夫婦情感

收藏本版
回覆 發帖
返回列表
跳至頁

首頁
1

尾頁
   81
aidan08


伯爵府

積分: 19487


1#
發表於 23-9-19 15:35 |顯示全部帖子
本帖最後由 aidan08 於 23-9-19 16:42 編輯
小菜豆 發表於 20-3-7 03:12
回覆 858D 的帖子

照妳咁講都似c6本身思維。唔怪之得佢睇自己份工咁重要，

花咗好多時間睇曬呢度D post, 有感而發回應吓某D都有發生喺我同我老公之間的事。我覺得我先生應該都有某程度的阿保症候。

你講開覺得份工重要到無人有，我老公正是。佢的確係經濟支柱，我十分明白佢份工的確係好重要。但佢誇張的程度係異於常人。佢會認為所有人都要明白佢返工係非常重要，當佢想控制某D事時，佢就會用佢要返工嚟令到佢控制呢件事合理化。

例如我其實極少響平日夜晚去街，但偶然一次佢都會用誇張，好認真的態度去warn我；早D返嚟呀，我第二日要返工。事實係就算我唔去街，佢都會睇電話、做呢做嘮搞到起碼一、兩點，甚至三點先瞓。而我去同朋友食飯，一般十一點前返到屋企，但佢點都要次次warn我。

而且，我每次夜晚返屋企，即使佢瞓著咗，我返來都一定會好靜咁做所有嘢，有時可能佢真係醒一醒，但每次都好快瞓返。

其實我唔覺得我夜返對佢有好大影響，但佢就緊張到令我覺得我偶然平日出一次夜街都好似好唔啱咁。

平日星期一至四，有人約佢或約我兩公婆食飯，佢好慣常會答：「唔洗做呀？第二日要返工唔去了。」個語氣係似認為所有要工作嘅人都唔可能平日去街。我試過忍唔住同佢講：「好多要工作嘅人其實平日夜晚都會出街，係你特別緊張唔得啫。」

我希望佢明白，佢呢個習慣係屬於佢好個人的習慣，唔係一個定律，約佢嘅人唔需要一定明白。其實某程度上因為佢覺得同朋友食飯一定要飲酒先開心，唔飲酒對佢嚟講無效益，唔enjoy, 而佢一飲就唔會少，第二日返工好辛苦，於是一刀切平日唔會去夜街，講到好似有工作的人平日仲去夜街係無可能咁。而且毫無flexibility, 基本上一定唔會去，控制自己唔飲酒但enjoy 個飯局係impossible咁滯。只有遇到佢認為值得為佢破例嘅人，例如一個只會來香港三日，行程唔會cover weekend, 而佢又覺得對方好好朋友，佢思前想後點樣調動都調動唔到，佢先會破例。我同佢一齊廿幾年，佢絕少破例，一有人約平日夜晚，佢就覺得「有冇搞錯呀？」咁嘅思維。

其實我知好多親友都覺得佢以上行為好偏執古怪兼誇張。但都要包容佢，因為人哋最多都係約唔到佢平日，但我就喺好多方面都其實比佢誇張工作重要性的行徑感到壓力。

好似今日咁，佢自己主動話要揸車接細仔放學，咁細仔放12pm, 我平時習慣11:30左右出門，因為我唔想小朋友出嚟見唔到我。我叫咗佢出門兩次，第二次佢就講：「洗乜咁早呀？我做緊嘢㗎，要返工㗎（wfh), 坐響架車等成粒鐘嘥時間呀？」事實佢成日堅持嘅只係11:40出門口，比我想出門口的時間遲十分鐘而已，但就又用佢要工作來壓我，令到件事好似我叫佢早十分鐘出門口好影響到佢工作咁。好誇張！
私人傳訊回覆 引用

aidan08


伯爵府

積分: 19487


2#
發表於 23-9-19 16:28 |顯示全部帖子
本帖最後由 aidan08 於 23-9-20 08:21 編輯
alohausagi 發表於 20-7-17 02:15
同我老公一模一樣！！有一次我約咗朋友食生日飯，咁個朋友想食西餐，然之後第二日佢做晒research，佢同我 ...

我非常明白你。

我老公諗食乜係可以用好多個鐘。佢嘅思維係又要抵食、又要屋企煮唔到、又要好食、又要服務好。但一齊食飯嘅人想唔想食唔係佢思考嘅重點。佢已經比我影響到（話到）佢會concern 吓別人嘅喜好，但要佢遷就，我就見到佢好辛苦，佢會食完都不斷重複話D嘢唔抵、唔好食bla bla bla……極度煩。我完全唔明點解一餐半餐要咁執着？

而且佢好鍾意向人游說去食佢自己覺得好食嘅嘢，我係千萬個唔明，每個人都有自己喜好，我唔會覺得人哋鍾唔鍾意食我鍾意食嘅嘢對我有乜影響。佢就好執着，好煩地不斷推介比人。

佢試過響屋企有客人來casual 聚會，叫外賣時，佢用咗差唔多成個鐘去諗，思前想後叫D乜嘢比幾個工人食，無錯，係「工人」，冷落兩個客人，其中有個客人忍唔住同我講：佢真係太誇張，好古怪。我估，叫比工人食，令佢個大腦更加多邏輯上嘅嘢要諗，因為佢又想滿足工人，又有意識要更加控制成本，要更抵，個腦交戰。

又試過一次聚會，一班朋友聽其中一人講，話一間私房菜好好食，大家好雀躍話去試。於是，幾日後，發起的朋友就主動去book好枱，寫埋菜，報告埋價錢，所有朋友一致話ok。唯獨我老公叫人send 個menu比佢。睇完後，佢好多意見，又話D餸唔值咁嘅價錢，無貴價食材又收咁貴，然後佢提議去另外一間個個朋友都去過，佢常去的餐廳。好似完全忘記咗大家係想試嗰間私房菜，而且，個價錢並唔係貴到佢食唔起。總之，佢嘅原則令佢完全無法響社交中去遷就吓其他人。如果要勉強佢去嗰度食，佢會感到好困難，好肉赤，好唔開心，又或者佢真係會話唔去而好掃慶，一定好煩。朋友都遷就佢，但我聽得出人哋同我熟講真心話的，都對佢有微言。

我有話佢，佢有解釋點解唔想去。佢唔明白，其實佢點解唔想去並非重點，而係點解佢唔可以遷就吓其他人？當個個人都想去時，個聚會重點唔係食乜同抵唔抵，而係聯誼，滿足大家想一齊去試間新餐廳。而且只係好偶然一次，佢遷就吓人都唔可以？只有佢一個唔想！

仲有一點，其實全部人遷就緊佢，但我感覺佢反而仲覺得自己幫咗大家避免去一間「呃人」的餐廳，好嘔血！佢永遠唔明白，一樣嘢究竟抵唔抵，唔係淨係實際上的成本與價格的關係，每個人的價值觀可以好唔同，甚至愉悅感都係價值之一。因為佢根本完全唔會去諗或諗唔到其他人嘅愉悅感。而佢嘅愉悅感真係絕大部份來自好實際嘅嘢。而其他人未必是。


我感覺係呢D事只會不斷發生。好難要佢真心明白咁樣有幾討厭。成個世界圍住佢轉而茫然不知。好難頂！我都唔知有幾多個朋友問過我：點解你頂得順佢？

老實講，唔係佢咁有本事，比到好好的生活我，我可以唔需要工作，只專注家庭的話，我好難想像如果我仲要幫手養家的話，我點樣忍受到佢？好彩我都算係比較現實而又樂觀嘅人，我focus 佢嘅優點，否則，真係好難忍受。
私人傳訊回覆 引用

aidan08


伯爵府

積分: 19487


3#
發表於 23-9-19 19:16 |顯示全部帖子
本帖最後由 aidan08 於 23-9-20 08:29 編輯
小菜豆 發表於 23-9-19 17:57
妳老公完全符合亞保病徵，已經無藥可救。妳有何打算？有冇子女？

兩個仔。不過我同我老公感情好好。雖然佢有好多難以理解，好難頂嘅行為，但我欣賞佢好多其他的優點，佢嘅缺點我盡量忍讓，尤其發現佢應該係阿保之後，我覺得好多嘢可能佢自己都控制唔到，亦唔自知自己嘅古怪思維影響身邊人。

我老公有個好處，當我寫信比佢，情理兼備咁話佢知佢有D行為令人難受時，佢會接受，會嘗試改，會道歉。

同埋佢係一百分好爸爸，為兩個仔，佢可以放低好多阿保嘅固執。而且佢好involve 屋企嘢，好family man.

我知佢對情感嘢唔敏感，所以，我會主動keep住得閒錫吓佢，讚吓佢，要好直接，普通人可能覺得好刻意的方法，佢會感覺到。佢會plan 同我兩個人旅行，好多位佢做實際嘢去表達錫我嘅。

佢雖然古怪，但佢多朋友㗎，我覺得好多人覺得佢真誠。而且佢都幽默嘅，十個笑話中大約有四個好笑，其餘六個都好多人唔明個笑點。不過見到佢真係好努力搞氣氛，D人都喜歡佢嘅。而且，佢事業算成功嘅，都係叻人，D朋友都會欣賞佢呢點，比較尊重佢。我亦係一定要揀叻人做另一半，我事實上都仰慕佢好多叻嘅地方。
私人傳訊回覆 引用

aidan08


伯爵府

積分: 19487


4#
發表於 23-9-19 21:12 |顯示全部帖子
小菜豆 發表於 23-9-19 20:22
那麼妳都係幸福的亞保伴侶
樓主開了亞保群組，呢度幾個JM都有分享，有開心有痛苦，妳一齊加入分享 ...

請問有冇link?

私人傳訊回覆 引用

aidan08


伯爵府

積分: 19487


5#
發表於 23-9-19 22:04 |顯示全部帖子
本帖最後由 aidan08 於 23-9-20 08:35 編輯
小菜豆 發表於 23-9-19 20:22
那麼妳都係幸福的亞保伴侶
樓主開了亞保群組，呢度幾個JM都有分享，有開心有痛苦，妳一齊加入分享 ...

可能我哋真係一凹一凸，可以互補。

我個人都理性，而且實際。我好清楚婚姻係合作關係，而唔係你儂我儂的純浪漫關係。我揀佢，好大程度係佢符合我心目中需要的丈夫角色的條件。我無事業心，想結婚之後相夫教子，專注家庭。好細個已經清楚我想搵個叻人做老公，可以照顧我，保障仔女生活。我讀書都叻，但我勤力讀書係為咗令自己有襯得起叻老公的條件，有去到嗰個階層，認識到嗰類人的機會。所以，我個人都係目標為本。而我亦好清楚知道無人係完美嘅，我排咗呢個條件為最重要，其他嘢我會衡量，自己可以應付到，遷就到的，我唔會太focus. That’s why 我可以欣賞到我先生的優點，自己心理上亦淡化到佢缺點。咁啱嘅係，我要求一個老公會做到嘅嘢，佢基本上全部做到。

佢揀我，依佢阿保思維，一定都係因為我符合佢建立一個家嘅利益。而且，基本上好少人就到佢，佢自己應該都知。

由於我唔係阿保（我評估自己唔係），我都會有被情感支配，多愁善感的時候。我個人好有同理心，亦比較對其他人的感受敏感，有時庸人自擾。呢樣野，由於佢無咁嘅問題，好多時反而幫助到我行遠少少睇一D問題，減少被情感支配。亦由於我好有同理心，我比較樂於遷就人，而且我重視與人之間嘅關係，我會諗方法去適應人又唔會委屈自己，攞個平衡。所以，我對我老公都會因應佢個人嘅性格去嘗試唔同方法，經營段關係。
私人傳訊回覆 引用

aidan08


伯爵府

積分: 19487


6#
發表於 24-4-15 22:21 |顯示全部帖子
本帖最後由 aidan08 於 24-4-15 22:29 編輯
858D 發表於 23-9-21 01:26
此樓層所描述嘅優點 也是 我現任先生 所欣賞我這阿保女 的優點 和性感之處。
我現任先生雖然比我更成功 更 ...

睇到你呢段，又令我有感而發。

我發現D阿保真係好易信人，尤其當人讚佢哋時。佢哋唔會諗讚佢哋嘅人係咪有目的，係咪真心。好沉迷醉喺讚美之中。

其實，好似我呢種咁實際的人，真係做所有嘢都幾乎一定有目的。我成日好誇張地讚我老公，係完全唔會對普通人用咁誇張直接的口吻去讚嗰種。因為佢真係信，而且好開心，覺得係真。會強化佢去做嗰件事，變成佢做嗰件事的動力。

佢對自己的優點又係會好唔知醜咁強調同放大，表現好似一個小朋友。其實咁樣唔係最大問題，反而係，佢哋非常淡化地看待佢哋的缺點，又或者茫然不知自己的缺點其實非常影響其他人，喺好多事情上令人感受唔好。若非受佢哋照顧，享受緊佢哋帶來的莫大好處的人，其實好難忍受呢D缺點同佢哋相處，或者相處過程會碰到好多問題。就算話比佢哋知，佢咁做咁做令人莫名其妙，好古怪，而且好自我，好影響人⋯⋯佢哋都會好淡化自己所作所為令人困擾的嚴重性，或者漠視，更多的係輕視嚴重性，以為好小事。全世界遷就緊佢，忍受緊佢而不自知。
私人傳訊回覆 引用

aidan08


伯爵府

積分: 19487


7#
發表於 24-4-16 09:01 |顯示全部帖子
858D 發表於 20-3-6 00:45
妳講中0左我在＃1 樓想講嘅點。當我話我個大女 搞唔好人際關係 好蝕底，就係話 佢會在社交或職場 上佔下風 ...

你同你先生的特質，同我與我先生有D似。

我老公又係得罪咗人都唔知嗰種。

而我就好識交際，好少得罪人，社交能力好好。

我情史上無試過比人撇，全部都係我撇人。

同埋好多人都覺得我EQ高，我諗我係少數同到阿保相處嘅人。
私人傳訊回覆 引用

aidan08


伯爵府

積分: 19487


8#
發表於 24-4-16 09:44 |顯示全部帖子
本帖最後由 aidan08 於 24-4-16 09:45 編輯
858D 發表於 24-4-15 00:03
最近我發現 我對家居每樣東西的擺放定位 都以其功能性 來設定。
例如：往前後左右移動多少CM 和 向那個方 ...

關於阿保的古怪行為，我想請教一下你。

我成日用個「煩」字去形容我老公。在我眼中，佢真係一個好煩嘅人。佢會不斷重複一D無用的溝通方法去試圖達到目的。我唔明點解屢試失敗，佢仍然唔會改變個溝通方式，仍然只係用把口重複佢想人做的事。去到一個位係別人覺得佢又固執又煩，但都唔會達到佢個目的。

舉個例，我哋有一對夫婦朋友，喺佢哋個仔細個時，嗰對夫婦朋友駕車載個仔周圍去都無用car seat（香港無明文規定兒童坐車一定要用car seat)，而我老公就好緊張我哋個仔坐車一定要用car seat，我已經不下百次聽過佢講唔用car seat有幾危險，意外率幾高，一堆數據bla bla bla. 我EQ高的地方係，其實我覺得佢不停重重複複講真係極煩，但我已經練成當呢D「煩音」係空氣一樣，我對耳隨時對呢D重複的煩音悉時失聰，完全唔比反應佢。總之，我哋個仔坐車時一定會用car seat.

對於朋友載佢哋個小朋友唔用car seat, 我老公係見親人哋一定會勸人用。又係重複講嗰堆「煩音」。其實我已經見到人哋兩夫婦面露煩厭的表情，而且無論講咗幾多次，開頭人哋客氣應佢知道，直到後來覺得煩厭，人哋都無改變過唔用car seat 的習慣。但我老公仍然係見人一次講一次嗰堆「煩音」。

直到而家，嗰對夫婦個仔已經十五歲，佢哋仍然記得我老公當時係幾咁煩同執著。

我好唔理解，點解又唔係自己個仔唔用car seat, 根本影響唔到自己，佢為何要咁執着去理人哋嘅事？成件事，佢無達到目的，仲要惹人反感，點解要不斷咁做？係咪阿保會不能自控地要求其他人跟自己嗰套，哪怕其實對自己根本無影響？係咪阿保大部分都有控制狂？對自己認為對的事非常執着，就算同自己無關？同埋，係咪阿保不會放過彰顯佢了解同熟悉一D資訊的能力，然後唔理人反應，係咁強逼人接收？同埋，點解一D唔關自己事嘅嘢，如果人哋聽佢講而去做，佢哋會咁開心呢？（我作為非阿保，我真係唔會care, 唔會因為咁而開心。）
私人傳訊回覆 引用

aidan08


伯爵府

積分: 19487


9#
發表於 24-4-17 08:42 |顯示全部帖子
本帖最後由 aidan08 於 24-4-17 08:48 編輯
858D 發表於 24-4-17 05:12
試下用「愛莫能助」呢個切入點來解說畀佢聽。
家父都有你老公呢種「煩」
今日剛好我有雷同事例發生在己身 ...

多謝你嘅回覆。

我其實覺得你所講嘅喺你身上出現的「煩」有異於我老公嗰種。我理解你嗰種，而且覺得合理。你說：「女阿保嘅我少煩呢方面嘅缺失係因為 嗰啲 與我利益傷害無衝突嘅 人事， 我就採取「不聞 不問 不語 不看」

只係重鎚出擊嗰啲 直接影響我自身安全、健康、生活素質嘅事」

看來無乜問題。人當然係需要處理好關乎自己的事。對自身有影響，煩D我都理解。但你看看我引述我先生關於car seat 的事例，朋友的兒子是否坐car seat, 其實與他毫無關係，完全不關乎他任何利益。我沒法理解他為何這樣執着，完全無視別人已經覺得煩厭而不斷說同樣的話去說服朋友。雖然，整件事好像是關心朋友而已，出發點不是壞，但卻令人無法理解為什麼如此執着，以致令人感到十分古怪和煩擾！

另一方面，他過度喜歡說服別人用自己認為好的東西，我不明白為何他那麼喜歡？他又不是做銷售的，成功說服別人不會帶來什麼實質利益，但他總是很「煩」地去「推銷」自己認為好的東西。我完全不明白為什麼這樣做會令他快樂。我覺得每個人都有自己喜好，自由選擇，可以對朋友說說自己用的東西的好處，但不用著緊別人是否真的會用吧？與我何干？

由於對他的行為真的不能理解，所以我內心真係有疑問，阿保是否都有控制狂特質？而且對很多事，他們拿揑不到中庸之道，往往特別extreme。阿保好像也不懂觀察一般人在各種社交、溝通上的慣常，從中學習「大衆」的做法，令自己不致於太過古怪，甚或令人難以理解。


我看不透他們是根本不在乎自己是否看來「正常」？還是先天上的缺失令他們學不來「正常」做法？
私人傳訊回覆 引用


首頁
1

尾頁

跳至頁
返回列表
回覆
發帖
高級模式 | 發表帖子
B Color Image Link Quote Code Smilies
你需要登錄後才可以回帖 登入 | 註冊

© 2024 Baby-Kingdom.com Limited.

網站： 聯絡管理員 廣告查詢 私隱政策 使用條款 免責聲明 使用意見