吹水玩樂

時事理財

由家出發

媽媽天地

育兒教養

情報分享

意見反饋

聯絡管理員

我的中心

Baby Kingdom - 親子王國香港討論區 › 首頁 › 烹飪搵食› 簡單早餐之芝士煎餅仔（食譜）

烹飪搵食今日: 1|主題: 138978

收藏本版

發帖

返回列表

跳至頁

查看: 83951 | 回覆: 776

[麵包糕點] 簡單早餐之芝士煎餅仔（食譜）

12 3 4 5...39

積分: 1873

1^#

發表於 12-11-13 11:16 |只看該作者 |倒序瀏覽 |打印

本帖最後由 EVA12478 於 12-11-18 21:41 編輯

多食芝士補鈣效果一流。

所以依日早餐，又整煎餅仔，所用餡料，就係芝士為主。

用Mozzarella碎芝士，芝士本身奶香味重，有拉絲煙靭嘅效果。

我早餐整嘅煎餅仔，多數會係頭天晚上整落，擺入雪櫃低溫發酵一晚，第二日早上取出煎香即成，方便又簡單。

區別隻在於餡料嘅不同而已~~~

依日整芝士餡。

好簡單「Mozzarella碎芝士、略煎香過嘅煙肉碎、蒜鹽少許、芝士粉少許」

撈勻即成芝士餡，三兩分鐘搞掂嘅事。

餅坯略略講一講。

平時屋企有咩麵粉我就用咩麵粉嚟整，高中底筋粉我都一樣咁整，煎出嚟只有少許口感上嘅區別，所以對麵粉嘅要求不大，普通中筋粉我平時用得最多。

整餅仔所需材料極少。

我屋企得兩個人食，所以一次整，只需要「六七湯匙麵粉，一匙白砂糖、薄薄一細茶匙乾酵母、一細細匙油。」

落少少室溫暖水，逐少加入麵粉度，慢慢搓成一個麵團。

水嘅份量無一個準確性，我都係邊搓邊落水，因應粉嘅唔同，天氣嘅唔同，落水嘅份量都唔同，靠嘅係手感。

我整嘢真係好求其，我無話搓得幾靚，隨便搓成一個麵團，搓佐五六分鐘度，就搓好。

無需話好似整麵包咁，要搓到麵團起薄膜又點，無啊，求其搓好就OK喇。

對材料份量又無好精準嘅需求，多啲少啲，都基本上無乜太大問題。

因為係要擺入雪櫃低溫發酵一晚，所以麵團無需要等佢發起先包餡，我一搓好麵團，就直接分割包餡。

因應麵團嘅份量同自己想食嘅大細，我分割成四份，咁就可以煎四個餅仔。

有時咁樣一個相似大細嘅麵團，我懶得煎咁多次，索性整成一個大餅，都一樣無問題，悉隨尊便。

然後好似包包咁，將麵團搓扁。

放入大大量嘅芝士餡~~~

無需擔心餡太多會走出嚟，麵團本身具有的伸縮性，可以好輕易將芝士包好。

無需包得太靚，只要保證到個口封好唔會漏餡出嚟就無問題。

包好餡嘅包，壓一壓，碌一碌成一個扁圓嘅生餅坯，搞掂~~~

如是整好四件餅仔。

表面洒啲生粉，包好保鮮膜，擺入雪櫃（平時擺汽水果格），低溫發酵一晚上。

第二朝早，提早十分鐘拎出嚟透透氣，就煎得。

係咪好簡單咧`~~~

通常依類餅仔，無論大細，我通常都以三四分鐘煎好一個為標準。

只要時間掌握得到，三四分鐘足夠哂，煎得太耐，餅皮會過硬過乾，影響佢食用嘅口感，就不美了。

通常我會先開大火，落少少油，餅嘅兩邊，最短時間之內，先煎至金黃色（一邊大約十五秒）

然後轉返細火，落一湯匙清水，等水蒸氣儘快將餅煎至熟透發酵，大約用一分半鐘左右

最後一分鐘，開住蓋，將餅兩邊煎至香脆，搞掂`~~

十分鐘之內，四個餅仔，加埋一碗麥皮，一個靚早餐，就搞掂。

香香濃濃嘅芝士香味，加埋鬆鬆軟軟，外脆內綿嘅餅皮，如此一個餅仔，永無失望~~~

依個芝士餅，如果唔係煎，亦可以蒸，以前我整過芝士大包添㗎，鬆軟好味一樣~

之所以咁詳細同大家分享自己心得，無非係希望做一個拋磚引玉之效果，見到好多人，凈係擺張圖片上嚟，字都無一個，對於有心想學整嘅網友嚟講，得個睇字，未免無癮，既然係想分享，不如索性徹底啲，寫多幾個字，有心人想學嘅，都有機會自己嘗試，於人方便，自己方便~~~~
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

補充少少，大前提係整到麵坯，低溫發酵一晚，就成功做大半，其它除佐芝士餡，入邊嘅餡料可以千變萬化，同埋造型亦無需拘泥一局，補返以前整過其它造型同餡料嘅餅仔。

整成腸仔包，一樣煎熟。（腸仔較大，需提前烚熟）