少年成長今日: 1|主題: 15857

收藏本版

回覆發帖

返回列表

跳至頁

查看: 21879 | 回覆: 1

性格 [複製鏈接]

csir3290

子爵府

積分: 10973

1^#

發表於 24-2-25 12:46 |只看該作者 |倒序瀏覽 |打印

過年幾日假期終於都可以一家人離開香港去玩下，短短地去咗幾日台灣，但係我同老婆因為工作都好忙，所以都冇點諗過去邊度，所以終於都係跟團去台灣。之前都試過跟團去台灣，去過嘅都知道跟團去台灣都必然有一個指定動作就係導遊必定會帶去幾間指定嘅商店度買嘢，其中一間係賣貔貅，入面有啲師傅同你講下你條命啦，不過當然最重要就係想你幫佢買啲玉石飾物貔貅鎮宅之類，我同老婆都唔係第一次去，其實啲師傅講嘅嘢大致都差唔多，之前就主要係問我同埋佢嘅嘢，自從有咗阿仔阿女之後，當然就一定係問阿仔阿女啦。啲師傅講到阿仔阿女嘅性格，我同老婆都覺得講得幾準，首先佢就話阿女好容易比壓力自己，因為佢好想贏乜嘢都想贏所以好容易有壓力。而呀仔就諗嘢好悲觀同諗好多嘢。

首先阿女其實我哋一早都發覺阿女呢啲性格，可能佢係家姐，而且細佬又好黐佢，好多時都聽佢講，所以自細佢就覺得自己係叻過細佬，讀書方面成績佢又畀細佬好，所以我哋發覺家姐好多時都唔輸得，由細細個開始，同佢玩啲桌上遊戲已經發覺好多時一輸佢就會唔開心，雖然未致於會發脾氣，但係我哋都會見到好多時佢都係含住眼淚想喊咁，就好似玩大富翁，佢試過兩次都輸畀細佬之後而家直情就係唔玩。過年期間試過一家人坐埋打麻雀，雖然唔打錢，但係佢一鋪糊都冇食過，佢都好似想喊咁。其實間唔中我都會搵機會嘗試同佢講其實冇人可以贏曬全世界，有陣時輸下都冇乜所謂。尤其是當我哋一家人玩嘅時候更加唔會因為佢輸而笑佢而令佢更唔開心。至於讀書方面我哋都盡量唔畀壓力佢，好性心強可以係推動力亦都可以變成壓力，做家長唯有盡量唔好再額外加重佢嘅壓力，教佢放鬆同埋安排多啲機會畀佢去放鬆下。

至於細佬，師傅就話佢諗嘢比較悲觀，其實我同老婆都發覺佢有陣時諗嘢係先向唔好方面諗先，不過我哋都覺得其實佢呢啲係細路仔嘅期望管理，因為我哋睇返阿仔嘅性格，其實佢都係幾樂觀，不過有陣時佢可能覺得唔想父母有太高期望，所以有陣時啲嘢佢都會先講咗自己係唔得嘅，等我哋唔會有太高期望，最後就算真係唔得都等我哋預咗先。其實呢種方法好多時細路仔都會有，尤其是係如果父母期望太高，細路仔就會用呢種期望管理嘅方法先講到自己乜嘢都唔得乜嘢都唔掂，尤其是係測驗考試或者係比賽方面，因為佢只要表現到自己一定唔得，父母冇期望，萬一真係唔得嘅時候都唔會畀人話。我哋覺得細佬佢嘅性格唔係悲觀，而係好多時都用呢種負面嘅方法去先管理我同老婆嘅期望，例如凡親默書測驗佢一定先講自己唔得唔識先，參加比賽佢亦都會喺比賽前就已經話自己做得唔係咁好，佢嘅諗法就係萬一出嚟嘅結果都真係如佢所講，咁我哋一早已經預咗就唔會有太大唔開心，反而如果出嚟嘅成績畀佢講嘅好嘅時候，我哋可能會開心好多。我哋都覺得呢啲係管理父母期望嘅方法。所以我哋成日都會同阿仔講，其實只要努力過，出嚟結果係點樣其實我同老婆都唔會太介意。

最終師傅講完呢啲嘢之後，雖然我哋都覺得佢講得都啱，而且仲sell我哋買啲好貴嘅風水擺設同飾物，但因為講真呢啲佢所謂講中咗嘅細路仔性格，其實好多時都會出現喺細路仔身上，唔需要用啲乜嘢方法其實有陣時估都會估到，反而最好嘅係呢個師傅喺阿仔阿女面前講中咗佢哋呢呢兩樣嘅性格，我哋仲可以借啲椅同佢哋再傾，因為師傅都話呢兩個性格唔係幾好，提佢哋要留心，咁我同老婆都話連外人都睇到叫佢哋自己真係要留心。最終我哋都冇幫佢師傅買呢啲好貴嘅嘢，反而平平地每人買咗一件好細嘅飾物放喺銀包，唔係因為教佢哋要迷信，而係作為一個提醒，希望佢哋會提醒自己，唔好過份嘅想贏畀壓力自己，亦唔好過份嘅悲觀去經常睇低自己。