留番幾多地方畀我同老婆擺嘢，佢哋就開始自己執。我同老婆都盡量唔入去睇佢哋，等佢哋自己搞掂反而我同老婆就喺個廳度執其他嘢，當個廳嘅嘢都七七八八嘅時候，其實我同老婆都係喺個廳度做自己嘢，佢哋自己喺房繼續密密執。因為我同老婆嘅嘢相對冇咁多，大部分喺廳嘅嘢都係佢兩個嘅。不過我老婆比較心急啲，成日催佢哋快啲執番個廳嘅嘢！當然我都係畀老婆催嘅對象啦！因為我老婆總係覺得啲嘢仲係擺喺個廳度篤眼篤鼻。

正正係因為我都唔鍾意畀老婆催，同埋我總係覺得我執嘢自然有我自己嘅方法，所以唔鍾意我老婆干涉。我老婆可能都知道所以佢只係間唔中提下我，咪就係因為我明白嗰種感受，所以有陣時我老婆催對仔女快啲執嘅時候，我都同我老婆講唔使咁緊張等佢哋慢慢搞掂。終於執下執下其實佢兩姊弟都係用左日幾嘅時間就將所有嘢放返曬入去自己嘅地方，整整齊齊放好曬，當然都仲可以有挑剔嘅地方，但係整體都算執得整齊而佢哋兩個都覺得自己好有成功感，我同老婆都只係諗方法點樣幫佢哋放得整齊啲，例如幫佢哋買啲儲物格咁。由返到屋企一廳都係雜物，到執返整齊其實都係用咗短短兩日鬆啲嘅時間就搞掂曬。而更好嘅就係大家冇任何拗撬，反而只係諗方法點樣可以再擺得好啲。所以我成日都話信任同埋放手好緊要，因為我相信每個人都有自己做嘢嘅節奏同埋方法，只要話到目標畀佢聽，佢就會用自己個方法去做，夾硬要細路仔跟自己嗰套方法其實只會為自己製造煩惱。只要自細有訓練其實細路仔都可以根據目標同埋要求做得好好。

對仔女越嚟越大就越要提醒自己唔好咁吹毛求疵，要懂得放手同埋信任，唔好事事篤眼篤鼻要對仔女跟足自己嘅步驟去做。信任同讚賞先至係令到細路仔進步最主要嘅動力，我唔係話完全唔理佢哋，而係當佢哋越大嘅時候其實做父母嘅只係從旁畀意見佢哋參考，到最後點樣做法都應該係尊重佢哋自己嘅諗法，冇話家長講嘅先至係最好。所以有陣時「眼不見為乾淨」係避免爭拗嘅最好辦法。我唔係話要去消極乜嘢都唔理，「眼不見為乾淨」聽起上嚟好似係好消極，但你其實想深一層只要清楚咁畀對方知道你嘅目標，同埋想做到乜嘢程度，放手相信佢哋自己去做，唔好喺過程中事事好似揸住放大鏡咁去檢查，咁喺過程中抱住「眼不見就為乾淨」的心態，只要最終能夠達到目標其實就可以。又好似我之前好緊張對仔女去打羽毛球比賽，佢哋每一次比賽我都會坐喺賽邊睇，雖然我都盡量提醒自己要多啲鼓勵，但係有陣時都會少不免意見多多，因為我以前自己都係運動員，但係慢慢發覺其實佢哋有佢哋自己嘅打法，反而試過有一次我行開咗冇坐喺場邊佢哋仲反而冇咁緊張，因為我坐喺牆邊其實有陣時我自己都覺得我仲緊張過佢哋，嗰種緊張唔係要佢哋一定要贏，反而係著緊佢哋有冇做好每一個動作，有冇盡力去比賽。但係經過嗰次之後，自此慢慢就學會放手畀佢哋自己發揮，只係每一次比賽之前都係提醒佢哋贏輸唔係最緊要，最重要係盡自己能力去應付比賽。所以而家有陣時我都未必去睇佢哋比賽等佢哋自己發揮，以前佢哋比賽期間甚或至乎我會行埋去場邊畀意見佢哋，但係而家漸漸學懂將啲責任交返畀教練，而自己就作為支持同埋鼓勵嘅角色，就係咁反而佢哋越打越順，雖然唔係次次都贏但係打得開心，同埋佢哋反而樂意主動同我講返比賽時候自己遇到嘅問題。

所以「眼不見為乾淨」唔係叫咩都唔理，只不過係喺開始之前畀明確嘅目標同埋指示，就由得啲細路自己發揮自己完成，唔好過份斟酌個過程。用咁樣嘅模式相處唔只係親子之間嘅相處，就算係人與人之間嘅相處都會越嚟越得心應手。