少年成長今日: 0|主題: 15850

收藏本版

回覆發帖

返回列表

跳至頁

查看: 9911 | 回覆: 1

打波 [複製鏈接]

csir3290

子爵府

積分: 10938

1^#

發表於 24-3-31 11:47 |只看該作者 |倒序瀏覽 |打印

早幾日放工又係去羽毛球場接阿仔阿女打完波，喺球場度同佢哋嘅教練傾咗幾句，教練講話阿仔阿女而家打波仲係好開心。點解會無端端咁講呢？因為其實阿仔阿女打波都打咗好多年，一路都係跟住球會打，直至到早兩年開始就轉為私人教練，轉咗私人教練之後，自自然然個運動量就更加之高，但係雖然打咗咁多年波，但係其實佢兩個參加比賽嘅次數真係聊聊可數，最主要唔係佢哋打得唔好，而係我同老婆都冇特別話要佢哋參加啲乜嘢比賽。係直至到今年，細佬升中先至正式加入學校嘅羽毛球隊，正正式式開始打吓學界比賽。而家姐就因為學校冇羽毛球隊，所以到而家其實都冇打過比賽，而家姐自己又唔熱衷於打比賽，所以佢只不過係每個禮拜都會繼續默默地練習。

教練嗰日好輕描淡寫咁講，就係話其實佢兩個打咗咁多年波，個個禮拜係咁練，但係都仲係覺得打波係開心嘅事。因為早前其實教練見到佢兩個嘅技術其實都可以加入去佢哋球會嘅代表隊，所以都曾經建議過佢哋加入，咁我同老婆都有問下佢兩個嘅意見，但係考慮到其實佢兩個功課都忙，而且細佬除咗跟教練練波之外，仲要跟佢羽毛球隊練習，我哋都驚佢辛苦，所以最後都係決定冇加入到。可能教練覺得以佢兩個嘅技術，其實應該可以再高層次啲練習，同埋應該參加多啲比賽，又或者連教練都覺得驚我哋呢兩個家長會因為見到阿仔阿女淨係練波冇比賽而覺得冇成績。但係偏偏我哋就同教練講話，其實我哋最開心就係打咗咁耐波，阿仔阿女都仲覺得練波係一件開心嘅事，可以笑住咁練習。我話咁已經達到咗個目標就係希望佢哋培養到興趣。

我話睇返香港普遍嘅運動教練，其實練習嘅時候細路仔普遍都會覺得辛苦，而細路仔好多時就因為越嚟越辛苦，慢慢就對嗰樣運動漸漸失去興趣。我成日都覺得要維持住對一種運動嘅興趣，就必須要喺嗰樣運動入面搵到開心嘅地方。但係不停嘅高強度訓練，其實只不過係會令細路仔覺得越嚟越辛苦，再加上又要應付學業，又要擺好多時間落去練習，根本就連休息嘅時間都唔夠，又點會覺得有興趣呢。但係香港好多教練最慘嘅一樣嘢，就係其實佢哋唔係要令細路仔鍾意佢教嘅嗰種運動，而係要同個佢哋家長交代。好多家長畀咗咁多錢個細路仔學嗰樣運動，自自然然就希望要有成績要有比賽。另一方面，有部分嘅家長根本就唔係視參與運動係培養一種興趣，而只不過係覺得嗰樣運動有用，可以協助個細路仔搵學校同喺學校入面嘅發展，又或者係令到家長自己可以自豪同埋炫耀。就係要滿足家長呢種心態，所以好多教練都要不停咁加緊練習同提升練習嘅強度，不停幫細路仔報唔同嘅比賽，而忽略咗要令細路仔練得開心，家長見到細路仔可以參加咁多比賽甚至乎攞獎，家長就自然開心，但係細路仔又係咪頂得住高強度嘅訓練而真係開心呢？

所以對於我哋兩公婆嚟講，其實參唔參加比賽同攞唔攞到獎唔係最重要，最重要係佢哋要學得開心，而且能夠將一個運動變成興趣而繼續做落去，所以聽到教練話佢兩個而家練波都仲係好開心，咁其實我哋覺得就已經達到咗個目標。但講返轉頭我都明白有陣時比賽可能係佢玩運動嘅時候其中嘅一個目標，有啲家長可能會覺得冇咗比賽就又冇咗玩嗰樣運動嘅目標，我之前喺佢哋啱啱開始學打波嘅冇耐嘅時候都有呢種感覺，好似打嚟打去都唔知自己打到啲乜嘢程度咁，幸好羽毛球有個好處，就係佢有啲章別計劃，可以好似打機咁一級一級咁考上去，所以就算冇比賽其實到咁上下，佢哋自己覺得自己可以嘅時候就會幫佢哋報下考章，好似儲星星咁，由一星儲到三星，再由銅章儲到金章，所以就算冇比賽都可以知道自己嘅程度去到邊度，又可以成為佢哋嘅目標。不過我始終覺得考章同比賽佢都係其次，最重要嘅就係令佢哋可以維持住對運動嘅興趣同埋玩得開心就可以了。