少年成長今日: 0|主題: 15857

收藏本版

回覆發帖

返回列表

跳至頁

查看: 31277 | 回覆: 1

孩子長大了 [複製鏈接]

csir3290

子爵府

積分: 10975

1^#

發表於 23-11-5 10:54 |只看該作者 |倒序瀏覽 |打印

早幾日同阿仔阿女去球場打比賽，遇番一個好耐冇見嘅家長。點解好耐冇見呢？原因呢個家長本身係住喺內地，但係佢個仔就喺香港讀書仲一路打波，而且打波嘅成績仲好好，佢個仔因為同我對仔女同一個球會所以成日打波都會見到，慢慢就開始熟落。呢個媽媽雖然住喺內地，但係為咗個仔打波所以每一日都會接送個仔放學然之後帶佢去唔同嘅地方練習同埋比賽。每次練習佢都會坐喺牆邊一路睇住，由於連續幾年都係咁，所以慢慢就開始同呢個家長多咗傾偈，有陣時都會傾下湊仔嘅問題。但係一個疫情佢返唔到落嚟之後，就好似喺個球場消失咗一樣，一路都冇見佢，直至到上一次打波終於又再見返佢，見到面當然大家都會問候下近況。上一次見佢個仔嘅時候都仲係一個剛剛升中二嘅小朋友，而家佢個仔已經有我咁高而且已經中五。聽過阿媽講原來疫情呢幾年佢個仔返咗內地之後，阿媽為咗佢可以繼續練波又唔想冇咗香港個學位，所以除咗上網課之外，大致上都係停咗學習。阿媽就送咗佢去啲體育學校度專心練波練咗一年。聽阿媽講一通返關之後，佢就返嚟香港讀書但係已經係中五，因為基礎唔好所以讀得好差，好多嘢都讀唔掂，根本就跟唔到個進度。

另外一樣我覺得好奇怪嘅就係疫情之前見到個細路仔同個阿媽嘅關係都幾好，阿媽講乜嘢個細路仔就跟住做，阿媽話去邊度練習，去邊度比賽，個細路仔亦都冇乜嘢問題。但係今次見到就明顯覺得個阿仔同阿媽好似面左左咁，總之就會覺得佢哋關係唔好。後來同阿媽傾開佢先至講就係話阿仔而家乜嘢都逆佢意，唔再好似細個嗰時咁聽話，返咗嚟香港之後仲唔係好肯去練波，佢話今次比賽本來都唔想同佢報，因為覺得佢練得唔好，而且因為讀書仲經常發生拗撬添。好似嗰日個仔啱啱打完比賽上嚟坐阿媽側邊，個阿媽就已經即刻話佢，同佢講話一早叫咗佢唔好報呢個比賽，唔好咁打法，我就見到個仔個樣唔係幾開心亦都冇乜理睬阿媽。

我覺得其實呢個媽媽就係典型適應唔到個仔開始長大，開始有佢自己嘅諗法，因為呢個媽媽嘅性格都係比較強，而且個仔自細都聽佢話，佢控制曬個仔嘅一切包括去邊度比賽，去邊度練習，去邊度讀書等等。所有嘢都係有阿媽控制，但係當個仔慢慢長大嘅時候開始有自己諗法，佢覺得咁樣練習辛苦，所以唔再好似以前細個咁投入，另外一方面媽媽幫佢停學嘅時候送咗佢去練習亦都冇問過個仔嘅意願，當然我明白媽媽都係出於想個仔好，想佢專心練習先至會有咁嘅決定，但係原來根本個仔就唔鍾意。而且返到嚟香港讀書之後，因為個仔離開香港之前喺香港讀得算係幾好，但係疫情呢幾年完全甩曬香港嘅課程，到返到香港之後就跟唔到香港嘅進度，而且一讀就已經係中五出年仲話要考文憑試，所以個阿媽當然係更著緊啦！但係最慘嘅就係個阿媽根本落唔到台，成日就覺得個仔逆佢意同覺得個仔做得唔好，佢仲係覺得個仔應該要好似以前細個一樣乜都聽曬佢講，所以關係就一路轉差。個阿媽話而家個仔根本就冇乜嘢同佢講亦都唔鍾意同佢傾偈同以前細個唔同曬。

由於嗰次比賽都成兩三個鐘頭，所以我都同佢傾咗一輪，都同佢講吓其實而家個仔已經唔同咗，同個仔相處唔應該再係咁負面，要多啲讚賞佢，好似我自己都經歷過緊張自己個女比賽多過個女，搞到個女唔係幾開心，所以都要學懂尊重仔女嘅諗法，正面啲同埋多啲欣賞，我同嗰個家長講我話而家同個對仔女嘅相處，可能就要好似拍拖咁你氹下我我氹下你，喺讀書方面雖然未必做得咁好，但係都要畀多啲支持，同埋開始同佢一齊諗下將來嘅出路，我強調係要同佢一齊諗，你都要尊重佢嘅諗法，因為個阿媽成日同個仔講話如果讀唔掂就冇出路冇用，我話正正就係呢啲說話其實最傷個仔，因為其實最清楚就係個仔自己本身，佢最知道自己讀唔讀到，根本有陣時迫都冇用，反而去到中五呢啲時間，其實真係可能要同佢一齊商量下，同埋一齊傾下將來嘅出路係點。最後我同佢講其實要同個仔改善關係真係要互相尊重，要知道個仔已經長大有自己嘅想法。再好似以前咁跟出跟入，個仔亦都未必會鍾意，而且個仔已經中五好多嘢都大定咗，唔再需要咁擔心佢會學壞，相反如果你擔心佢學壞嘅，就更加應該同佢多啲溝通，如果佢係屋企都覺得唔開心，到最後只不過係推咗佢出去同出面啲朋友溝通，唔想佢喺出面群壞人，就更加應該畀一個開心嘅屋企佢，令佢樂於同屋企人傾偈溝通，我同個媽媽講話冇辦法㗎喇，個仔嘅性格其實都係源自阿媽，即係大家都係咁硬頸大家都落唔到台，而且個仔有啲咩想法亦都唔敢或者唔想同阿媽講，呢個時候唯有阿媽自己行多幾步，嘗試改變自己嘅諗法，嘗試打開溝通嘅門，如果唔係同個仔嘅關係只會越行越遠。由於個比賽都要成兩三個鐘頭所以同呢個阿媽都傾咗一輪，到大家臨走嘅時候，個媽媽都話會返去諗下，希望下次見到佢哋嘅時候個關係會好啲啦！

0 0 0

私人傳訊回覆引用

欣媽媽

大宅

積分: 1846

2^#

發表於 24-4-10 11:19 |只看該作者

csir3290 發表於 23-11-5 10:54
早幾日同阿仔阿女去球場打比賽，遇番一個好耐冇見嘅家長。點解好耐冇見呢？原因呢個家長本身係住喺內地，但 ...

多謝正能量嘅分享。
同學仔媽咪嘅經歷，正正我都面對中。
我時時把亞仔學業放首位，常拿同學跟他比較，常出口鬧他不發奮，第日工作就辛苦。。。。。
亞仔都有指責我出口傷他心，覺得他將來一定無出息。。。。。
其實，亞媽的苦口婆心，目的都是為孩子好。以前自己行錯過的路，當然不想子女重蹈覆轍。我話向亞仔說，點解有明燈指引都不感恩，都不肯接受亞媽意見？
最近，發覺亞仔（中4）拍拖，以前的一切都是亞媽為他打點，現在他話 “你比錢我，自己去買校服得啦！”
我即時鬧他，‘’有女朋友唔洗亞媽了。。。你將來有咩事，我都不會理你的。。。。‘’
看完以上引文，我想我都要醒覺要改變自己，接納亞仔已經長大，不要把孩子當做‘’媽寶‘’。同時要比孩子知道，家人永遠會支持佢，家庭永遠是佢嘅避風港。

中年嘅媽媽，現在係醒覺的時候了。大家加油！

私人傳訊回覆引用

跳至頁

返回列表

上一主題 • 下一主題

回覆

發帖

頻道

討論區

熱門搜尋：

少年成長 今日: 0|主題: 15857

少年成長今日: 0|主題: 15857